Degmada Baardheere Ee Gobolka Gedo Oo Shalay Galinkii Dambe Ay Dagaalo Ka
Dhaceen Oo Saaka Degan.
Xaaladda degmada Baardheere ee gobolka Gedo oo shalay galab ay dagaalo ku
dexmareen ciidamada Al Shabaab iyo Kuwa kale oo taabacsan Ururka Ahlu Sunna
Waljamaaca ayaa saaka ah mid degan inkastoo ay sii kordhayaan tirada khasaaraha
dagaalkii shalay ka dhacay degmada Baardheere.
Nin u hadlay Ururka Al Shabaab ayaa qiray in nin kamid askartooda uu ku dhintay
dagaalka,kaasoo u nafwaayay dhaawac halis ah oo soo gaaray.
Taliyaha saldhiga Baardheere ee Alshabaab Abuu Shureyn oo aan la xiriiray ayaa
sheegay in ay la waregeen goobihii lagu dagaalamay iyagoo dhinaca kalena sheegay
in ay qaadeen amar deg deg ah oo fiidnimadii xalay ay ku soo rogeen Magaalada
Baardheere ee gobolka Gedo.
Goobaha Ganacsiga ,suuqyada, iyo isku socodka dadka ayaa caadi ku soo laabtay
kuwaas oo u xirmay dagaalkii u dhaxeeyay Al Shabaab iyo Ahlu Sunna Waljamaaca.
Dagaalkii shalay ayaa waxaa uu dhaawacyo ka soo gaaray dad badan 8 ruuux oo ay
kamid yihiin haween gar ahaan haweenay uur lahayd oo xabadi ay haleeshay xiliga
uu dagaalku qarxay.
Qaar ka mid ah dadkii dhaawacmay ayaa loo qaaday dhinaca degmada Diinsoor ee
goboka Baay halkaasoo lagu daawaynayo.
Amaanka iyo nabad galyada degmada Baardheere ayaa maalmihii la soo dhaafay waxaa
ay aheeyd mid uu muran xoogan ka taagnaa taasoo ka dhalatay Culumada Ahlu Sunna
Waljamaaca oo xiligaasi ku adkeysanaysay in ay xusayaan munaasabadda dhalashada
Nabigeena Muxamed NNKH halka Xoogaga Ururka Al Shabaab ay iyana diidanaayeen
iyagoo marar badana amar ka soo saaray in munaasabad nuucaano oo kale ah lagu
qabto Masaajidada iyo gobaha kale ee magaalada Baardheere.
Si kastaaba ha ahatee odayaasha iyo waxgaradka ku dhaqan Magaalada Baardheere ee
gobolka Gedo ayaa haatan waxaa ay ku howlanyihiin sidii loo qaboojin lahaa
dagaalada ka soo cusboonaaday Magaaladaa,iyagoo baaq u jeediyay dhinacyada
halkaasi ku dagaalamay.
Shaqaaqooyinkan ayaa ku soo beegmaya xili Inta badan dalka Somalia laga xusay
dhalshada nababigeena waxa uuna dagalkani noqonayaa kii ugu horeeyay ee ka dhaca
goob munaasabadasi lagu qabanayay inata la ogsoonayahay,
Maxamed Gaarane Aadan
+2525 (0) 996132
+2521 5598706
+254 (0) 722687097
gaarane68@hotmail.com
Faafin: SomaliTalk.com | March 11, 2009
Daabaco
Boggan | Print
