MAP: WARSAXAAFADEED
Cambaarayn Weerarada Loo gaysto Weriyaasha
Agaasime Warbaahineed ayaa la dilay, weriyena waa lagu dhaawacay Weerar ka
dhacay Muqdisho
7 June 2007 2009
Ururka warbaahinta Puntland ee Macaciisa loo soo gaabiyo (MAP) waxaa uu aad uga
niyadxunyahay weerarrada isasoo taraya ee warfidiyeenka lala beegsanayo
Soomaaliya, weerarradaasi oo koodii u dambeeyay lagu shirqoolay agaasime
idaacadeed, weriye kalana lagu dhaawacay.
Ururka warbaahinta Puntland (MAP) ayaa si xoogleh uga naxay dilkii agaasimihii
Raadiyo Shabeelle ee mgaalada Muqdisho. Mukhtaar Maxamed Hiraabe, agaasimhii
Raadiyo waxaa subaxnimadii Axadda abbaarihii 10:35 AM (waqtiga dalka), 7 Juun
2009, ayaa rag hubaysan oon la garan ay ku dileen gudaha suuqa bakaaraha,
degmada hawlwadaag ee magaalada muqdisho isla weerarkaasi waxaa dhaawac halis ah
loogu geystay Axmed Cumar Xaashi (Axmed Taajir), oo tafaftire dhanka wararka ah
ka ahaa Raadiyow Shabeelle.
Laba nin oo bastoolado ku hubaysan ayaa si badheedh ah u weeraray Mukhtaar
Moxamed Hiraabe iyo Axmed Cumar Xaashi (Axmed Taajir), kuwaas oo islagoobta ku
dilay Mukhtaar Maxamed Hiraabe ka dib kolkii madaxa dhowr xabbadood ay kaga
dhaceen madaxa, halka Axmed cumar Xaashi xabbado caloosha kaga dhacay
dhaawacweyni kasoo gaadhay. Allaha u naxariistee Muktaar oo 48 jir ahaa iyo
Axmed oo 41 jir ah, waxa ay iyaga oo wada socday ka soo baxay shir shaqaalaha
idaacaddu ku lahaayeen xaruntooda taaso oo wax kayar laba kilo mitir u jirtay
halka weerarku ka dhacay.
Hoggaanka shabakadda warbaahinta ee Shabeelle ayaa xaqiijiyay dilka agaasimaha.
Guddoomiyaha ahna milkiilaha Shabakadda Shabeelle Cabdimaalik Yuusuf oo jooga
Manchester, dalka Ingiriiska ayaa cambaareeyay dilkaas. Dilka agaasimahooda ka
dib Idaacaddu waxay si ku meel gaar ah u hakisay barnaamijyadii caadiga ahaa
kuna beddshay tebinta aayado qur’aan ah si loogu murugoodo geerida
agaasimahooda, sidaa ay xaqiijiyeen maamulka idaacaddu.
Ururka warbaahinta Puntland (MAP) ayaa ka hadlay cambaareeyayna weerarka lagu
dilay Mukhtaar Maxamed Hiraabe laguna dhaawacay weriyaha kale. Ururku waxaa uu
weerarkaasi ku tilmaamay arrin aad looga walaaco.
"Weerarkani lagu dilay mukhtaar Maxamed Hiraabe waa mid farriin cad u gudbinaya
weriyayaasha noloshooda halista ku jirto ee u dhimanaya waajibkooda dartiis,"
ayuu yidhi Burhaan Axmed Daahir, xoghayaha guud ee ee Ururka MAP "Kani waa dil
qorshaysan oo ujeeddo xumi ka dambayso. Waa halgal lagu aammusinayo codka
weriyayaasha iyo xorriyadda fikirka," ayuu raaciyay xoghayaha MAP. "waa arrin
laga murugoodo oo aan laqaadan karin in la daawado warfidiyeenka sida joogtada
ah loo laynayo. Marar badan ayaa ugu yeernay ururrada siyaasadeed in ay
joojiyaan dilalka warfidiyeenka balse baaqaasi cidina ma dhegeysan," ayuu yidhi
xoghayaha MAP.
"Ma jiri karto sabab siyaasadeed iyo mid diimeed toona oo loo laayo
warfidiyeenka. Dilka warfidiyeenkuna waa dhagar masiibo ah, maxaayeelay
weriyaashu waa dad rayid ah oo kaalin muhiim ah ka ciyaara wargelinta dadweynaha
waqtigan xasaasiga ah," ayuu caddeeyay Xoghayaha Guud MAP.
Uurka MAP waxaa uu u baaqay in la qaado taallaabo caalami ah oo degdeg ah si loo
joojiyo dilalka qorshaysan ee warfidiyeenka ee Somaliya ka dhaca. " waa waqtigii
beesha caalamku ay mar kale indhaha ku qaban lahayd xaaladda khatarta leh ee
maanta ay warfidiyeenku ku sugan yihiin Somaaliya. Waa waqtigii tallaabo degdeg
ah la qaadan lahaa intii lagu ekaan lahaa oo keliya qoraallo lagu muujiyo
murugada iyo cadhada la qabo," ayuu yidhi Xoghayaha Guud ee MAP, Burhaan Axmed
Daahir
Shirqoolka Mukhtaar Maxamed Hiraabe waxaa uu u muuqdaa dhagar abaabulan, sida ay
qabaan joobjoogayaashii dhacdada dilka, waana mid aka mid ah mawjado dilal taxan
ah oo lagu beegsaday warfidiyeenka Soomaaliya ka hawlgala. Mukhtaar waa
weriyihii shanaad ee Soomaaliya lagu dilo tan iyo bilowgii sannadka 2009.
Shabakadda warbaahinta Shabeelle waxay soo martay weerarro naxdin leh oo loo
geystay shaqaalahooda iyo dhismayaashooda muddooyinkii la soo dhaafay, mukhtarna
waa weriyihii saddexaad ee laga dilo Warbaahinta Shabeelle tan iyo bilowgii
sannadkan. Wariyaal badan oo waayo-aragnimo leh nayaa dalka saga cararay.
27kii May 2009, weriye ruugcaddaa ahaa Nuur Muuse Xuseen, oo ku magac dheraa
"Nuur Inji" kana tirsanaa Idaacadda Qur’aanka Kariimka ee Muqdisho ayaa u
geeriyooday dhaawac ka soo gaaray toogasho bareer ah oo loogu geystay Magaalada
Beledweyne ee gobolka Hiiran ee badhatamaha Soomaliya 20 April 2009.
22kii May 2009,
Cabdirisaq Warsame Maxamuud (Gaadaco) oo u shaqaynayay Raadiyow Shabeelle ee
Magaalada Muqdisho ayaa lagu toogtay agagaarka xaafadda Xamar-Bile ee Muqdisho
goosubax ah waqti dagaallo qadhaadhi ka qarxeen subaxdaasi muqdisho kuwaas oo u
dhaxeeyay xoogagga Dowladda Kumeel-gaarka ah iyo kuwa Dhaqdhaqaaqa Mujaahidiinta
Al-Shabaab iyo Xisbul Islaam. Cabdirisaaq ayaa dhinta markii xabbadi ay kaga
dhacday madaxa isagoo ka gudbaya waddada xaafadda Xamar-Bile ee Muqdisho. Wali
ma cadda xabbadda uu dhinta Cabdirisaaq ay ahayd toogasho ula-kac ah iyo in ay
ahayd rasaas habow ah (wiifto).
4tii February 2009,
saddex nin oo bastoolado ku hubaysan dilay weriye si weyn loo shuxmayn jiray
Saciid Tahliil Axmed, agaasimihii of raadiyaha iyo taleefishanka HornAfrik.
1dii January 2009, Hasan Mayow Hasan, oo ahaa weriye u shaqeeya Radio Shabeelle,
ayaa askari ka tirsan dowladda Ku-meelgaar ahi ku toogtay Afgooye oo 30
kilomitir skoonfur ka xigta Muqdisho. Hasan waxaa uu ahaa wariyihii u horreeyay
ee sannadkan 2009 ku dhinta adduunka.
Ururka MAP waxaa isagoo ka murugaysan tacsi udirayaa qoyskii, iyo asaxaabtii
Mukhtaar Maxamed Hiraabe. MAP waxaa sidoo kale uu caafimaad degdeg ah u
rajaynayaa weriye Axmed Cumar Xaashi oo isna dhaawaca uu qabo dartiis la dhigay
Cisbitalka Madiina ee Muqdisho.
Ururka warbaahinta Puntland (MAP) waxaa uu u quuddarraynayaa weriyaasha
Soomaaliyeed in nafhurnimadooda iyo shaqadooda geesinimada leh aanay ku niyad
jabin xaaladaha adag ee soo wajahay. Waxaan rajaynaynaa dedaalkoodu in uu
horseedi doono nabad waarta iyo mustaqbal wacan oo Somaaliya yeelato.
Xoghayaha Guud ee Map:-Burhaan Axmed Daahir.
Waxaa Faafiyey:-Wariye Cabdiqani xayir cali (Cabdiqani Yare),
Faahfaahin dheeraada kala xidhidh +252 90 75 1975
cqxayir@hotmail.com