Dibadbax ay ku dalbanayeen Barakacayaasha Afgooye ilaa iyo Xamar in la
joogteeyo Biyaha ay siiyaan CED OXFAM-NOVIB oo ka dhacay deegaankaasi.
Sawirada Halkan ka daawo
Kumanaan barakacayaal ah ayaa maanta inta u haxeysa Afgooye ilaa iyo Xamar ka
dhigay banaanbax balaaran oo ay ku dalbanayeen in la sii joogteeyo biyaha ay
maalin walba ka helaan heydadaha CED OXFAM-NOVIB, waxayna Dibadbaxayaashu wateen
Boorar ay ku qornaayeen erayo ay ka mid ahaayeen:
“Waa in naloo joogteeya biyaha ay na siiso Hey’adda CED, Biyo la’aan waa Nolol
La’aan, Madfac ayaan ka soo orodnee, Biyo La’aan maan joogi karnaa, Hey’adda CED
waa Hey’adda kaliya ee cawisa dadka barakacayaasha ah” iyo erayo kale oo fara
badan.
Sawirada Halkan ka daawo
Hey’adda CED ayaa iyadu taakulaysa dadka soo barakacay, waxayna Hey’addu ka
shaqeysaa ilaa iyo Shan Gobol oo kala ah : Banaadir, Sh/Dhexe, Sh/Hoose, Gal
gaduud iyo Mudug, waxayna dadka siiyaan kuwooda dhibaataysan Baco, Raashin, Biyo
iyo in ay Musqulo u dhisto, iyadoo sidoo kale ay Hay’adda dib u dayactirto
Ceelasha halaabay oo ay Hey’addu dib u qodo.
“Ma Ilaabi doono waxa ay noo qabato Hey’adda CED, waana ku faraxsanahay
dadaalkeeda balaaran ee ay ugu adeegayso shacabka dhibaataysan” ayuu yiri Aadan
Cadde oday lagu magacaabo oo ka mid ah barakacaayasha ku jira Kaamka lagu
magacaabo Jimcaalle Kaam.
Dibadbaxaan ayay dadka barakacayaasha ah waxay ku marayeen Ceelasha ilaa
Afgooye, iyagoo dadku ay ahaayeen kuwo ilaa halkaasi daadsan oo maanta u soo
baxay inay caalamka u gudbiyaan Codsigooda la xiriira inaan Biyaha laga Jarin,
iyagoo soo jeediyay in Hey’adda CED aysan joojin Biyaha ay dadkaasi
barakacayaasha ah siinaysay Mudada 3-da sanno ah.
Hey’adda CED ayaa horay biyaha dadkaasi ugu gaarsiin jirtay iyadoo Booyado inta
u Ijaarto Biyaha ugu dhaamin jirtay sidaasna ugu dhaamin jirtay biyaha, waxayna
howshaan gashay markii ay aragtay bahida dadka ay u qabaan Biyaha.
Goobaha ay saakay barkacayaashu ka dhigeen banaanbaxa ayaa waxaa ka mid ah
Carbiska Afgooye, Lafoole, Xaawo Cabdi iyo Ceelasha Biyaha, iyadoo meel walba ay
isugu soo baxeen dhamaan kaamamkii ku yiilay halkaasi, waxayna dadaku ka
cabanayeen in laga jaro biyaha ay ka helaan Hey’adda CED.
Sidoo kale waxaa dadkii halkaasi ka hadlay ka mid ah Marwo Sacdiyo Cali Guutaale
oo ay walaalo yihiin Fanaanada Caanka ah ee Ruqiyo Cali Guutaale, waxayna
sheegtay inaysan marnaba ilaabi doonin Hey’adda CED siada ay gacanta u siisay
dadka Barakacayaasha ah.
“Hay’addu Biyo kaliya ma siiso dadka, ee waxay sidoo kale gaarsiisay
Barakacayaasha iyo dadka dhibaataysan Raashin iyo inay u qodo Ceelasha duugmay
ama halaabay” ayay tiri Haweenay lagu magacaabo Maymuun oo ka mid ah dadka
barakacayaasha ah, waxayna sheegtay inay Hey’adaasi tahay tan kaliya ee ay ka
helaan kaalmada ugu badan oo ay helaan dadaka barakacaayasha ah.
Barakacayaasha ayaa ahaa kuwo ku qaylinaayay inaan la joojin Biyaha ay ka helaan
Hey’adda CED (Center Four Education and Development), waxayna dalbanaayeen in
Heyaddaasi ay howsheeda biyo qeybinta iyo raashin gaarsiinta dadka
barakacayaasha ah loo daayo, iyagoo muujinaayay inay Hey’adaasi inay tahay mid
ay dadka barakacayaasha ah ku kalsoon yihiin oo aan dhacayn wixii loogu soo
dhiibay dadkaasi dhibaataysan.
Dhanka kale Shucuurta dadka barakacayaasha ah ee dhigaayay Dibadbaxaan ayaa ahaa
kuwo ay ka muuqatay Qiiro weyn, iyagoo codsanaayay in laga ogolaado In
Hey’adaasi howlaheeda loo daayo oo aan lagu faragelinin.
Mahamud Ahmed Hassan
xuurshe114@hotmail.com
UNHCR: Warbixintii ugu dambaysay ee dadka ku barakacay
Soomaaliya oo tiradoodu gaartey 137,000 qof
- (laga soo bilaabo June 1, 2009 ilaa
20 July 2009) Akhri
Faafin : SomaliTalk.com | July 21, 2009 |