Kulan looga arinsanayey joojinta tahriibka oo maanta ka dhacay Boosaaso

Kulan balaaran oo looga hadlayey sidii loo joojinlahaa tahriibka ayaa maanta ka dhacay xarunta maamulka gobalka bari ee Magaalada Boosaaso.

Kulankaan waxaa soo agaasimay Ururka Taakulo oo ka jira Boosaaso asagoo gacan ka helaya Hay,adda qaxootiga aduunka ee UNHCR waxaana kasoo qabgalay madax farabadan oo ka tirsan maamulka Puntland gaar ahaana Gudoomiyaha gobalka bari Muuse geelle yuusuf iyo madax kalaba.

Gudoomiyaha gobalka bari oo halkaasi ka hadlay wuxuu sheegay in muskilada tahriibku tahay wax in badan soo taxnayd tan iyo markii ay meesha ka baxday dowladii soomaaliya haatana ay tahay mida ugu daran maadaama dagaalo qaraari ka soconayaan caasimadii soomaaliya ee Muqdisho islamarkaana dad aad ufarabadan ay dirirtaasi kasoo carareen haatana joogaan deegaanada puntland wuxuuna sheegay in dhamaan looga baahanyahay dadka puntland inay horjoogsadaan sidii dadkaasi aysan ugu dhamaan lahayn badda maadaama ay yihiin dad soomaaliyeed oo dhibaato haysato.

Waxaa sidoo kalle kulankaasi ka hadlay Barkhad cali saalax oo xilal badan kasoo qabtay maamuladii hore ee puntland kana mida waxgaradka puntland wuxuuna hadal kooban oo uu halkaasi ka jeediyey ku sheegay in ay diyaar uyihiin dadka reer puntalnd inay ugurmadaan walaalahooda qaxootigaa balse aysan ka yeelidoonin inay badda isku biimeeyaan wuxuuna intaasi ku daray in horay dhul loogu deeqay dadkaasi xaaladoodana ay ka warqabeen haatana la socdaan.

Dhamaan madaxdii halkaasi ka hadashay ayaa ayaa isla gartay sida ay lagama maar amaan utahay in la joojiyo tahriibka islamarkaana ciidamada booliiska lagu gacansiiyo sidii ay uga hortagi lahaayeen tahriibkaasi ayadoo la baaridoono guryaha ay dadkaasi geeyaana dadka wax tahriibiya.

Kulankaan ayaa kusoo beegmaya ayadoo maamulka degmada xaafuuna dhawaan sheegay inay deegaanka Hurdiya joogaan qaxooti soomaaliyeed oo tiradoodu gaarayso 430 kuwaasoo uu sheegay maamulku inaysan uhayn dhaqaale loogu gurmado ayagoo ka codsadayna maamulka Puntland iyo Hay,addaha samafalka inay dadkaasi usoo gurmadaan si xaaladooda wax looga qabto.

Rabiile Gabanow rgabanow20@gmail.com

Cumar Cabdikariin
Somalitalk Bosaso

Faafin : SomaliTalk.com | July 6, 2009