Wararkii ugu Dambeeyey iyo Faahfaahin ku saabsan la haystayaasha Saraakiisha Faransiiska .

Iyadoo maalintoo doraad ahayd Hotel Saxafi laga afduubtay labo sarkaal oo ka tirsan Nabad-Sugida Wadanka Faransiiska ayaa waxay arrintaasi walaac ku abuurtay Dowladda Faransiiska oo haatan wada dadaalo ay ku dooneyso in lagu soo daayo labadaasi nin ee Faransiiska ah ee u yimid in ay tababar siiyaan Ciidamada Dowladda Federaalka.

Afduubkaan oo ah kii ugu fududaa ee laga fuliyo Magaalada Muqdisho ayaa waxay noqoneysaa dharbaaxadii labaad ee ku dhacday Dowladda Federaalka marka laga soo tago qarixii lagu dilay Wasiirkii Amniga ee Dowladda Federaalka Cumar Xaashi Aadan, waxaana la xaqiijiyey in Dowladda Federaalka ay raggaasi marti u ahaayeen, balse Hotel Saxafi looga diiwaan geliyey in ay yihiin rag Joornaaliistayaal ah oo doonaya in ay eegaan Xaaladda Soomaaliya.

Dowladda Feransiiska oo lagu yaqaano in ay xoog ku soo furato ayaa haatan u muuqan in arrintaasi ay suuragal ka tahay, maadaama ragga haysta yihiin kuwo aad u hubeysan oo xitaa wata Gawaaridda Dagaalka, waxaana la sheegay in ay Dowladda Faransiiska dooneyso in arrintaasi lagu dhameeyo si wada hadal, hase yeeshee Xarakooyinka Xisbul Islaam iyo Shabaab ayaa iyagu si aad ah uga soo horjeeda Dowladda Federaalka iyo waliba Ciidamada Shisheeye, ilaa iyo haddana ma jiraan wax war ah oo ka soo baxay labadaasi dhinac oo ku aadan labada nin ee la afduubay, hase yeeshee ragga afduubay labada nin oo sideed nin ah ayaa la sheegay in iyagu aad u doonayaan in ay lacag ku helaan labadaasi nin, waxaana jira warar sheegaya in ay ragga afduubka gaystay horey uga mid ahaayeen kooxaha Burcad Badeedda, waxaana la sheegay in ay dhowr jeer heleen Lacago madax furasho ah, waana midda sahashay in si fudud ku afduubtaan saraakiishaas ka socday Wadanka Farasiiska.

Goobta lagu haysto labadaasi nin ee Faransiiska ah ayaa lagu waramay in ay si aad ah u joogaan ciidamo aad u hubeysan, waxayna wararka qaar sheegayaan in laga cabsi qabo in ay isku dhacaan Ururka Xisbul Islaam iyo Al-Shabaab, maadaama Al-Shabaab rabaan in raggaasi loo soo gacan geliyo, halka wararka dhinaca Xisbul Islaam ka imaanaya tibaaxayaan in Xisbigu doonayo in arrinta lagu dhameeyo qaab madaxfurasho ah.

Wasiirka Arrimaha Gudaha oo ciidamo ka tirsan kuwiisa horey loogu eedeeyey in ay ka dambeeyeen afduubka labadaasi nin ayaa isagu waxa uu sheegay in arrintaasi tahay mid aan sal iyo raad toona laheyn, isagoo sheegay in ragga wax afduubtay yihiin kooxo burcad ah oo mooryaan ah, waxaa kale oo uu sheegay in Dowladdu ku jirto dadaal ah sidii lagu soo deyn lahaa raggaasi. sidoo kale Gaarogii Teknikada ee ka qaybgaley Afduubkaas raggii saarnaa haatan ay ku xiran yihiin Xarunta Madaxtooyada hase yeershee waxaa mar dambe la ogaadey in Raggi afduubka geystey ay sireen Ragaasi waayo ayey leeyihiin dadka qaar ma soo aadeen Xarunta Madaxtooyada haddii uu qayb ka ahaa Afduubkaas oo raggii qorshaha watey bay raaci lahaayeen

Dowladda Faransiiska ayaa waxaa la sheegay in ay kullan deg deg ah isugu yeereyso Midowga Yurub si looga arrinsado arrinta labadaasi nin oo ka tirsan nabadsugida wadanka Faransiiska, waxaana la sheegay in xiriir uu dhex maray Dowladda Faransiiska iyo Dowladda Federaalka Soomaaliya oo ku aadan sii loo siideyn lahaa raggaasi.

"Dowladda way fududeysatay raggaasi ee ma aheyn in ay dejiso Hotel ay dad rayid ahi leeyihiin, ee waxay ahayd in ay dejiso xarunta Madaxtoonyada" ayuu yiri afhayeen u hadlay wasaaradda arrimaha dibadda ee Faransiiska, waxaana laga yaabaa in Midowga Yurub uu dib u dhigo deeq loogu talagalay Dowladda Federaalka arrimo la xiriira afduubka raggaasi. sidoo kale shacabka Faransiiska iyo Xisbiyada Mucaaradka ayaa ku cadaadinaya Madaxweynaha in uu is Casilo

Rag xiriir la leh Afduubayaasha ayaa waxay sheegeen in saddex arrimood lagu haysto raggaasi, iyagoo midda koowaad ku sheegay in rag Soomaali ah oo burcad badeed ah ay ku xirxiran yihiin dalka Faransiiska kuwaas oo la doonayo in raggaan xiran lagu bedesho, sidoo kale waxaa lagu waramayaa in kooxaha Islaamiyiinta ah aad uga caroodeen hadalkii ka soo yeeray Madaxweynaha Faransiiska oo uu ku aflagaadeeyey Xijaabka, waxaa kale oo la sheegay in raggaasi lagu doonayo in lagu helo Malaayiin Doolar.

Ciidamo ka tirsan kuwa Faransiiska oo wata labo markab oo ku dagaalka ah ayaa waxaa la sheegay in ay soo gaareen Xeebaha Soomaaliya, kuwaas oo doonaya in ay gacan ka gaystaan sidii lagu sii deyn lahaa raggaasi, hase yeeshee waxaa lagu waramay in Mas'uuliyiin ka tirsan Dowladda Faransiiska ay xiriir la soo sameeyeen Guddoomiyaha Xisbul Islaam Sheekh Xasan Daahir Aweys ayna kala hadleen sidii lagu sii deyn lahaa raggaas Faransiiska ah. isku soo wada duuboo afduubka loo gaysanayo dadka shisheeyaha ah ayaa si weyn u soo kordhay waqtiyadaan dambe, kaas oo laga helo malaayiin Doolar.

W/D Amiin Yuusuf Khasaaro
E-Mail amiinkhasaaro@hotmail.com

Faafin : SomaliTalk.com | July 17, 2009