Sawaaxilaga oo Raba Sidii Saancaddihii iney Soohdimo Cusub noo
Sameeyaan
C/Waaxid
C/hi Khaliif
London, UK
cabdulwaxid@hotmail.com
Ilaah mahad leh. Nabadgelyo iyo naxariis nabi Muxamed korkiisa ha
ahaato.
Waxaan aad igu mahadcelinayaa bogga interneka, SomaliTalk oo mar
kasta iska xilsaara iney dadka u iftiimayaan waxyaalo badan oo ku
saabsan diinta, dalkeenna iyo dadkeenna. Waxay daboolka ka qaadeen
suntii lagu duugay Soomaaliya. Waxay na soo hordhigeen shirkado maafiyo
ah oo sheegtay inay heshiisyo la galeen “dowladda dhexe” ee markaas
jirta iyo maamul goboleedyo. Waxaa ka mid ah shirkadahaas mid sheegatay
magacan:
Horn of Africa Free Zone Authority (HAFZA) micnaha Shirkadda
Aagga/Ganacsiga Xorta ah ee Geeska Afrika. Waxay sheegtaan iney
Australia ka diiwaan gashan yihiin ayna heshiis la galeen Puntland. Weli
boggooda internetku waa furanyahay waxaad ka fiirin kartaan:
www.hafza.com. Kuwa
sheegta iney shidaal ka baarayaan Soomaaliya oo heshiis la galay
dowladda dhexe iyo Puntlandna waa jiraan.
SomaliTalk ayaa si waafi ah nooga kaafisay waxa laga filan karo
arrinta xadeynta badaha iyadoo waddan kasta laga codsaday inuu soo
gudbiyo halka uu rabo in loogu dhufto xadka maaddaama la durkinayo
soohdin-badeedda waddan kasta si uu ka faa’iideysto kheyrka badda ee
waddankaasi leeyahay. Marka qof kasta oo Soomaali ah oo waddankiisa
daneynaya wuu ku khasbanyahay inuu akhriyo warbixintaas.
Sida warbixinta SomaliTalk qortay, waxa loo yaqaan “Economic
Exclusive Zone” oo cilmi-baarayaashaas SomaliTalk noo Soomaaliyeeyeen
iyagoo yiri: Aagga Gaarka ah ee Ganacsiga ayaa la rabaa in la durkiyo oo
laga qaado 200 nautical miles oo u dhiganta ilaa 370 Kiiloomitir.
Xisaabtaas SomaliTalk baa noo xisaabisay iyadoo la yaqaan in 1nm = 1.852
mitir lagana dhigayo 350nm oo u dhigma 648 Km ugu dhowaan. Warbixinta
SomaliTalk waxay sheegtay in Yemen iyo Jasiiradaheeda qaarkood kaba
dhowyihiin masaafadaas la leeyahay xaq buu waddanka u leeyahay inuu ku
xisaabtamo. Wixii laga filan karo xadeyntaas cusub waxaa naga shaafiyey
SomaliTalk.
Cinwaanka, Sawaaxiliga waan ku halqabsaday. Waxaa kaloo SomaliTalk
sheegeen in Kenya ay rabo in xadeyn cusub la timaaddo. Waxay soo
bandhigeen warqad uu horay madaxweynaha Kenya u saxiixay isagoo raba
inuu soo durkiyo xadka oo dhankeenna u soo riixo. Waxaa intaas oo dhan
ka daran, waxaa SomaliTalk saxaafadda ka soo xigatay heshiis ay
wadagaareen wasiirka arrimaha dibadda ee Kenya iyo ra’iisulwasaaraha
Soomaaliyeed oo arrintaas ku saabsan. Sida faalladu sheegtay, waxaa loo
qabtay in waddan kasta soo gudbiyo xaddeynta cusub maalinta 13ka May
2009 ama ka hor.
Markaan akhriyey qeybta 4-aad ee Sharciga Qarammada Midoobey ee
Badaha Adduunka kaga hadlayaan xaddeynta Aagga Gaarka ah ee Ganacsiga ee
u dhaxeeya waddamo iska soo horjeeda (sida Soomaaliya iyo Yemen oo kale)
ama isku xiga (sida Soomaaliya iyo Kenya oo kale) wuxuu qodokiisa 74-aad
oo ka kooban afar faqro leeyahay:
“Article74
Delimitation of the exclusive economic zone
between States with opposite or adjacent coasts
1. The delimitation of the exclusive economic zone between States
with opposite or adjacent coasts shall be effected by agreement on the
basis of international law, as referred to in Article 38 of the Statute
of the International Court of Justice, in order to achieve an equitable
solution.
2. If no agreement can be reached within a reasonable period of time,
the States concerned shall resort to the procedures provided for in
Part XV.
3. Pending agreement as provided for in paragraph 1, the States
concerned, in a spirit of understanding and cooperation, shall make
every effort to enter into provisional arrangements of a practical
nature and, during this transitional period, not to jeopardize or hamper
the reaching of the final agreement. Such arrangements shall be without
prejudice to the final delimitation.
4. Where there is an agreement in force between the States concerned,
questions relating to the delimitation of the exclusive economic zone
shall be determined in accordance with the provisions of that
agreement”.
- Xadeynta aagga gaarka ah ee gacansiga ee waddama iska soo
horjeeda ama isku xiga waxaa saameyn ku yeelaynaya heshiis laga
gaaro oo lagu saleynayo sharci caalami ah, sida lagu xusay qodobka
38-aad ee xeerka u degsan Maxkamadda Garsoorka ee Caalamigaa, si loo
gaaro xal caddaalad ah.
- Haddii wax heshiis ah lagu gaariwaayo waqti macquul ah,
waddamada is haya waxay u celinayaan arrinta nidaamka lagu qoray
qeybta 14-naad.
- Heshiiska laalan sida lagu xusay baaragaraafka 1-aad, wadamada
is haya, jawi is-afgarad iyo wada-shaqeyn ayey dadaal ku bixinayaan
iney wadagalaan diyaargareyn ku-meelgaar ah oo leh qaab la taaban
karo, waqtiga xaaladda kala-guurka ah, waa ineysan dhaawicin ama
carqaladeyn in la gaaro heshiis kama-dambeys ah. Diyaar-gareynta
noocaas ah ayaa iyadoon cidna khatar ku ahayn noqon doonta xadeyntii
ugu dambeysay.
- Halka uu heshiis ka dhagan-gashan yahay waddamadaas laga hadlayo
dhexdooda, su’aalaha la xiriira xadeynta aagga gaarka ah ee
ganacsiga waxaa lagu go’aamin doonaa iyadoo la raacayo qaanuunkii
lagu heshiiyey.
Sidaan is leeyahay waxaad mooddaa in wasiirka arrimaha dibadda iyo
ra’iisul wasaaraha Soomaaliya kala saxiixdeen faqrada seddexaad. Marka
sida SomaliTalk iftiimisay, in mar horaba Kenya diyaarisay waxay la
rabtay in loo xadeeyo. Waxaa jeebka ugu jira saxiixii
Cabdirahman Cabdishakur Warsame. Sida mar Abuu Koombe la weydiiyey inuu dhameystiro
maahmaahda ah: nin daad qaaday…, wuxuu ku jawaabay: waa ku daayey. Marka
haddii maalmahan aan wax la qaban ama sheekh Shariif uusan arrintaas
diidin inta goori goor tahay waad aragtaan faqrada 4-aad waxay leedahay
haddii muran dhasho waxaa lagu kala baxayaa heshiiska la isla gaaray.
Haddii ra’iisul wasaaruhu u saxiixay Kenya in wax loo xadeeyo iyadoo
xariiqda xudduuda loo wadayo dhinca Bariga halkii loo wadi lahaa dhinaca
Koonfur Bari ayaa taasi Keeneysaa in Kenya oo dhul hore naga heysatay ay
haddeer qaadato mid kale oo dheeraad ah. Mana noqon doonto arrin
shacabka Soomaaliyeed ku cafin doonaan qofkii ama dowladdii khiyaamadaas
sameysa.
Waxaa taas ka sii daran waxaad mooddaa in burcad-badeeddu sidii horay
loo sheegay u shaqeynayaan cadowga Soomaaliyeed. SomaliTalk waxay
sheegtay in waddankii geynwaaya waxa loo xadeynayo aan hadhow la
tixgelin doonin. Sida muuqata Soomaaliya diyaar ma aha xitaa sida
warbixintu sheegtay qolyaha dowlad-ku-sheegga ahi waxba kama oga
arrinta. Haddii Yemen la timaaddo in loo calaamadiyo 640Km waxaan shaki
ku jirin in iska daa baddee ay bariga calaamaddu soo gaarayso maxaa
yeelay wey ka dhowdahay masaafadaas. Ma filayo Yemen iney intaas oo dhan
hesho laakiin waxay rabtaa in qaadato marinkaas intiisa badan. Maxaa
dhici kara? Sida SomaliTalk sheegtay waxay ka kireyn kartaa shirkado ama
Maraykanka. Marka annagoo soo taagan baa baddeenii la qaatay. Bal qiyaas
qiimaha Soomaaliya adoo lagaa qaadatay marinkaas qiimaha leh iyo
kheyraadkii baddaada? Waxaa horay loo sheegay in Kenya shidaal ka
baareyso meel u dhow xad-beenaadka hadda. Waxaa dhici karta sida la
sheegay in shidaalka baddeenna la soo galay. Marka sidii ugaarsade ayey
shidaalka dabojoogaan.
Sida warbixinta SomaliTalk sheegtay waxaa dhici karta in arrintu
aysan Kenya iyo Yemen keliya ku ekaane ay dhici karaan iney soo
baxaan jasiirado kale oo wax nagu heysta. Marka intaan is
ceyrceyrsaneynay baa badaheennii la sumeeyey, shirkado iska
sheegteen in heshiis lala galay, haddeerna waddama kale rabaan in
sidii Soomaaliya horay dhul looga boobay iney haddeer mid cusub naga
goostaan. Marka wixii intaas oo sano laga baqayey maantaa la hayaa.
Imisa jeer baa la lahaa war Kenya iyo Jibuuti kheyr ma soo wadaane
maxaa meesha ka soo uraya? Waxaad mooddaa in Maraykanku jeclaa
burcad baddeeda. Dadkii noo damqan lahaa sida Shiinaha, Ruushka, iyo
Hindiya iyagaa maraakiibtoodii khatar la gashay. Marka iyadoo lagu
faraxsanyahay baa Kenya, Yemen iyo ciddii kale ee rabta iney
baddeenna qaadato la siinayaa. Marka humbuburo libaax bey soo wadaa.
Marka burcad-badeedda iyo dowlado-gacan-ku-rimis ah ayaa noo keenay
in baddeennii loo soo dhigtay.
C/Waaxid
C/hi Khaliif
London, UK
cabdulwaxid@hotmail.com
Ma Salaaddii
Roobdoontaa Nagu Fillaan Weyday Markaasaan Soon ku Darsannay
..
Akhri
Daabaco
Boggan | Print
