KHAWAARIJTA SHALEEY & KUWA MAANTA

Ereyga khawaarij oo asal ahaan ka soo jeeda luqadda carabiga ayaa dhowaanahan adeegsadaan qaar ka mid ah wadaaddada iyo weliba qaar ka mid ah siyaasiyiinta, iyagoo KHAWAARIJ ku sheega kuwa iyaga kaga soo horjeeda jamaacada iyo fikirka siyaasadeed ee ay dadkaasi xanbaarsan yihiin.

Haddaba, Dr. Ahmed Dahir Aweys oo ka mid ah culumada waaweyn ee Soomaaliyeed, ayna walaalo yihiin madaxa ururka Xisbul-Islaam ee Sh. Xasan Dahir Aweys ayaa nagu soo booqday magaallada Odense, dalka Denmark, isagoo Jaaliyadda Soomaalida reer Odense u jeediyay muxaadaro ka hadlaysay Khawaarijta iyo tilmaamaha ay leeyihiin, sidoo kale muxaadarooyin kale oo ka hadlaya wuxuu Xukunka Islaamka ka qabo dhiigga daadanaya ee walaalaha dhexdooda ah.

FG: La soco qaybta labaad ee Video

”Khawaarijtu waxay billowdeen waqtigii Rasuulka (scw), waa kuwo baxay (ka baxay jamaacada muslimiinta), waa kooxo bidco ah, waxay bannaysteen dhiigga muslimiinta, dhinaca kalena waxay nabad geliyaan mushrikiinta, khalqiga ayay ugu shar badan yihiin, waxay dileen in badan oo saxaabada ka mid ah, iyagoo falkaas denbiga ah ugu dhowaanaya Allah” ayuu ku bayaamiyay Dr. Ahmed Dahir Aweys muxaadaradiisa, isagoo nusuusta uu daliishanayay uu ka soo min-guuriyay kitaabka iyo sunnada iyo oraahyada salafka.

Khawaarijta waxaa lagu sheegaa inay yihiin:-

· Inay dadka ugu sharta badan yihiin
· Inay yihiin eeyda Ahlu-Naar
· Inay laayaan ahlul-islaam, waxayna badbaadiyaan gaalada
· In khawaarij la laayo ayaa ka fadli badan leynta gaalada
· In oraahdooda iyo falkooda is khilaafsan yihiin
· Waxay muujiyaan inay diinta u xammaasaysan yihiin, hase ahaatee magac inay helaan ayaa u qarsoon.
· Waxay diinta uga baxayaan diinta si degdeg ah.
· Ma lahan faham xeel-dheer oo ay diinta u leeyihiin
· Waa kuwo isla weyn oo isla wanaagsan.

Mowduucan la xiriira khawaarijta (kuwii baxay) ayaa wuxuu Dr. Ahmed Dahir Aweys kaga hadlayay 6 qaybood, kuwaasoo kala ah:-

Barashada Khawaarijta iyo taariikhda ay soo mareen.
Nusuusta ku soo aroortay khawaarijta.
Koobitaan iyo is-dul istaagid ku saabsan tilmaamahooda.
Aragtiyada ay culumada ka qaateen khawaarijta.
Waxay ku kala duwan yihiin Khawaarijtii hore iyo kuwa maanta
iyo ugu danbeyn waxa lagu daaweeyo aafadan khawaarijta.

Dr. Ahmed Dahir Aweys waa imaamka Masjidka Sunnah ee magaallada London. Wuxuu ka mid yahay culumadii dhexdhexaadinaysay madaxda DKMG iyo Xisbul-Islaam iyo Shabaab oo garab ah.

Ibraahim Saalax, Denmark
ibra88@hotmail.com

Faafin : SomaliTalk.com | July 13, 2009