WT. Maxamuud Axmed Cabdalle (Abwaane Shiine)
May 24, 2012
Email: mabdalle@gmail.com

HORDHAC: Dhammaan ummadda Soomaaliyeed salaan baan halka uga dirayaa.

Gabaygan TIIRAANYO QARAN—TABO MAAMMUL GOBOLEED MIYAY TALO QABIIL KEENTAY? Waxa igu kallifay markaan arkay xaaladda dalka Soomaaliya ku sugan yahay maanta, siiba Maammul Goboleeddada Soomaaliya look ala jarjarayo.

Waa farriin ku socota Soomaali meel kasta oo ay joogto. Afeef: waxan ku soo qaatay gabayga taariikho dhacay, ee marna igama aha inaan cid aflagaaddaynayo. Akhris wanaagsan. Mahadsanidin.

Wuxu Yiri:

1. Tixda Gabay ma tiriyeen haddaan laygu taawiline
2. Waxan tebey bulshada uma tebsheen tay temmediyaane
3. Mana toosiyeen meerisyadaan ugu tiraabaayo
4. Tusmadana ma raacsheen sidii ehelu tawxiidka
5. Haddaan Eebbe tiisa igu ladhin kuma tayiiseene
6. Iga tuunsha waataad murtida igu taqaanneene
7. 
   
8. Toddob da’ay sidiisoo kalaan tibibixleeyaaye
9. Toomaha ha gaadhiyo warkani taagga Ceeriyahee
10. Boorama tilmaan haw noqdiyo Saylac taalladiye
11. Tubtu waa Hargeysada halkuu Timacaddoow yiillee
12. Burco hawgu taaheen warkaa Tuhunla’aaneede
13. Sool taako-taako iyo qoys ha ugu tiileene
14. Durba haw tafoo laasqoriyo Teedka Bari aaddan
15. Talaadaha Garoowiyo Nugaal Taarku haw tago
16. Gaalkacayo toon Lagu shiriyo Mudug ha taabteeye
17. Galguduudda beeshii taxnayd tahan ha saameeyoo
18. Tiiraanyo Hiiraan gashiyo dhiillo haw taro
19. Xamar aaladaha toosiyaa  ha u tallowsheene
20. Tabaalada Markiyo Jawhar subax ha u tafsiileene
21. Baydhabo ha tabantaabsadoo Gedo ha taageerto
22. Ha u tarantarreeyee warkani tan iyo Kaambooni
23. Shabakadaha ha isugu tebsheen toban malaayiine
24. 
    
25. Afartaa intaan ta’da ka deyey tiir Ma qabadsiiyey?
26. Sahankiyo tilmaantii miyaan taana ka habawshey?
27. Toobiyaha codkii tiirri gabay toy ma ku hagaajey?
28. Ma labaantan bay taagantahay turug Habaas weyn leh?
29. 
    
30. Ma tanaad daryeelliyo dalbaa taani laga dhaarshey?
31. Ma ragbaa takoorimaha iyo tuurta laga fuulay?
32. Ma tafooley bay wada noqdeen tacab qasaarkooda?
33. Tumbulkaa Zenaawi ah miyaa wada tallaabaaya??
34. Tilmaamaha maways kaga midbaa tiilka madaxweyne??
35. Tawdhaq iyo liid tiimbaraha tiisa ugu jiida
36. Ma tafaafuleen qarankayagii teero dhiganwaagu?
37. Maandeeq taharahoo engegey taana Ma u joonay?
38. Tabo mammul goboleed miyay Tala qabiil keentay?
40. Afartaa ta’dii gabay miyaan tiirka ka habowshey?
41. Wexeer igu tallaalani qalbiga Ma idin tiiraamay?
42. Ma taftaafay boogtii  xogbaan tiixayaa weliye?
43. Soomaalaay tol baas haybiyaay tooggo kaa maqane
44. Tafaraaruq badaneey adaan tii san garanayne
45. Talo urursan iyo qaranimadii tuuray waa hore eh
46. Adigaa qabiil tamar bidoo dawlad taabicine
47. Goortaad kun magac Oo tayala calammo taagtaagtey
48. Goortaad tanaa tayda iyo qola-qolaw tooxday
49. Ku taxaabyey cadawgii kolkaad tudho Aqoon weydey
50. Tabo mammul goboleed miyay Tala qabiil keentay?
52. Lagu tacab qasaar odayadii Taabay dhaxalkiiye
53. Talo kuma heshiiyaan haddaan gaal tukubinayne
54. Inta taashka madaxweyne xidhan waaba tirabeele
55. Nacas waliba taab meel kolkuu Reer ku taagsadaye
56. Shabaab toorabooriyo ka yimi teroris hoygiisa
57. Argagixiso tii Qaacidiyo taliyey beydgaabe
58. Soomaali waxa tacaddi iyo tabalo loo geystey
59. Taqa beelku waa Waxa qalbiga iga turxaamayne
60. Sida aar tabaadiya miyaan taaha damin waayey?
61. Tammootida gurboodkii miyaa taalla dhinacayga?
62. Ma toolmoontii dihataa ilmadu dhabanaka tooraysay?
63. Taageero li’day miyaan tiicay Sida weyda?
64. 
    
65. Hadba turunturrodkii miyaan tog iska qayraanshey?
66. Tashigii miyaa laabtu gocan leebka igu taagan?
67. Tunka jare inlaygaga xidhana Ma u tar Hayn waayey?
68. Sogobyada la toodimay miyaan tooda liqi waayay?
69. Sida boqor bahdii cadowgu tiray madaxa maw taagey?
70. Maanaa Amxaar ii tashaa Tiger baan ahaye?
71. Tortorlaha Tigree maanigaa tuuga Erateerka?
72. Toxobleey Afriikaan miyaan amar ka tuuntuumin?
73. Taan geyo tan cadow doonayiyo tii Rabbi u qaybshay
74. Tallanka iyo dood uun miyaa maanka iga taabay?
75. Tabo mammul goboleed miyay Tala qabiil keentay?
76. Afartaa intaan Ta’da ka deyey tiir Ma qabadsiiyey
77. Toobiyaha miyaan maansadii taani ka habowshey?
78. Ma tilmaamay boogtii xogbaan tiixayaa weliye?
80. Adduunyadu tanaad iyo wacnaan tiigsimaad malehe
81. Nin waliba tagoogtiis kolbaa hugu ka tuurmaaye
82. Rag tun weyn lahaan jiray dunida Oo tirmaa jiraye
83. Taariikhihii hore cilmaad ugu tegeysaaye
84. Tashi Aadan iyo Jaamac Nuur seegay Lagu taabye
85. Waxa laysu tebiyaa geddii loo tummaatiyaye
86. Shaloon taag lahaa Talo mahayn taashka waan sidaye
87. Maantoo talada aan hayana tamar la’aantay dheh
88. Tiraabkiisii baa Ina Galaydh kuu tusaala ahe
89. Tabo mammul goboleed miyay Tala qabiil keentay?
91. Taariikhdu buug weeye Aan laga tallaabayne
92. Taxanaha xusuustale haddaan tiro ka soo qaato
93. Ninba kaydka Waxa loogu tiray baa u taal abide
94. Tabo mammul goboleed miyay Tala qabiil keentay?
96. Sida baarqab toojada gugii taani Lagu qoojey
97. Dawaaddoo tikhiyo kuruska Oo tahan ka dheeraaday
98. Dhebiduna tarriiqyaysayoo duudka kaga teeday
99. Doobbada kolkuu tuurayna tays onkoday mooddid
100. Raggii turuqa sheegtee tollaay shalay ku taamaayey
101. Waxay Tamara lahaayeen Raggii qolo ku taageeray
102. Qarannimadii toosnayd Raggii tiirarka u siibay
103. Nimankii amxaarka u tu’shee toogtey sharafteeda
104. Nimankii hub talantaalliyiyo taangiyada doontay
105. Talaala’ayda qaylada Raggii ubadku toosaayey
106. Afka waxay ka soo tuurayeen Tiraba Guubaabo
107. Maansada turaabkaa ka badan Nimankii tookhaayey
108. Tanna dunida Yaa maali jiray tacab ku dhiibaayey
109. Kolkay tay gallaafteen dhacdoo waaqla la istaagay
110. Tabo mammul goboleed miyay Tala qabiil keentay?

DHAMAAD…………………………

Maxamuud Axmed Cabdalle (Abwaane Shiine)
Email: mabdalle@gmail.com