Ilaah baa mahad leh. Nabadgelyo iyo naxariis nabi Muxamed korkiisa ha
ahaato
Horudhac.
Waxaa ii suura gashay in aan waraysi dhinacyo
badan taabana aan la yeesho wariye C/raxmaan
“Taysiir” oo ka mid ah wariyaasha somaliyeed ee
dalkii Hooyo isaga soo hayaamay, C/rahman
“Taysiir” waxa uu ka mid yahay wariyaasha aan
aad u
xiiseeyaa Qoraaladda uu qoro. Waxaana sharaf ii
ah in aan wariye Taysiir aan wareeysigan la
yeesho.
Tariikh Nolaleedka wariye Taysiir.
Abdiraham Sharif Mohamed (Taysiir), waxa uu
ku dhashay isbitaalka Hooyada iyo Dhallaanka ee
Banaadir, ee magaalada Muqdiso, July 16,
sannadkii1986kii, Hooyadiis waxaa lagu
magacaabaa Faaduma Muxumed Maxamuud (Faadumo
Siraad), waxaana ay wada dhasheen 6 walaalihiis
ah oo da’ ahaan uu isagu u dhaxeeyo, 3 ka wayn
iyo 3 ka yar.
Waxbarashadiisa:
Waxaa uu ku barbaaray isla mar ahaantaana uu
ku waxbartay magaalada Mogadishu, Dugsi
Qur’aanka waxaa uu ku dhigtay Degmada Hodan
Gobolka Banaadir, waxbarashadiisa aasaasiga ahna
wuxuu ku qaatay isla magaalada Muqdisho.
Dugsiyo gaar loo leeyahay (Private schools)
ayuu sidoo kale ka soo bartay luqadaha Arabic
iyo English-ka.
Taysiir iyo ku soo biiridiisii bahda
Warbaahinta
Abdirahman Taysiir intii uu ku jiray
waxbarashadii aasaasiga ahayd ayuu aad u
jeclaaday mihnadda Saxaafadda, wuxuuna jeclaa
inuu barnaamijyo ka hor akhriyo ardayda marka ay
ku jiraan safka ka hor inta aanay galin
fasalladooda, sidaa daraadeed wuxuu ku fikiray
inuu la ambaqaado bahda Saxaafadda (Codka
arooryaad) sannadkii 2003 ayuuna ka mid noqday
ardaydii saxaafadda ku baranaysay Naadiga
Saxaafadda Soomaaliyeed ee Mogadishu (Somali
Journalist Club).
“Warfaafinta waxaan dareemay inay tahay
xirfad ka qeyb qaadata wacyi galinta, waxbaridda
iyo madadaalinta Bulshada, qofka ka hawlgalana
uu magac iyo sumcadba ku helayo haddii uu
anshaxeeda ilaaliyo” ayuu yiri Abdirahman
Taysiir, oo Diploma Saxaafadeed ka qaatay 2005,
Somali Journalist Club, isagoo doortay qeybta
Audio Visual, (Maqal iyo Muuqaal).
Intii uu culuumta saxaafadda dhiganayay ayuu
bilaabay barashada Computer (Software).
Shaqadiisa Warfaafinta:
Ugu horrayn wuxuu isku dayay inuu shaqo u
doonto Raadiyo Muqdisho Codka Shacabka, oo
markaasi ay ka bannaanayd fursad shaqo, iyadoo
imtixaankii laga qaaday uu keenay natiijada ugu
sarraysay ee 100%, Taysiir wuxuu ii sheegay inay
sare u kacday niyaddii uu mihnadda u hayay, uuna
aad ugu farxay guusha uu gaaray.
“Dhab ahaantii waxay ii noqotay mihnadda
Saxaafadda aan ugu raadis iyo dadaal badanahay
barashadeeda iyo ka shaqaynteeda” ayuu yiri
C/raxmaan Taysiir, oo isagoo si niyad ah aan u
sheekaysanay intaa ku daray, “Waxaa hamigayga ku
weynaa inaan maalin un noqdo shakhsi haybad,
magac iyo sumcad u saaxiib ah oo dadku ay
xushmad iyo qadarin siiyaan, ayna iswaydiiyaan
muuqaalkiisa”.
Shaqada iyo da’ yaraantu xiriir ma
leeyihihiin!?
Tayiir waxaa dhacday in shaqadii uu niyaystay
uu waayo, iyadoo sabab looga dhigay da’diisa oo
yarayd iyo isagoo waxbarasho ku jiray, wuxuuna
ii sheegay inay taasi niyad jabisay isla mar
ahaantaana aanu ku qancin go’aankii maamulka
idaacadda, “Waxay ahayd in ay go’aankaas qaataan
intii aanan imtixaanka galin, laakiin waxaan u
arkay in qof kale booskaas lala doonayay oo
sidaa aan shaqadii ku waayay” ayuu yiri.
Inkastoo ay taasi hankiisii dhaawacday,
haddana wuxuu ku fikiray inuu horay ugu sii
socdo dhabbihiisa, si uu heer uga gaaro mihnadda
uu doortay, bishii May 2005 ilaa March 2006
wuxuu ka tirsanaa Ayaamaha Newspaper oo uu ka
ahaa columnist (Maqaal qore).
Intii uu ku jiray Naadiga Saxaafadda
Soomaaliyeed, ee uu baranayay Saxaafadda, wuxuu
ka qeybgalay tartamo kala duwan oo uu agaasimay
Naadiga, kuwaasoo loo qabanayay ardayda Naadiga,
waxaana marar badan uu ku guulaystay dhinaca
qoraal diyaarinta ee tartamadaas, Eng. Mukhtaar
Xasan Maxamuud oo ah Guddoomiyaha Naadiga
Saxaafadda Soomaaliyeed, ayaa mar kasta ku
dhiiragalin jiray inuu la yimaado hal-abuur oo
uu mar kasta wax cusub diyaariyo taasi oo
keentay in uu hamigiisa warbaahinta uu sare
kaco.
Bishii October 2005 waxaa ay BBC World
Service Trust, ka bilawday magaalooyinka
Muqdisho, Hargaysa iyo Boosaaso, wargays lagu
magacaabayay Codka Suxufiga, kaasoo loogu
talagalay Wariyayaasha Soomaaliyeed meel kastoo
ay joogaan in qoraalladooda lagu soo daabaco,
muddo 6 bilood ah oo uu wargayskaasi shaqaynayay
wuxuu Taysiir ku soo qoray maqaallo iyo
dhacdooyin, isagoo qaab madaxbannaan kula
shaqaynayay (Freelance journalist).
6 April 2006, wuxuu la hawl bilaabay
Wargayska National Post oo uu ka noqday
Assistance Chief In Editor (Kaaliyaha
Tifaftiraha), wargayskaas oo ka soo baxayay
magaalada Muqdisho, hawlihii uu ka qabtay waxaa
ka mid ahaa qoraalo diyaarin, samayn warar,
Layout iyo design oo ah qeybta naqshadaynta ee
wargeyskaasi, oo ahaa nuucii ugu horreeyay oo
qaab caalami ah u samaysan kana soo baxa
magaalada Muqdisho.
C/raxmaan Taysiir waxa uu dib uga hawl
bilaabay Raadiyo Muqdisho, isagoo ka shaqaynayay
xilligii ururka SNA uu gacanta ku hayay
raadiyahaas (Codka Shacabka) Maxkamadaha
Islaamiga ay gacanta ku hayeen (Codka Ummadda)
iyo markii ay dowladda Federaalka maamulaysay
raadiyahaasi, (Codka Jamhuuriyadda) ilaa markii
dambe uu ka mid noqday Wariyayaashii ka soo
barakacay gudaha dalka, kaddib markii ay la soo
gudboonaadeen xaalado ammaan-darro, kuwaasoo
yimid magaalada Nairobi ee dalka Kenya.
Hadda waxa uu la shaqeeyaa Wargeeska Somali
National Post, sidoo kale wuxuu qoraallo u
diyaariyaa si madaxbannaan Majaladda Aaminews oo
saldhigyo ku kala leh dalalka Canada iyo Kenya.
Waa aasaasaha website-ka
www.qalbideeqa.com oo ka mid ah shabakadaha
Af-Soomaaliga ee ka hadla arrimaha bulshada.
C/raxmaan Taysiir waxa uu mudnaan gaar ah ka
helay Naadiga Saxaafadda Soomaaliyeed oo hadda
uu xubin ka yahay, kaddib markii la arkay
dadaalkiisa iyo sida uu u jecel yahay hawsha
warfaafinta, waxaana Naadiga ku midaysan
Saxafiyiintii hore ee Soomaaliya iyo kuwa cusub,
iyadoo ay ka soo aflaxeen warfidiyeenno badan,
kuwa kalena ay haatan wax ku bartaan.
Taysiir wuxuu aad u jecel yahay qoraalka,
isagoo horay u qoray sheekooyin jaceyl oo ay ka
mid yihiin: Eed Ma leh Qof Kuu nugul, Silicii
Jacaylka iyo safarkii Hargaysa, sidoo kale wuxuu
diyaariyay maqaallo lagu faafiyay Website-da
Soomaalida oo
www.somalitalk.com ay ka mid tahay iyo
idaacadaha magaalada Muqdisho.
Akhri qaybta 2aad...
Weriye Abdiraham Sharif Mohamed (Taysiir)
waxaad kala xiriiri kartaa Emailada hoos ku
qoran:
taysiir55@hotmail.com
taysiirka@gmail.com
mrtaysiir@yahoo.com