Muqdisho waa la Xoreeyey; Maxkamadahaase Gaagixiyey 

Ilaah baa mahad leh. Nabadgelyo iyo naxariis nabi Muxumad korkiisa ha ahaato. 

Soo xasuusta riwaayaddii: Galbeed waa la xoreeyey; Waarsaase gaagixisay! La yaab ma leh in gaalo ku carqaladeyso laakiin ka warrama haddii dad diin sheeganaya kala dhantaalaan midnimada Muqaawamada? 

Geeso lo’aad kuleylkaa lagu gooyaa! Waxaa la sheegay in Tigreegu ku dhaheen ciidamada Amisom naga hor baxa si aan Amisom cagta loo marin marka Tigreegu waddanka ka dhammaado laakiin niman ka socda Maxkamadaha iyo odayaal baa Amisom ku yiri jooga dhib ma lahee. Tigreegu ilaa hadda wuu yaaban yahay. Zenawi waa ogaa in Amisom loo soo tabobaray inay Muqaawamada la dagaalaan. Wuu ogaa hadduu ciidankiisa la baxo in shacabku dhegta dhiigga u darayo Amisom laakiin ilaa hadda waxaa dhacay lamo filaan. Waxaa Maxkamadaha la weydiinayaa geeraarkii Laangarre Allahaxa u naxariistee: 

• Maxaa labo gaal oo abtirsiinyo noo gudboon (Museveni iyo Meles)
• Midna ay gar u siinayaan midna ay u guhaadin?

Xaggeyga labada gaal, Amisom baa daran! Tigreega deris baan nahay oo dagaal iyo heshiisba waa na dhex mari karaa laakiin niman calooshood-u-shaqeystayaal oo ah oo loo soo diray iney la dagaalaan diinta Islaamka yaa hoosta gashan kara? 

Mar hore baan culumada Musaalixada sheeganeysa sheegay inay galeen khalad weyn – markii ay go’aan dhankooda ah ku dhaheen 120 beri guduhood ha ku baxeen Amisom! Waxaan culumada weydiiyey yey yihiin/ka socdaan markaad go’aan kelligiin ah gaareysaan? Ileyn Amisom culumadii oo fadhida oo aan weli go’aan gaarin bey dhaheen ma baxeynno. Sheekh Shariif laftiisu intaaas oo jeer buu si dadban u yiri ineysan Amisom baxayn. Yaa marka heshiisku qabanayaa? Keliya waxaa laga adagyahay Muqaawamada. Muqaawamadu maba tixgelin heshiiskaas maaddaama Amisom tiri nama khusayo. Heshiiskaas wuxuu caawiyey dad sheegta Bulshada Rayidka ah iyo dagaaloogayaal ku dhexjiray Muqaawamada oo rabay iney helaan xeelad ay ugu biiraan kooxda Shariifka! Maxay ka dheefayaan Musaalaxado in dhabarkooda laga dhigto jaranjaro ay dagaaloogayaal ku gaaraan dan khaasa? 

Maalintan aan maqaalka qorayo oo ah  28/04/09 waxaa maalintii ka horreysay saxaafaddu sheegtay in Shariif yiri ciidamada Amisom ma baxayaan! Kal hore waa taan Musaalixada ku iri: markii waqtigaas la gaaro: ninkiinba meel miyuu ka baxayaa mise waxaad la halgameysaan Muqaawamada si loo fuliyo go’aankiinna? Hadda Shariif iyo Amisom diide iney baxaan. Waa maxay mowqifka ay Musaalixo qaadaneyso? Ma bakayloow nin iyo bur baa? Nin kastaa ma wuxuu ku noqon magaaladuu ka yimid? 
Dad dan leh ama aan fahmin dhagarta shisheeyaha baa dhaha: “naxnu macal Culumaa’”! Bal aan idin xasuusiyo marka culumada heshiiskey cid la galaan la jabiyo. Yaa garanaya qof nabigii khalqiga ugu kheyr badnaa (SCW) ka cilmi badan? Mar baa Qureysh iyo Bakar oo xulufo ah ay laayeen rag ka mid ahaa Khuzaaco oo nabiga (SCW) xulufo la ahayd iyadoo lagu jiro heshiiskii Xudeybiya. Khuzaaco waxay  galeen Xaramka bal si looga haro laakiin markii Bakar qaarkeed hogaamiyahoodii ku dhaheen Xaramkey naga galeene aan ka harno ayaa hogaamiyihii ugu jawaabay: Xaramka dhexdiisaba wax waad ku xaddaane, laaya nimanka oo aarsada.  

Camri Binu Saalim Al-Khuzaaci ayaa Madiina u degdegay ilaa uu dul yimid nabigii (SCW) oo ku dhexjira saxaabadiisa wuxuuna Camri halkaas ka bilaabay gabay isagoo leh: 

• Yaa Rabbi, waxaan u dhawaaqayaa Muxamed (SCW) oo xulufo qadiim ah ahaayeen aabbayaashii iyo aabbayaashayo.
• Waxaad ahaydeen wiil (Cabdi-Munaaf); annaguna waalid (hooyada Cabdi Munaaf oo Khuzaaco ahayd), dabadeedna waan muslimnay marnaba heshiis kaagamaannaan bixin.
• Gargaar, Ilaahay hakugu hanuunsho gargaare waligaaye,  u yeer addoomaha Ilaahay ha soo gurmadeene.

Markuu meeris intaan ka badan mariyey baa nabigu (SCW) ku yiri: waa laguu gargaaray Camriyoow. 

Marka shaki ma leh in culumo dhaxleen nabigee (SCW) mar haddii Amisom iyo sheekh Shariif dhaheen gaalo ma baxayso, Musaalixadu ma iclaamin doonaan inay taageeraan Muqaawamada? Sidoo kalana ma ku tirtirsiin doonaan in shacabku garab galo Muqaawamada? Ogoow, nabi (SCW) ma sugin inuu dhamaado waqtigii loo qabtay Xudeybiya marba haddii la jabiyey. Marka sheekhii dhaha waan ognahay in Shariifka iyo Amisom jabisay heshiiskee aan sugno 120 beri waa khaldan yihiin mana aha daliil sal ku leh Islaamka. Marka khiyaanadii Bakar iyo Qureysh waxay keentay inuu dhaho Fatxi weyn oo la furtay Makkah. Xarameynka iyo Baytul Maqdis kaddib haddeynnu Soomaali nahay waa Muqdisho magaalomadaxdeennu. Marka ma laga yaabaa in ballan-ka-baxa Amisom iyo Shariifku keeno in shacabka Soomaaliyeed oo culumo iyo Muqaawamo horsocdaan ay Amisom iyo Ashahaado-la-dirir Xamar ka saaraan? 

Markii Tigreegu baxay oo culumo badan Xamar ku yaacday waa tii maalin garoonka Kubbadda Cagta lagu qabtay bannaanbax. Markii Amisom aragtay shacabka intaas le’eg oo isu soo baxay waxaa ku dhacay khalkhal weyn. Isla maalintaas afhayeenka Amisom wuxuu saxaafadda Xamar ku yiri: haddii dadka Soomaaliyeed naga dalbadaan inaan baxno waan baxaynaa! Laakiin waxaa loo sheegay Amisom in bannaanbaxa looga gol lahaa in Muqaawamada looga soo horjeesto oo aysan xabbad ku ridin Amisom! Maalintaas kaddib lagama maqal Amisom waxaan ahayn ineysan baxayn! Waxay ogaatay in odayaal badan, niman culumo ama Maxkamado sheegto iyo kuwa sheegta bulshada rayadka ahi la jiraan. Laakiin waxaa shirqoolkaas ku dhacay Musaalixo. Musaalixada waxaa ku jira niman lagu yiqiin iney Muqaawamada u neceb yihiin mabda’a ahaan. Waa niman neceb Salafka oo jecel in wax la isku qaso. Marka Musaalixadu ha saxeen khaladkooda. 

Marka guushii waxaa gaagixiyey Maxkamadaha. Ammaanka madaxda la soo dhoodhoobay waxaa ilaaliya Amisom, Saciid-dheere iyo Cabdi Qeybdiid! Maalin kasta waxaa shacabka dhaca koobbi-Amxaaro. Xaggee ku dhacaan? Inta u dhaxeysa madaxtooyada iyo garoonka diyaaradaha ee Xamar. Ducadii fiicneyd si khalad ah ayaan u dhahnaa: waxaan wanaag iyo kheyr ka raadinnay Amisom, Cabdi Qeybdiid iyo Saciid-dheere. Waxaan dhibsannay Muqaawamadii meelaha ay xukuman kheyr laga arkay. Goormaa Baydhabo, Kismaayo iyo Marka dhib ugu dambeysay?Haddii Amisom Xamar laga saaro Insha ALLAAH waxay noqoneysaa nabad sida magaalooyinkaas oo kale sidii 2006-dii. Amisom iyo Ashahaado-la-dirir la’aan waa nabad iyo horumar. Marka Maxkamaduhu waa iyaga hoosta gashaday Amisom sidii C/hi hoosta u gashaday Tigreeye maxaa faraqa oo u dhaxeeya labada gaal? Marka, Baydhabo iyo Kismaayo waa la xoreeyey oo Maxkamado iyo Amisom midna ma gaagixin. Marka dhibka Xamar heysta waa Amisom. Shariifku wuu ogyahay haddii Amisom baxdo inuusan hal habeyn joogi karin. Maalinta ay Amisom baxdo hal qolaa qabsaneysa Xamar haddii Ilaah idmo. Micno ma leh qabiilkuu noqdo hogaamiyaha kooxdaas marba haddii sida Kismaayo, Baydhabo iyo Marka nabada noqoneyso. 

F.G. Ma la rabaa in Amisom Xamar ka baxdo? Dhowr toddobaad, maalin kasta oo Jimce ah dadkii Musaalaxada sheeganayey, Muqaawamada, kuwii lahaa Bulshada Rayidkey metelaan iyo shacabkuba inta Salaadda Jimcaha ka soo baxaan ha isugu tageen Tarabuunka ama Istaadiyo Muqdisho. Waxaan hubaa in Takbiirta shacabku ka xoog badan tahay taangiyada Amisom. Marka Amisom aragto shacabka oo dalbanaya iney ka baxaan ma filayo iney bilo joogeyso. Arrintaasi waxay keeneysaa in Muqaawamadu is diyaariyaan oo aysan weerarin Amisom inta shacabku bannaanbaxayaan. Haddii Amisom ka dhego adaygto dalabka shacabka ma filayo iney ka dhego adaygi karaane waxay keeneysaa in Muqaawamada oo shacabka hor kacaysaa ay dagaal la galaan Amisom. Ma filayo iney maalmo badan qaadaneyso. Marka Shariifka iyo Amisom diide in Amisom la saaro. Muqaawamado waxay xaq u leedahay iney meel kasta ku weeraraan Amisom. Marka shacabku hakala doorto in maalin kasta Amisom leyso markii Muqaawamadu Amisom la dagaasho haddii kale si nabad ah shacabku bannaanbax ha u sameeyo Jimcayaasha si Amisom u aragto in shacabku muslim yahay oo ay wiilashooda la jiraan.