Shirka Jabuuti Siihayaha Wasiirka Hawlaha guud iyo Guriyeynta Xildhibaan
Ibraahim Xabeeb Nuur“shirkan wuxuu ahaa, shir lagu soo gebagabeynayo dhisme
Dowlad Midnimo Qaran…”
Shir Al-baabada u xiran oo socdey saacad iyo dhowr daqiiqo oo ay isugu yimaadeen
Gudiyada siyaasada TFG, ARS iyo xubno ka socda bulshada Rayidka oo uu shir
gudoominayo ku simaha Wakiilka gaarka ee arimaha siyaasada Qaramada midoobey
Soomaaliya Amb: Waliid, oo goob joogna ay ka ahaayeen wakiilada Ururada
caalamiga iyo xubno ka socdey xuquuqda aadanaha ayaa uga furmey caasimada dalka
Jabuuti 15/01/2009 abaaro shantii iyo bar Galabnimo
Shirkaan oo aan si rasmi ah loo shaacin waxyaabaha looga doodayey ayaa xiriiro
kala duwan oo aan la sameyney kasoo qayb galayaasha shirka, waxay ii sheegeen in
kulanku uu ahaa mid furitaan oo keli ah, islamarkaana warbixino yar yar laga
dhegeysanayey Gudi hawl wadeen ah oo ka koobnaa 10 xubnood iyo dib u eegista
waxa ka hirgaley qodobadii heshiiska, madaama xiligii lagu wadey shirka inuu
furmo uu maalin dib uga dhacay, islamarkaana xubnaha ka qaybgalayaashu ay
ahaayeen kuwo yimid isla xili ku dhow furitaanka shirka.
Sii hayaha xilka Wasiirka Hawlaha guud iyo Guriyeynta Xildhibaan Ibraahim Xabeeb
Nuur oo aan wax ka weydiiyey waxyaabihii layskula soo qaadey ayaa waxaa uu ii
sheegey “shirkan wuxuu ahaa, shir lagu soo gebagabeynayo dhisme dowlad midnimo
Qaran, waxaana lagu talo jiraa in Baarlamaanka DFKMG ay yimaadaan caasimada
dalka Jabuuti, shirkuna wuxuu socondoonaa ku dhowaad shan maalmood, waxaana shir
gudoominayey kusimaha Axmed Wallad Cabdalla” ayuu yiri xildhibaan Xabeeb
Mar uu ka hadlaayey hadalada ka soo yeeraya siihayaha xilka madaxweynaha ahna
Gudoomiyaha Baarlamaanka KMG Sheekh Aadan madoobe ayaa wuxuu yiri “TFG iyada
dhexdeeda ayaa wada hadleysa, wixii kala aragti duwanaansho ahna, iyada
dhexdeeda ayaa dhameysaneysa” ayuu yiri xildhibaanku.
Mar aan weydiiyey xubnaha ka Hadley shirka ayaa wuxuu yiri “shirka waxaa ka
Hadley Ra’iisul wasaare Nuur Xasan Xuseen, waxaa uuna sheegey in ay ciidamada
Ethopia ay ka baxeen gudaha magaalada Muqdisho, shacabka soomaaliyeedna uu u
ooman yahay taageerada beesha caalamka, sidoo kale shirka waxaa ka Hadley Sheekh
Shariif, waxaa uu isna soo dhaweeyey ka bixitaanka ciidamada Ethopia” ayuu yiri
Xildhibaan Ibraahim Xabeeb Nuur oo iigu waramayey isla goobta shirka uu ka
dhacey markii uu soo gebageboobey, inkastoo aysan inoo suuragelin inaan la kulmo
xubnaha ARS-ta ka socdey waqtiga oo ciriiri ahaa awgeed, in kastoo hadalo is
burinaaya ay ka soo baxayaan xiliga shirka uu soo gebageboobayo, dadka qaar
waxay sheegayaan in shirku uu soo xirmayo ilaa doorashada madaxweynaha iyo
dhismaha xukuumada cusub.
Hase ahaateen furitaanka Shirkaan oo u muuqda mid lagu soo af-jarayo shirkii
dhinacyada TFG iyo ARS uga socdey Caasimada dalka Jabuuti ee soo bilowdey
horaantii sanadkii tegey ee 2008-da oo ay garwadeen ka tahay Qaramada midoobey
qaybteeda arimaha siyaasada Soomaaliya ayaa waxaa uu ku soo beegmayaa, xili uu
xilka Madaxweynenimada ka degey Col/ Cabdullaahi Yuusuf oo sheegey ku dhowaad
nus Qarni in uu Qaranka Soomaaliya u shaqeynayey, islamarkaana sababo kala duwan
u yeeley iscasilaadiisa, taasoo keentey dersino su’aalooyin ah oo taabanaya
dhinacyada wadahadalada uu u socdo iyo hawlwadeenada shirka.
Sidoo kale siihayaha xilka madaxweynaha Soomaaliya oo isna u muuqda mid ku socda
wadadii ay ku baxeen labadii mas’uul ee ay jeelka wada ahaayeen ayaa waxaa ka
soo yeeraya hadalo xiligoodii dhamaadey, islamarkaana u baahan in wax badan
layska weydiiyo awooda DFKMG ay yeelaneyso xiligan iyo fulinta sharci waqtigiisa
sii dhamaanayo oo aan loo hayn taageerada beelaha danleeyda caalamka.
Sidoo kale waxaa taagan su’aal ah caasimada dalka Soomaaliya inta badan waxaa
gacanta ku haya kooxaha ka soo horjeeda DFKMG iyo xulufadeeda, iyadoo walib ay u
sii dheer tahay khilaafka ku dhex jira xoogagan la wareegey goobahan kala duwan
iyo soo xulista Baarlamaanka cusub ee lagu kordhinayo iyo ka bixitaanka
ciidamada Ethopia Magaalada Muqdisho.
Maxamed Macallin Cismaan(All-man) Somalitalk Jabuuti
fatxumaalik@hotmail.com