Warbixin ku saabsan Dagaalada weli ka sii socda Muqdisho
Labadii habeen ee ugu dambeysay waxaa magaalada Muqdisho ka jiray dagaalo iyo
duqeeymo u dhexeeyey Ciidamada Dowladda oo gacan ka helaya kuwa AMISOM iyo
Xarakada Shabaabul Mujaahidiin iyo waliba Xisbul Islaam oo isku dhinac ah,
waxayna dagaaladaani gaysteen khasaarooyin ugu jira naf iyo maal, iyadoo labadii
habeen dagaalkii dhacay isbitaalada magaalada Muqdisho la gaarsiiyey ilaa iyo 80
qofood oo dhaawac ah, waxaana ku dhintay dad gaaraya 16 qofood.
Dagaaladaan oo dhacay waqti habeen ah ayaa waxaa adkaatay sida dadka dhaawaca ah
loo gaarsiin lahaa Isbitaalada, iyadoo Ciidamada AMISOM isticmaaleen
madaafiicdii ugu badneed oo ku dhacday xaafadaha Hodan, Wardhiigley, Hawl-Wadaag
iyo Suuqa Bakaaraha.
Ciidamada AMISOM iyo kuwa Dowladda oo difaacanaya wadada Maka-Almukarama ayaa
dadkii halkaa ka agdhawaa waxay bilaabeen in ay halkaasi isaga barakacaan si ay
uga badbaadaan madaafiicda la isweydaarsanayo.
Duqeyntaan ayaa baryahaan dambe Magaalada Muqdisho waxay ku abuurtay cabsi aad u
xoogan iyadoo kooxaha ka soo horjeeda Dowladda maalmahan bilaabeen in ay
bartilmaameedsadaan xarumaha ay ku sugan yihiin ciidamada AMISOM. Dhinaca kale
afhayeenka Ciidamada AMISOM ayaa beeniyey warar sheegayey in ciidamo AMISOM ah
lagu sumeeyey Magaalada Muqdisho, waxa uuna wararkaasi ku tilmaamay kuwo aan sal
iyo raad toona laheyn.
16-Askari oo u dhashay dalka Burundi ayaa la dhigay isbitaal ku yaala Magaalada
Nairobi waxaana Isbitaalka ku geeriyooday sida la sheegay Saddex Askari, ilaa
iyo haddana lama garanayo waxa ku dhacay Ciidamadaasi , balse afhayeenku waxa uu
ku gaabsaday in askartaasi u dhinteen qaniinyada Cayayaan oo uusan tilmaamin
waxa ay yihiin cayayaankaasi.
W/D Amiin Yuusuf Khasaaro
E-Mail amiinkhasaaro@hotmail.com
Faafin : SomaliTalk.com | July 24, 2009 |