Wallee lama ledo !
Ducaale Hadal-wanaaje II
ducalewanaje2@hotmail.com
Waad salaaman tihiin
saxiibada webka iyo netka.
"Wallee lama ledo" Sidaas
waxa yiri geedka loo yaqaan "xoorka" bahalka yar ee
dabada cad. mar uu digaag xaraysan la soo bixi kari
waayay. Inta uu dabadiisii caddayd meel uga dusiyay ayuu
dhex wareejiyay halkaas oo ay degaagii hurdo ledi kari
waayeen. Illayn nin baa wax dhex wareejinaya oo wax
walaaqaya.
Ragga loo bixiyay Dir
Woqooyi wallee lagama macaasho. Haddii ay kubaddo
dhaafto ninku ma dhaafi karo. " Madaxweynihii ayaa la
iska qatay". " Wasiirkii 1aad ayaa lagu xigsaday oo la
iska qaatay". "Guddoomiyihii Baarlamaanka
boobka-ku-dhisan ayaa ba ka sii wada horeeyay oo afka la
iska mariyay"...
"Afartii wasaaradood (
debedda,gudaha,maaliyadda,iyo gashaan dhigga ) haba
sheegin halka laga dusiyay.... Hadana waxa lagu
handacoonayaa waa dawlad ku meel gaar ah oo fedraali ah
oo loo dhan yahay iyo dib u heshiisiin. Waar yaa loo
waramayaa !! Waa dhallaankii waalidkii dhalmada baray !!
Wallee lama ledo.Nin ba
waa mar e mus ma kula koray.
Aniga oo ka xun sida la
yeelahayo aqoon yahanka Diktoor Md. Cali Maxamed Geedi.
Waxa aan jeclaystay in aan war dareen siiyo.
Md. Cali , waxa aan ka
xumahay meesha ay kuula kacday. Waxa aad noqotay irbadd
bad ku dhacday. Ragga aad leedahay dawlad ayaan u
samayna hayyaa waa intii laga ledi waayay ee uu dalka
iyo dadku ka jiifan kari waayeen. Waa intii ummadda
halkaas dhigtay ee bacad joojisay. Waa inta ugu fawdadda
badan ee faraha lagaga gubtay meel kasta. Waa wada xarig
lama sitaan. Waa abeesooyin hoosta kaaga jira. Waa
kelidaa oo waxa aad dhexdooda ku tahay shisheeye. Ma na
afgaran kartid weligaa haddii aad jirto intii qurac
jiray. Waa waxaas maalin ba meel u qammaamahaya.
Maxaa ku dhex geliyay
gacan-ku-dhiiglayaasha. Sow tan lagaaga tillaabsaday
boholsha dheer. laba asbuuc gudahood miyay ku dhex
fadhiisiyeen dhijaantii iyo dhiiqadii ay sida raha ka
yeeri jireen. Lagama yaabo in aad isla keentaan kuwan
aad dubka iyo diirka isaga eegtihiin laakiin se ah dad
kale. Alla yaa kaa saara !!
Baarlamaan boob ku
dhisan. Baarlamaan u badan reer baadiye aan wax aqoon.
Marka ay lacagta la siiyo ay ka dhammaato ayay
eeganayaan meel kale oo ay u foof tagaan iyo mid kale oo
ay ku baartaan barlamaan ayaan ahay. In ay bakhti yihiin waxa
aad ku garan kartaa goorta ay doorteen ina Yusuusf Yey.
Md. Ex. Wasiirka 1aad
aniga oo kuu soo wada in aan ku weydiiyo laba su'aalood
oo kala ah :
1. Intee in leeg ayaad
rajo ka qabtaa midnimada Somaliland iyo Somalia in ay
soo noqoto?
2. Hogosha roobka
lacagta ah ee idinku helshay Mbigathi goorma ayaad dadka
intiisa kale soo gaadhsiin doontaa?
Labadaydii su'aalood oo
weli taagan ayaad adigi ka shubtay....ma ka fekertay
waxa ku helay iyo meesha lagaa yimid Md. Cali? Ma u
malayn haysaa in uu macalin xumi ku helay? Ma is tidhi
meel khaldan ayaad ka bilawday qorshahaaga oo burkaba
bahal kamaad filaynin?
Waxa aad noqotay ri'
seenyoon oo aan geeso lahayn oo ku dhex jirta riyo geeso
leh....Guri ladqabo ayay kuu gogleen. Waxba magaca ha
eegan ee meesha maamul kuuma yaallo !!!
Waxa aan sir ahayn in
aan kuu sheego in waxaa aad meesha lagu walaaqahayo aanu
soo dhaafi doonin Mbigathi 5ta sano ee la sheegahayo.
Adiga oo keliya ma aha sheekadu. Maalin ba mid ayay
dhisayaan mid kale na way ridayaan. Waxa adiga hadda
kugu soo xiga waa ina Yussuf-Yey. Waa mashruuc inta
meesha joogtaa na waxa ay yihiin khubaro iyo farsama
yaqaano heer sare ah. Ha ba ugu sii darraadeen kuwa aad
ugu yeertaan Dir Woqooyi. Meesha ay ka maqan yihiin ayay
nabadi joogtaa......Miyaan cilmi loo lahayn in laba ay heshiin
karto ee aanay sadex heshiin karin!
Md. Geedi aan ku siiyo
talo walaalnimo :
1. Iskaga dhex bax dadkan
aydaan isku lugta iyo laabta ahayn.
2. Waxa aad ku biirtaa
kooxda Cabdullaahi Caddow iyo aqoon yahanka qaran ee
facaaga ah.
3. Ha hunguraynin in uu
mar kale ku soo magacabo ina Yuusuf-Yey>
4. waxa aad gacan
siisaa xubnaha baarlamaanka inta xalaasha ah ee rabta
inay kalsoonida kala noqoto ina Yussuf-Yey si dhaqso ah.
Adiga oo aan ahayn nin meesha u soo xoolo doontay ee
raba in uu xal ummadda u keeno oo uu xoriyad gaadhsiiyo.
5. Mar na ba ha
ogolaanin in mar danbe kirli madaxa laguu geliyo gacmaha
na dhiig laguu saaro.
Waxa
beesha caalamka ee been-beenta ah loo soo jeedinayaa
sidan soo socota:
1. Somaalida way ku filan
tahay shirqoolada loo dhigahayay kuna dhammaan mayso oo
xikmadda Illaahay ayay ku taagan yihiin, ku jiraan oo ku
joogaan..
2. Wax kale yaan naloo
qaban annaga ayaa isku filan haddii aad naga qabataan
inta maanta ku sugan Mbigathi/Nairobi/Kenya. Waxa aanu
idiin sheega haynaa in ay kuwaasi yihiin sababata
balaayada keliya ee haysata ummadda Somaliyeed.
3. Waxa aanu soo
jeedinahaynaa in la amro inta halkaas ku sugan
dhammaantood in loo jaro mandaato ama lagu oodo Mbigathi
oo looga dhigo jeel , xabsi lagaga hayo ummadda Somalida
inteeda kale. Dhammaantood na waa in loo aqoon sado
dembiilayaal dagaal iyo ku xadgudbayaal xuquuqda
aadamaha Somaliyeed ( Shanta ) oo ay la wareegto
Maxkamadda Heeg. Waa fidyaha lagu furdaamin hayo ummada
uu waqtigu ka heeliyay.
4. waxa lag
codsanahayaa saxaafadda, warbaahinta xalaasha ah iyo
qalinka aqoon yahanka Somaliyeed in ay taageeraan
fikraddan iyada ah. Ma waxa la eegan kara hayaa in ay
maanta qibladda Somalidu noqoto Ethiopia !
Dadkaan dhawaaqayaa,
Dhulkooda doonayaa,
Hadday u dhiidhiyeen
allaahayow u dhiib.
Aniga oo walaac ku seexday
maxaan walbahaar la toosay. Aniga oo ku haddaarsan sadex
arrimood oo Somaalida ka dhex taagan maanta ( Gbarta yar
ee Samsam Axmed Ducaale xalkeeda, xaaladda Laascaanood
iyo dhug-ma-leh dhulbahante iyo Caleema-saarka C/Yussuf
oo calaamad xun ah) ayay calool xumada Cali Geedi na ii
raacday ....Colaadda Habar-Gidir na hadalkeed ba daah.........Yaa
saatir !!
Mahadsanid.
Ducaale Hadal-wanaaje
II
ducalewanaje2@hotmail.com