Barnaamijkii Radio Xoriyo
20 September 2008.
Dad Abaaraha dartood ugu dhintay meelo Ogadeenya ka mid ah
Dhibaatooyin kala duwan oo gumaysigu u gaystay dadwaynaha
Kuxigeenka G/H/arimaha dibada ee jwxo Mudane Hanad Maalinguur oo aan
ka waraysanay siyaasada jwxo ee arimaha dibada ee jwxo iyo abaaraha Ogadenya.
======================
Dad Abaaraha dartood ugu dhintay meelo Ogadeenya ka mid ah
Laga soo billaabo dabayaaqadii bishii siddeedaad waxaa meelo Ogaadeenya ka mid
ah ku dhintay dad iyo duunyo badan oo dhibatada abaaraha u dhintay. Dadku waxay
dhimanayaan biyo iyo cunto la'an iyo cudurro ka dillacay meelaha qaarkood.
Xoolaha ayaa iyaguna u dhammaanaya biyo iyo baad la'aan.
Xoolaha oo aad u le'day ayaa waxaa ka dhashay cayayaan uu Dakhsigu ka mid yahay,
kuwaasoo iyaga laftoodu dhibato dhinaca caafimadka ah ku haya dadwaynaha, gaar
ahaan kuwooda jilicsan, sida carruurta iyo waayeelka. Gobollada qaarkood waxaa
laga soo sheegayaa inay ka dillaaceen cudurro uu Daacuunku ka mid yahay.
Meelaha ay dhimashada dadka iyo xooluhu ugu badan yihiin waa deegannada hoos
yimaada gobolka Doollo iyo degmooyinka xuduuda la leh gobolkaas. Ila iyo hadda
wararka na soo gaadhaya ayaa sheegaya in dad badani ay dhibaatada abarta ugu
dhinteen meelaha ay ka midka yihiin Dannod, oo ugu yaraan 10 qof ay ku dhinteen,
Caado oo iyadana ilmo yari gaajo ugu dhintay. Waxay sidoo kale dad ku dhinteen
meelaha kala ah Garlowgube, Waafdhuug, Uubataale, La-helow, Yucub iyo Qamuuda
iyo waliba deegaanno kale oo badan. Waxayna dadku u dhammaanayaan gaajo iyo oon,
iyadoo ay inta badan gudheen Barkadihii laga cabbi jiray, Ceelashana ay
ciidammada gumaysigu dadwaynaha u diideen inay ka dhaansadaan.
Abaraha ba'an ee ka jira meelaha ay Ogadeenya ka midka tahay waxaa toddobadkan
si wayn uga hadlay warbaahinta adduunka, oo si faahfaahsan uga hadashay baaxada
ay dhibaatadaasi leedahay. Habaynki jimcuhu soo galayay waxaa tilishin laga
leeyahay waddanka Britain oo lagu magacaabo Channel Four laga sii daayay
barnamij dheer oo laga soo diyaariyay dhibatada qallafsan ee haysata dadwaynaha
ku dhaqan Ogaadeenya iyo sida ay xukuumadda gumaysigu u diiddan tahay in wax
gargaar ah dadkaas la gaadhsiiyo.
Wariye ka tirsan Channel Four oo dhawaan booqday meelo Ogaadeenya ka mid ah,
isla markaana waraysiyo kala duwan la yeeshay dadwaynaha halkaas ku tabaalaysan,
ayaa si aad ah uga sheekeeyay sida ay xukuumadda gumaysiga Itoobiya cuntada
gargarka hub ahaan ugu adeegsato, isla markaana dadwaynaha uga hortagan tahay
goobaha biyaha iyo xarumaha samafalka.
Sidoo kale wargayska Times, oo isaguna ka soo baxa waddanka Britain, ayaa
isaguna ka warbixiyay dhibatada abaaraha, wuxuna wargaysku soo qatay cabashooyin
ka yimid hay'adah samafalka oo tilmaamay in xukuumadda Itoobiya ay si ula-kac ah
hoos ugu dhigayso dhibatada abaaraha, isla markaana ay ciidammada gumaysiga
Itoobiya si badheedh uga hortagaan in dadkaas gargaar la gadhsiiyo.
Qaramada Midobay ayaa sheegtay in ugu yaraan 2 milyan oo qof ay dhimasho qarka u
saaran yihiin, hase yeeshee madaxa arrimaha bani'adamnimada ee Qaramada Midoobay
John Homes, oo dhawaan Ogaadeenya boqday, ayaa sheegay in dadka ku tabaalaysan
Ogaadeenya ay intas aad uga badan yihiin. Warabixin aan la faafinin, oo
Barnaamijak Cuntada Adduunka ee WFP uu u gudbiyay deeq bixiyayaasha ayaa lagu
sheegay in Ogaadeenya ay dad ugu dhinteen gaajo iyo oon, dadka in gargaar lala
gadho u baahana ay 2 milyan gaadhayaan.
Dhinaca kale waxaa toddobaadkii hore lagu xidhay magaalada Gunagado labo kooxood
oo samafalayaal ah oo u shaqaynayay Hay'adda WFP, waxaana labadan kooxood
xabsiga loo taxaabay, ka dib markii ay isku dayeen inay arkaan oo tirakoob ka
sameeyaan dadka ay tbaaladu ka soo gaadhay abaaraha ee gargaarka degdegga ah u
baahan.
Dhibaatooyin kala duwan oo gumaysigu u gaystay dadwaynaha
Ciidammada gumaysiga ayaa waxyeellooyin kala duwan, oo dil, xidhay iyo gubis
isugu jira, u gaystay dadwaynaha rayadka ah ee Ogaadeenya. Waxyeellooyinkaasi
waxay u dhaceen sidatan;
30/08/08 magaalada Qorile ee degmada Dannood waxay cidammada gumaysigu ku dileen
nin waalan oo lagu magacaabo Ciisood.
17/09/08 magaalada Qabribayax waxay cidammada gumaysigu ku xidheen dadka kala
ah;
1- Muuse C/llaahi Cumar
2- Kaafi Faarax Jaamac iyo
3- Shire Axmed Yaasiin
Isla 17/09/08 magaalada Jigjiga wxaa sidoo kale lagu xidhxidhay ninka lagu
magacaabo Cabdi C/llaahi.
11/09/08 magaalada Awaare waxay ciidammada gumaysigu ku xidhxidheen ddka kaala
ah;
1- Cabdi Maax Maxamuud
2- Mire Daahir Gahayr iyo
3- Sucaad Cawil Dirir
07/09/08 magaalada Sagag waxay sidoo kale ciidammada gumaysigu ku xidhxidheen
dadka kala ah;
1- Cabdi Shariif Faarax iyo
2- Maxamuud haybe
Gubis
17/09/08 magaalada Awaare waxay ciidammada gumaysigu ku gubeen ilaa iyo 110 guri
oo isugu jira Aqal-soomaali, Dirgado iyo Daaro, kuwaasoo ay lahaayeen dadwaynaha
rayadka ah. Dadka guryahaas laga gubay waxaa ka mid ah;
1- Cabdi Amaadin
2- Macalin Go'aan Amaadin
3- Maxamuud Colaad
4- Cismaan Dhadac
5- Mustafe Ciwal
6- Maxamed Cali
7- Cali Siinlow
8- Yuusuf Dhadac
9- Hugur Dhuug
10- Cabdi-dheeg Dhaga-laab
11- Ibrahim Canshuur
12- Maxamuud Axmed iyo
13- Ilyaas oo magaciisa oo buuxa aanaan haynin
20 September 2008
Axmed Gaal-Eri
Radioxorio@radioxoriyo.com
Raadioxoriyo@yahoo.com
Radio Xoriyo waxaad ka dhegaysan kartaa Mawjadda 41 MB ee dhererkeedu yahay 7560
KHZ,iyo internetka Radioxoriyo.com,Ogaden.com Maalmahaa Talaadada & Sabtida
5:00PM – 5:30 waqtiga Afrikada Bari
Faafin: SomaliTalk.com | Sept 21, 2008 |
Daabaco
Boggan | Print
Wakiilka
Qaramada Midoobey oo Maamulka Puntland ku eedeeyey Burcad badeedda
Puntland
oo Ganafka ku Dhufatay Heshiiska DFKMG La Gashay Shirkadaha Batroolka
DFKMG
oo Heshiis u Saxiixday Shirkadaha Batroolka ee Kuwait Energy iyo Medco
Energi...