Daabaco Boggan | Print

Barnaamijkii Radio Xoriyo
20 July 2009.


Dagaalo iyo weeraro ay ciidanka jwxo ku jabiyeen ciidamada cadowga Itoobi ya

Ciidamada gumaysiga Itoobiya oo waxyeelooyin baahsan iyo kufsi u gaystay dad rayid ah.

Xoghayaha jabhada wadaniga Xoreynta Ogadenya oo socdaal dagdag ah ku tagay U.S.A

Kulan Sadex geesood ah oo ay jaaliyadaha Skandanavian-ku ku yeesheen Gotenbourg-Sweden iyo G/kuxigeenka 2aad ee jwxo oo ka qayb galay.

Barnaamij balaadhan oo aan kasoo diyaarinay kulankaas sadex geesoodka ah.

======================


Dagaalo iyo weeraro ay ciidanka jwxo ku jabiyeen ciidamada cadowga Itoobiya


Ciidamada qalabka sida ee xoreynta ogadenya ayaa sii xoojiyey weeraradii ay ku qaadayeen xeryaha iyo saldhigyada ciidamada gumaysiga itoobiya ee doolka ku jooga ogadenya.


sida uu noogu soo waramay wariyaha Radio Xoriyo ee jida hore 23-06-09 Darisyada oo katirsan degmada Sagag ee gobolka Nogob dagaal ku dhex maray ciidanka qalabka sida ee jwxo iyo ciidamada gumaysiga itoobiya ayaa ciidanka wayaanaha lagaga dilay 2 askari waxaana lagaga dhaawacay 3 kale.

Isla 23-06-09 Tuulada Xaraareey oo ka tirsan gobolka Nogob dagaal ka dhacay waxaa ciidanka gumaysiga lagaga dilay 2 askari waxaana lagaga dhaawacay 1 kale.


Ciidamada qalabka sida ee xoreynta Ogadenya ayaa weerar ku qaaday 24-06-09 ciidan gumaysiga oo ku sugnaa meesha la yidhaahdo Balbalaadh oo ka tirsan gobolka Nogob waxayna halkaas kaga dileen 3 wayaane waxayna kaga dhaawaceen isla goobtaas 5 kale.


28-06-09 Qarjajabo oo ka tirsan gobolka Nogob dagaal ka dhacay waxaa ciidanka cadowga lagaga dilay 9 askari halka 5 kalana lagaga dhaawacay

Ciidamada geesiyiinta ah ee xoreynta ogadenya ayaa weerar ku qaaday 30-06-09 ciidan gumaysiga oo ku sugnaa tuulada Herar Yareey oo u dhow magaalada Baabili ee gobolka Jigjiga waxayna halkaas kaga dileen 2 wayaane waxayna kaga dhaawaceen isla goobtaas 3 kale.

Isla 30-06-09 labo dagaal oo ka kala dhacay deegaanka Tabowga oo u dhow Garbo iyo deegaanka Horo Khaliif oo ka tirsan degmada Sagag ayaa ciidamada gumaysiga itoobiya lagaga dilay 6 askari halka lagaga dhaawacay 11 kale.


01-07-09 Safaari oo ka tirsan gobolka Nogob dagaal ka dhacay waxaa ciidanka cadowga lagaga dilay 4 askari halka 4 kalana lagaga dhaawacay

Ciidamada qalabka sida ee xoreynta Ogadenya ayaa laba habeen oo isku xiga kuna beegnayd 8/9-07-09 weeraro wir ah ku qaaday ciidan gumaysiga oo ku sugnaa tuulada San-Madheedhle oo ka tirsan Galaalshe labadas weerar ayay ciidamada wayaanaha ugu gaysteen khasaarooyin badan oo aanaan weli helin faahfaahintooda.


Laab oo ka tirsan gobolka Shabeele dagaal ka socday maalin dhan ayaa ciidamada cadowga itoobiya lagaga gubay hal Uuraal iyo ciidankii saaraa oo dhan,faafaahinta dhabta ah ee khasaraha loo gaystay ciidamada gumaysiga oo aanaan weli helin ayay warar hordhaca ahi sheegayaa in khasaare balaadhan uu soo gaadhay ciidanka gumaysiga.

13-07-09 Koora oo ka tirsan degmada Awaare ee gobolka Jarar dagaal ka dhacay waxaa ciidanka cadowga lagaga dilay 7 askari halka 12 kalana lagaga dhaawacay



Ciidamada gumaysiga Itoobiya oo waxyeelooyin baahsan iyo kufsi u gaystay dad rayid ah.

25/06/09 Ciidamada gumaysiga Itoobiya ayaa ku xidh xidhay Degmada Qabri Bayax ee Gobolka JIgjiga 30 qof oo shacab ah oo aanaan weli magacyadooda helin 30 kaas qof ayaa lagu soow aramayaa inuu xidhxidhay gudoomiyihii dabaqoodhiga ee aagaas.

25-06-09 Deegaanka Hora Khaliifo ayay ciidamada dhaca loo keenay ogadenya 40 neef oo adhi ah kaga dhaceen Macalin Yuusuf kadib markuu halkaas ka dhacay dagaal kulul oo ciidamada cadowga lagu jabiyey.

01-07-09 Tuulada Diana oo ka tirsan gobolka Shabeele waxay kufsi,dhac iyo xidhay u gaysteen dad shacab ah oo aad ubadan kadib markii lagu jabiyey dagaalkii ka dhacay Hilo Guduudo oo cadowga lagaga dilay 18 sargaal,dadkaas waxyeelada loo gaystay ayaa waxaa kamid ah:

1. Weli Axmed Daahir
2. Xadiis Qorane
3. Cabdulahi Gacma Yare
4. Maxamed Cabdulahi Gacma Yare
5. Cabdi Cabdullahi Gacma Yare
6. Maxamed Xasan Cabdi
7. Ibrahim San Koor
8. Beddel Hudle (Guddomiyihii Tuulada)
9. Maxamed Guulaawe Cali
10. Cabdi Yare Sh Muuse
11. Ceebla Axmed Cabdulahi
12. Ruqiya Cabdulahi Gacma Yare
13. Axmed Qadaafe oo 40 adhi Jar ah laga dhacay kadibna xabsiga loo taxaabay.


11-07-09 Tuulada Dalaad oo ka tirsan gobolka Qorraxay waxay ciidamada gumaysigu ku xidheen:
1. Xaashi Siyaad
2. Xuseen Mursal (Jalwo)

Labadaas nin ee shacabka ah ayaa markii dambe loo qaaday Q/Dhare ilaa iyo hadana lama oga wuxuu xaalkoodu ku sugan yahay.

Xoghayaha jabhada wadaniga Xoreynta Ogadenya oo socdaal dagdag ah ku tagay U.S.A


Xoghayaha arimaha dibada ee jwxo mudane Cabdiraxmaan Sheekh Mahdi ayaa socdaal shaqo oo aan horay loo shaacinin ku tagay magaalada Washigton ee caasimada wadanka Maraykanka halkaas oo ay baryahan dambe kusii qulqulayeen madaxda ururada mucaaradka ku ah taliska Addis Ababa sida gudoomiyaha ururka OLF Daud Ibssa,gudoomiyaha ururka Ginbot 7 Berhanu Naga oo hogaaminaya mucaaradka Axmaarada iyo madaxda jabhadaha Sidaamo iyo Gambella


Socdaalka ay madaxda Mucaaradku ay kujogaan Washington DC, ayaana ilaa hada si toosa ah loo shaacin ujeedadooda rasmiga ah balse warar hoose ayaa sheegaya in ay kujiraan wadahadalo gaar- gaar ah oo ay la leeyihiin Xukuumada Cusub ee Madaxwayne Obama iyo Congresskaba kuwaas oo aan ilaa iyo hadda la shaacin wixii kasoo baxay.

Madaxda ururada mucaaradka ee ku sugan Washington DC ayay wadahadalo u socdaan ay kaga arinsanayaan qaabkii loo waji lahaa burburka kusoo fool leh itoobiya iyo sidii nabad loogu wada noolaan lahaa geeska Africa,wadahaladaas ayaa ONLF kaalin laxaad leh ka cayaaraysaa iyadoo xiligan xaadirka ay jabhada ONLF tahay mida ugu xoog wayn xagga Millitariga Islamarkaasna Siyaasada dibada ee ONLF ay ku talaabsatay horumar aad u weyn

Kulan Sadex geesood ah oo ka dhacay magaalada Gotenbourg-Sweden

Maalintii Sabtida ahayd 18-07-09 ayaa waxaa kulan sadex gooseed ah ku yeeshay caaismada labaad ee dalka Swden Magaalada Gotenbourg jaaliyadaha wadamada la isku yidhaahdo Skandanavian-ka oo kala ah: Norway, Sweden iyo Denmark kulankaasoo uu kasoo qayb galay G/Kuxigeenka 2aad ee jwxo mudane C/qaadir Cadaani oo warbixin dheer siiyay xubnihii ka soo qaybgalay shirka.

Waxaa shirka isugu yimid dad fara badan oo aad u danaynayay arimaha dalka iyo halganka, waxayna ka bogteen warbixintii uu siiyay G/kuxigeenka 2aad iyo qaar kamid ah masuuliyiinta jaliyadahaas oo ka hadlay qaabka wada shaqaynta jaaliyadaha. Waxaa sidoo kale warbixino ka soo jeediyay shirka hooyooyinka halganka oo ka hadlay sidii kor loogu sii qaadi lahaa taageerada loo hayo halganka, arintaasoo u ahayd kulanka gun dhig.
Shirka waxaa sidoo kale ka hadlay masuulinyiinta wakiiladii ka socday jaaliyadaha iyo gudoomiyaha jaaliyada sweden faraca Gotenbourg oo marti loo ahaa mudane Jamaal.

Waxa kaloo goobta shirku ka dhacayay si kadis oo lama filaan ah ku yimid masuul ka tirsan madaxda ururka mucaraadka ah ee wadanka Congo(Ex-Zaire) oo codsaday inuu shirka ka qayb galo oo iska dhex fadhiyay inkastoo aanu fahmaynin afka lagaga hadlayay shirka. Wuxuuna masuulkaasi markii dambe kulanka ka soo jediyey hadal kooban oo ka tarjumayay siday u taageersan yihiin qadiyada Ogadenya iyo inay Itoobiya ka hoos baxaan shacabka Ogadenya oo dowlad badax banana noqdaan. Masuulkan ayaa u sharaxan siduu noo sheegay madaxweyna-nimada wadanka Congo doorashada soo socota, wuxuuna ku amaanay jaaliyada Ogadeenya abaabulka iyo sidaay uga war hayaan dhulkoodii hooyo, isagoo balan qaaday haduu ku guulaysto doorashada soo socota inuu garab istaagayo shacabka Ogadenya ilaa ay xoriyadooda ka hantaan.

shirku wuxu socday maalintaa sabtida ahayd oo dhan ilaa fiidkii 10.00 fiidnimo, iyadoo ay go’aano dhaxagal ah isla meel dhigteen jaaliyadihii ka soo qaybgalay shirka.

Radio Xoriyo

20 July 2009

Cabdinuur Sh. Maxamed

Radioxorio@radioxoriyo.com
Raadioxoriyo@yahoo.com

Radio Xoriyo waxaad ka dhegaysan kartaa Mawjadaha 16 MB iyo 19 MB, iyo internetka Radioxoriyo.com,Ogaden.com Habeenada Talaadada & Sabtida 20:00PM – 20:30 waqtiga
 

Faafin : SomaliTalk.com | July 21, 2009

Kulaabo bogga www.SomaliTalk.com © www.SomaliTalk.com

La soo xiriir: