Madaxweyne Mbeki oo xilka ka dagaya, kadib markii ANC ay sidaasi ku amartay.
madaxweynaha dalka Koonfurta Afrika Thabo Mbeki ayaa ogolaaday in uu kursiga isaga dagayo kadib markii sidaasi uu ku amray xisbiga talada haya ee African
National Congress (ANC) go'aankan ayuu xisbiga maanta ku dhawaaqay kadib maalmo jahowareer iyo warar ku
tirekuteen ah ay hawada wasaqeeyeen. Gwede Mantashe, xogyaha guud ee ANC ayaa maanta shir jaraa'id oga dhawaaqay
go'aanka golaha dhexe ee xisbiga oo kulansanaa illaa shalayto, wuxuu yiri "kadib
wadatashiyo iyo wadahadal baddan iyo waqti aad u adag, waxaan go'aansanay in aan dib ugu yeerno Mbeki ka hor inta
uusan waqtigiisa xafiiska dhamaan, isagana waan ka war galina, wuuna ogolaaday" ayuu yiri
Mantashe oo warfidiyeenada kula hadlay Kempton Park, Johannesburg. wax yar kadib, afayeenka madaxtooyada ayaa qirey in Mbeki uu ogolaaday go'aaka
ANC aqbalayna in uu xilka isaga dego waxaa sidoo kale ku dhawaaqay in ay xilka ka dagayaan qaar ka mid ah golaha
wasiirada ee Mbeki oo ay hor kacayso haweeneyda madaxweyne ku xigeenka ka ah dalka, Phumzile Mlanbo-nduga, waxaa kaloo ka mid ah
wasiirada sheegey in ay casilayaan wasiirka sirdoonka Ronny Casrills, wasiirka madaxtooyada Essop
Phahad, iyo wasiiro kale. qorshahani ay wasiirada isku casilayaan ma ahan mid ay raali ka tahay ANC,
waxaana loo arkaa talaabo dalka galinaysa qalalaase cusub oo siyaasadeed, waxaa
la hadal hayaa in inta wasiirada ay isu casili doonaan Go'aanka Mbeki lagu eryey
dartiis iyagoo ka xanaaqsan, waxaa laga yaabaa in ay raacaan oo is casilaan
barasaabyo goboleed Mbeki daacad u ahaa, gaar ahaan barasaabka awooda baddan ee
gobolka barwaaqo sooranka ah ee Gauteng, ninka lagu magacaabo Shilowe. waxaa lagu wadaa in maalmaha soo socd Mbeki uu xafiiska baneeyo waxaana badali
doonta haweeneyda ah gudoomiyaha baarlamaanka Baleka Mbete sida uu dastuurka
qabbo, muddo 30 cisho ah ayay heyn doontaa, kadib xeer illaaliyaha guud ee dalka
ayaa isugu yeeraya kullan baarlamaan oo halkaasi lagu dooran doonaa madaxweyne
kumeel gaar ah, waxaa loo badainayaa in Zuma la dooran doono walloow uu diidey,
haddii ay noqoto in isaga la doorto waa in marka hore uu noqdaa xubin aqalka
baarlamaanka ka mid ah oo xildhibaan, taasina waa ay u sahlantahay ANC in ay
yeesho, waayo waxaa jirra kuraas banaan oo dad ay ka dhinteen ama qof ayaa loo
badalayaa.
go'aanka ANc wuxuu ka dambeeyey markii jimcihii hore xaakim maxkamada sare uu
Zuma ku waayay dacwado sannooyin loo heystey, isla xaakimkaasi oo lagu magacaabo
Chris Nicolson ayaa Mbeki iyo dowladiisa ku heley in ay Zuma u maleegeen
shirqool siyaasadeed, taasoo micnaheedu tahay in dacwooyinka Zuma loo heyto ay
yihiin kuwa lasoo been abuuray, markii uu xukunkaasi dhacay madaxda ee ANc ee uu
Zuma ka mid yahay waxay go'aansadeen in Mbeki aanan xilka laga qaadin oo uu
waqtigiisa dhamaysto taaso ahayd mid ka duwan sida ay ku baaqayeen xubnaha xag
jirka ah ee xisbiga ka tirsan oo kol horaba ku baaqayay in Mbeki meesha laga
saaro, laakii go'aankaasi ANC wuxuu is badalay markii hey'ada xeer illaalinta
guud NPA (National Prosecuting Authority) ay sheegtey in xukunka xaakimka ay
rafcaan ka qaadan doonaan, Zumana dib maxkamad ola kori doonaan, waxaa
hadalkaasi mid ka daran sii raacsaday golaha wasiirada oo ku gacan seeyrey
go'aanka xaakimka, sheegeyna in ay tashi qaanuuneed ka samayn doonaan xukunka
xaakimka. Xil ka dagista Mbeki ma ahan wax la yaab ku ah dadka dalka, waayo waxaa la hadal
hayay, oo malain kasta qoraalo cusub ay saxaafada kusoo baxayeen tan iyo intii
Mbeki uu Zuma kaga reeyey doorashadii madaxtinimada xisbiga ee dabayaaqadii
sanadkii hore. Xiliga go'aankani lagu dhawaaqayay Mbeki waxa uu safar u ahaa New York halkaas
oo ay ahayd in uu kaga qeyb galo shirka golaha guud ee Qaramada Midoobay, balse
waa uu ka nagaaday iminka. hadda waxa la sugaaba waa inta baarlamaanka kulmayo
oo caadiyeynayo shaqo ka tagista madaxweynaha todobadka soo socda. dhamaan xisbiyada mucaaradka, ururada bulshada rayidka ah, saxaafada,
jaamacadaha iyo macaahiida culuumta sare, ayaa dhamaantood isku si u wada
dhaleeceeyey go'aankani Mbeki lagu direy, waxayna ku doodayaan in tani ay wax u
dhimeyso kalsoonida maalgashadayaasha shisheeye, iyo dhaqaalaha dalka. Cabdinaasir Axmed Sh. Bashiir (saxansoxo). Email:
saxansoxo1@hotmail.com Somalitalk.com, Johannesburg.
Faafin: SomaliTalk.com | Sept 21, 2008 |