19-sano ayaa waagii soo baryaba waxaan maqleynay ama aan arkeenay
wax cusub oo shacabka dhibaato ku ah, markii la riday Max’ed Siyaad
Barre waxaa soo baxay ururo fara badan oo mid waliba uu wato magac
soomaali ah, taasina waxay keentay in lagu abuuro dagaalo fara
badan. Markiiba waxaa is qoomay ururka USC gaar ahaan Gen. Caydiid
iyo Cali Mahdi Max’ed, iyadoo aan waxba la hubsan ayaa shab la is
yiri, waxaana halkaasi ku dhintay kumanaan kun oo Soomaaliyeed,
waxaana ku barakacay dad kale oo fara badan, mid waliba markaad
weydiisid ujeedada dagaalka qumanihiisa ayaa qoorta ugu jira. Odey
ka soo jeeda gobolka Hiiraan ayaa wax laga weydiiyey dagaalkii dhex
maray Caydiid iyo Cali Mahdi, waxa uuna ku jawaabay “Caydiidna gar
leh Calina gar leh”, waxa uuna soo yeeray ereygaani xili uusan
bilaaban dagaalku oo labada dhinac loo kala dabqaadayey, markii uu
dagaalkii uu bilowday ayaa haddana waxaa la weydiiyey Odeygii sida
ay xaaladda markaan ku hayso, waxa uuna ku jawaabay “Kulleyl iyo
qabow midna iguma hayso”, iyadoo aan laga qoomameeyn wixii dhacay
waxaa yimid ciidamadii uu Mareykanku horkacayey, waxaana bilowday
dagaal u dhexeysay taageerayaashii Gen. Caydiid iyo Ciidamadii
Mareykanka, iyadoo aan waxba layska weydiin wixii ku dhintay
dagaalkii Caydiid iyo Cali Mahdi dhex maray ayaa haddana waxaa la
galay dagaalkaa cusub oo ay ku dhinteen dad fara badan oo Soomaali
ah oo hor leh, waxaa kaloo iyana Garka la isku geliyey Gen Caydiid
iyo Cismaan Caato waxaana ku nafwaayey Boqolaal Soomaaliyeed waxaana
taa loogu sii gudbay qabqablayaal dagaal oo labo labo la isaga hor
keenay, oo mid waliba uu isla saxsan yahay, waxaan halkaasi iyana ku
dhintay kumanaan Soomaaliyeed iyadoo kuwo kalena ay ku dhaawacmeen
oo ilaa iyo hadda ka muuqato diiftii iyo Dar xumaddii uu dagaalku
reebay, wax la is hardiyo oo la is weeraro natiijadii waxay noqotay
in Muqdisho ay gasho kala qoqobnaan oo la isku socon waayo.
Magaalada Muqdisho waxaa u soo haray qabqablayaal oo intooda badan
isku aragti noqday, mid waliba markii uu soo bandhigay hubkiisii oo
la isku darsaday ayaa waxaa u soo baxday in cidina aysan maanta hor
istaagi Karin, waxayna ku dhawaaqeen urur ay kugu magac dareen
(Ururka Argagixiso la dagaalanka), waana la ogaa meeshii ku
dambeeyeen, waxaana isku kaashaday shacabka iyo Maxaakiimta
Islaamiga ah, waxaana la helay lix bilood oo nabad ah, iyadoo Alle
aan looga mahadcelin ayaa waxaa dhacday in dalka ay Dowladdii
C/llaahi Yuusufu ku soo hogaamisay ciidamaddii Xabashida, waxayna
kala tureen Maxaakiimtii Islaamiga, waxaana Muqdisho ka bilowday
dagaal ku dhifoo ka dhaqaaq ah, waxaana ku dhintay dad fara badan oo
Soomaaliyeed, iyadoo ay ku barakaceen malaayiin Soomaaliyeed, hase
yeeshee shacabka oo ay ka muuqato Daal fara badan ayaa waxay maqleen
in Sheekh Shariif uu noqday Madaxweynaha Soomaaliya, waxayna dadka
intiisa badan qalibiga geliyeen in dhibaatada lag bixi doono., balse
arrintu waxay noqotay ka daroo Dibi dhal, oo dowladdii Sheekh
Shariif waxaa ku kacay kooxo Islaamiyiin ah oo ku tilmaamay in ay la
mid tahay tii C/llaahi Yuusuf.
Sheekh Shariif Dowladdiisu waxay noqotay middii ugu horeysay oo
ogolaato in dalka lagu dhaqo Diinta Islaamka, waxaan maqli jiray in
la yiraahdo “114-ta Qur’aanka ayaan aqaan waxaa ku filan kaa
akhrisan mayo”, waxaana muuqata in taasi ay maanta hor taagan
Shariifka. Dadkana Soomaaliyeedna niyadda kuma haynin in dagaal uu
dhex marayo Dowladda Sheekh Shariif iyo kooxaha Mucaaradka, hase
yeeshee si fudud ayaa ciidamadii Maxaakiimta ee raacsanaa Dowladda
loogala wareegay goobo ku yaala Magaalada Muqdisho iyadoo dagaal uu
sidaasi ku bilowday, waxaana mar kale Muqdisho ka barakacay
kumanaankun oo Soomaaliyeed oo raadinaya meel ay uga nabadgalaan
dagaalka ka soo cusboonaaday Muqdisho.
Xaqiiqdii marka la fiiriyo sow arrintu uma muuqato Hadba Nooc
Shaatiyo Badan, waxayna inta badan dadka Soomaaliyeed dhibaatada ka
jirta Soomaaliya dusha ka saareen faragelin shisheeye. Sheekh
Shariif markii hore waxaa la dhihi jiray waa wadaad mayal adag,
kadibna waxaa soo baxday in la yiraahdo waa wadaad qunyar socod ah,
taasina waxay keentay in uu si fudud ku fuulo kursiga
Madaxweynanimada Soomaaliyeed. Isteerinka Soomaaliya oo beesha
caalamku ay garwadeen ka tahay ayaa maalmahan waxaa ka soo yeeraya
hadalo ay ka muuqato dabacsanaan oo ah in liiska aragagixisada laga
saaro raga dowladda ka soo horjeeda taas oo loo macneeyey in uu ugu
weyn yahay Sheekh Xasan Daahir Aweys, waxayna Beesha caalamku
qorsheyneysaa in ay mar kale yiraahdaan ‘ha laysugu yimaado shir
qaran oo Soomaali loo qabto’ si markiiba Sheekh Xasan ugu dayaan
madaxtinimada Soomaaliya, isla markaana looga hor keeno raga haatan
ay is taabacsan yihiin, waxayna xaaladdu u eg tahay in Soomaaliya
waqtiga looga dhameeyo meerta noocaas ah oo ku dhisan in hadba
Shaati loo geliyo koox halka dhinaca ka soo horjeeda loo tusinayo in
shaatiga ay iyagu ku haboon yihiin oo laga faramoojinayo, waxaa
mucaawino loogu keenaa hub iyo rasaas noocyo kala duwan leh si iyana
shaatiga u soo ceshtaan, waxaase nasiib daro in dhinacyada
Soomaaliyeed ee iska soo horjeeda garan la’ yihiin ilaa iyo hadda
sartu meesha ay ka qurunsan tahay isla markaana aan mansab lagu
gaari Karin Dhiigga ummadda oo la daadiyo, waxaana ka dhisan in
kursiga loo wada cararayo uusan macquul aheyn in lagu wada fariisto
ma qura, balse uu u baahan yahay in la kala sugto. Soomaalida iska
soo horjeeda waxaa tusaale ugu filan in 19-sano oo ay is dilaayeen
haddii kala sugan laahaayeen Kursiga loo laayey ummad badan in ilaa
iyo hadda ay isaga dambeyn lahaayeen madax badan oo ka kala tisan
dhamaan dhinacyada ku hardamaya Siyaasadda Soomaaliya, balse taa
bedelkeeda, waxayna Soomaalidu wanaag u aragtay in Shaati duluf ah
loo geliyo mudo cayiman, kadibna lagala wareego isagoo jeexjeexan oo
xitaa kan markaa gacanta ku dhigay uusan dhaxan ka celineynin,
waxaana shaarkaa jeexjeexan u dhigma Kursiga Soomaaliyeed ee loo
dirarayo, muxuu dhaamaa Shaati duluf haddii 19 sano loo
dagaalamayey, bal adiguba ka fikir waxa uu dhaxan kaa celin karo
shaati noocaa.
Guntii iyo Gebagabadii, Xaaladda Soomaaliya waxay weli dhex
maquuraneysaa meel xasaasi ah, waxayna Soomaalidu tiraahdaa “Jiilaal
iyo Ninkiisu waa legdamaan, hadaba kay naagtu u hiiliso ayaana
guuleysta”, waxaana iska muuqata in Shacabka Soomaaliyeed ay ku
xiran tahay mustaqbalka Soomaaliya, haddii ay iyagu u istaagaan oo
runta ka dhawaajiyaan, waxaa hubaal ah in Soomaaliweyn dib loo heli
lahaa meeshana ay ka bixi lahayd (Hadba Nooc Shaatiyo Badan).
Daabaco
Boggan | Print
W/D:
Amiin Yuusuf Khasaaro
