WARARKA MAANTA:::
Waxaa isku soo dubaridey:
W/D Amiin Yuusuf Khasaaro
E-Mail amiinkhasaaro@hotmail.com
Muqdisho, Soomaaliya

• Cali Maxamed Geeddi: “Anigu ma aamisani….”
• BADMACEEYE: “SACAD IYO SULEYMAAN HADDAAN SIIYO TALADEYDA”
• Ergadii ka socotay Beesha Cayr oo gaareen Degmada Cadaado…
• 54-JOORNAALIISTE OO SANNADKAAN LA DILAY!
• 19-JIR MAREYKAN AH OO LAGU EEDEEYAY INUU GACAN SIIYAY KOOX "ARGAGAXISAA" OO SOOMAALI AH
• Isbahaysiga Dooxada Jubba oo ka hadlay kalsoonida lagala noqday xukuumadii raysul wasaare geedi
• Xulka Qaranka Somalia oo maanta la ciyaaraya….

Cali Maxamed Geeddi: “Anigu ma aamisani….”

Prof. Cali Maxamed Geeddi oo ah Ra’iisul wasaaraha lagu dhisay Mbagathi isla markaana baarlamaanka uu kala laabtay shalay kalsoonidii xukuumaddiisii ayaa mar uu xalay u warramayay saxaafadda ayaa waxa uu sheegay ama ayaandarro ku tilmaamay barnaamijkii uu ku kacay Baarlamaanka ee ah in kalsoonida loo qaaday xukuumaddiisa.

“Anigu ma aaminsani in xukuumaddayda lagala laabtay kalsoonidii waayo barnaamikayga iyo magacyadii Xukuumadda maanan horgeyn golaha baarlamaanka” ayuu yiri Prof. Cali Maxamed Geeddi oo sheegay inuusan marnaba ku xadgubin qodobbo uu leeyahay Baarlamaanka.

Mar wax laga weydiiyay: Haddii uu madaxweynuhu aqbalo go’aanka baarlamaanka adigu ma aqbalaysaa wuxuu ku jawaabay: ”Arrintaasi madaxweynaha ayay u taallaa markaas ayaanan ka hadli doonaa”.

Ugu dambeyntii Cali Maxamed Geeddi waxa uu sheegay in shacabka Soomaaliyeed   ay aad uga naxeen arrinta uu ku kacay Baarlamaanka, waxa uuna sheegay in arrintaas uu shaqsiyan aaminsanayn.

BADMACEEYE: “SACAD IYO SULEYMAAN HADDAAN SIIYO TALADEYDA”

Maxamuud Warsame Faarax (Badmaceeye) oo ah siyaasi isla markaana ahaa xildhibaan ka tirsanaa dowladdii TNG-da muddana ku sugnaa shirka dib u heshiisiinta ee Nairobi dhawaanna ku soo laabtay magaalada Muqdisho ayaa si kulul uga damqaday dagaallada ka soo cusboonaanaya dalka Soomaaliya gaar ahaan kuwa ka socda dhulka Mugud iyo Galguduud oo isagu deegaan ahaan uu ka soo jeedo dhulkaas, ayaa ugu baaqay kooxaha dagaallamaya inay dagaalkaas si shuruud la’aan ah u joojiyaan lana maqlo culummaa’uddiinka iyo nabaddoonnada ku howlan xallinta dagaalladaas, waxa uuna dareenkiisa ku cabbiray gabay waano iyo canaan waayeel ah, wuxuuna ku bilaabay sedan:

• 1.         Sacad iyo Suleymaan haddaan siiyo taladayda.

• 2.         Haddaan hiil sokeeye uga dhigo sida aan doonaayo, salaaniyo maxaa lagu baryiyo hadallo suubsuubban, Ninkii iga sugaayoow ha filin lay silsiladeeye.

• 3.         Saranseerka iyo barakacaa gubaya saabkayga.

• 4.         Sambabada la qalay baygu yaal dhiigna soli waaye.

• 5.         Saqdii dhexe xalaan laygu diday sarakac boodkiiye.

• 6.         Siigada cirka u duushay iyo sababta yaabkeeda,

• 7.         Saadaasha meel foga markaan sahan ku dheeraaday.

• 8.         Siday aniga ila noqotay baan soo bandhigayaaye.

• 9.         Sixir iyo waxaa idinku jira sun iyo waabaye, sakal laga baqiyo waxaad gasheen surin ciriiryoone, ibliisbaa hoggaan idin surtayoo idinku saynsaabay.

• 10.       Sankuu idinka durayoo kol dhow waydin sibir-goyne.

• 11.       Wuxuu idin salaaxaba, haddaa daba saqlayseene.

• 12.       Haddaanan laga siqsiqin ceebta waa laga sal-gaaraaye.

• 13.       Seetada Caqliga loo jaraa garasha seereeyee.

• 14.       Nin walaalki seefta ula baxay sama ka dheeraaye.

• 15.       Surka markuu ku gooyoo warmaha sararta ruubruubo.

• 16.       Silic iyo dhibbuu mudanaayaa towbada seegye.

• 17.       Inuu Cadowgu suu rabay ka helay saxalku haw sheego.

• 18.       Afrtaa intaan saray naxwaha xarigga maw soohay.

• 19.       Salka meel intaan ugu rakibay sadarka maw giijay.

• 20.       Ninkii igu saluugoow hadhow gabaygu saad moodi iyo suu yahaa kala fogoo siriqdii waa hoose.

• 21.       Sangaa orodka laga taawiyaa salow colaadeedka, haddii saarka laga tumo jinbaa siriq fiyoobaada.

• 22. Sooryana gobaa bixin ogiyo sixin ku iidaaman.

• 23. Eraygaa lagu simaa guluf hub sida laga sugaa howle.

• 24.       Sidiinnaa raggii wada dhashana sahal ma diidaane.

• 25.       Culummada tan iyo sii habaqami sabadi iidoole oo sacabbo hoorsanahayoo.

• 26.       Saatir wada tuugi haddaa niman samaale ah tihii siiya mudankooda.

• 27.       Samca oo maqloo yeela oo yay mar idin seegin.

• 28. Waryaayooy sidani maaha siye, wada samroo jooga.

Ergadii ka socotay Beesha Cayr oo……

Wararka ka imaanaya gobollada dhexe waxay sheegayaan in ergadii ka socotay Beesha Cayr ay shalay gaareen Degmada Cadaado oo xarun u ah mid ka mid ah beelaha ku dagaallamaya gobolladaasi, waxayna markiiba kulammo la yeesheen wax-garadka & nabadddoonnada beesha Reer Xaaji Suleymaan, waxaana la sheegay inay beeshu soo dhaweysay dadaalka dib u heshiisiineed ee ay waddo beesha Cayr.

Waxgaradka beesha Suleyumaan ayaa waxay sheegeen inay soo dhaweynayaan xabbad joojin ka dhex dhacda labada beelood.

Odyaashaas oo ay la socdaan ciidammado aad u fara badan ayaa waxa ay sheegeen inay la sameeyeen xiriir dhinaca kale ee beesha Sacad, waxayna sheegeen inay soo dhaweynayaan heshiis kasta oo lagu walaaleynayo labada beelood, waxaana la filayaa in maanta ay u gudbaan dhinac kale si ay kulamo ula yeeshaan dhinaca kale.  

54-JOORNAALIISTE OO SANNADKAAN LA DILAY!

 54-joornaaliiste ayaa la sheegay in sanadkaan oo qura ay naftooda waayeen iyagoo ku jira shaqooyinkooda, waxaana sanadkaan loo aqoonsaday sannadkii ugu dhimshada badnaa saxafiyiinta 10-kii sano ee ugu dambeysay, sida ay jimcihii sheegtay kooxda lagu magacaabo Watchdog Group.

Ciraaq ayaa lagu sheegay inay tahay meeshii ugu khatarta badnayd saxafiyiinta, iyadoo ay Ciraaq keliga sannadkaan ku dhinteen 23-weriye, halka sannadii horena ay ku naf waayeen dalka Ciraaq gudihiisa  13-Weriye.

Weriyeyaasha inta badan ku geeriyooday dalka Ciraaq waxay ahaayeen Ciraaqiyiin u shaqeynayay dalalka reer galbeedka, iyadoo inta badan dilalkaasi ay geysteen kooxaha mucaaradka, qaar badan oo suxufiyiintaas ka mid ahna waxay u shaqeynayeen saxaafadda Mareykanka, sida ay weriysay Hay’adda lagu magacaabo Guddiga Difaaca Suxufiyiinta (Committee To Protect Journalists).

Sidoo kale 22-joornaaliiste ayaa lagu afduubay dalka Ciraaq iyadoo weriye u dhashay dalka Talyaaniga oo lagu magacaabo Enzo Baldoni la dilay, waxay warbixintu sheegtay in hal weriye oo Keiya oo Mareykan ah uu sannadkan ka mid ahaa Weriyeyaasha dhintay waxaana lagu magacaabi jiray Paul Klebnikov.

Dalka labaad ee ugu badan ee ay ku dhinteen weriyeyaasha waa dalka Filibbiin, waxaana lagu dilay illaa 8-weriye, iyadoo ugu yaraan 48-weriye ay ku geeriyoodeen dalkaasi Filibiin tan iyo intii uu qaatay Nidaamka Dimuqraadiyadda sannadkii 1986-kii.

Sannadii ugu dhimashada badnaa tan iyo xilligii ay kooxdani bilaabeen howshooda 12-sano ka hor, wuxuu ahaa sanadkii 1194-kii markaas oo la dilay illaa iyo 66-joornaaliiste oo intooda badan ka soo warramayay dagaalladii Al-jeeriya, Ruwanda iyo Bosnia.   

19-JIR MAREYKAN AH OO LAGU EEDEEYAY INUU GACAN SIIYAY KOOX "ARGAGAXISAA" OO SOOMAALI AH

 Koox garsoorayaal ah ayaa Mark Repert ku eedeeyay in uu gacansiinayay waxay ugu yeereen "koox argagaxiso ah oo ka jirta Soomaaliya", kaddib markii la soo xiray arbacadii aynu soo dhaafnay isagoo la sheegay in uu qorsheynayay in uu gaarsiiyo kaalo isugu jirta mid dhaqaale, farsamo iyo qalab koox u dagaallamaya sidii ay u ridi lahaayeen dowladda Cusub ee Soomaaliya.

Wargeyska Star Tribune cadadkii sii soo baxay Jimcihii 10-Dicember 2004 oo warkaan qoray ayaa xusay in sarkaal ka tirsan Hay’adda Sharci fulinta ay sheegeen in Walker lala xiriiriyay shaqsiyaad gacan siiya Al-Itixiaad oo ah koox u dagaalanta sidii dalka Soomaaliya looga hirgelin lahaa dowlad Islaami ah, waasida uu hadalka u dhigay wargeyskee.

Sida laga helay dukumeenti maxkamad leedahay wuxuu sheegayaa in Walker uu sheegay inuu qorsheynayay in uu kooxahaasi u iibiyo ookiyaalayaasha habeenkii wax lagu arko (Night Vision Glasses) iyo weliba qalabka sida shaararka loo gashado oo aysan xabbaduhu kasoo gudbin (Bulletproof Vests). Waxaa kaloo Walker lagu eedeeyay inuu abuuray website lagu diiwaangeliyo dadka. Ururka Al-itixaad ayaa sannadkii 2001 Mareykanku ku daray liiska waxa uu ugu yeeray Argagaxisada.

Walker waxa uu wax u baranayay  kuliyada Farsamada ee Wyoming uu ku taallada Laramine, wuxuu u baxsaday xadka Mareykanak iyo Mexico u dhexeeya kaddib markii inankii ay qolka wada deggenaayeen uu arrinkaas kashifay oo uu booliiska u sheegay inuu qolkiisa uu yillay Computer isagoo Chart-ka Internetka uu kula xiriir jiray kooxaha argagaxisada ah. Hadda waxaa lagu hayaa xabsi isaga oo aan loo ogleyn in xittaa damaanad lagu sii daayo.

W/D Amiin Yuusuf Khasaaro
E-Mail amiinkhasaaro@hotmail.com
Muqdisho | Soomaaliya

---

---

W/D Amiin Yuusuf Khasaaro
E-Mail amiinkhasaaro@hotmail.com
ama    amiinkhasaaro@yahoo.com
Muqdisho, Soomaaliya