Cabsi iyo Cidlo Baahsan

Weriye Amiin Yuusuf Khasaaro oo soo indh-indheeyey goobihii laga barakacay

Markii dib loo furay Masjidka Sheekh Cali Suufi ayaa aniga oo ay ila socdaan dhallinyaro iyana horey uga qaxay guryahoodii ayaan u wada dhaqaaqnay sidii aan u soo eegi laheyn qaybo ka mid ah goobihii laga barakacay, waxaana ku sii hor marnay Masjidka Sheekh Cali Suufi oo aan ku sii tukanay Salaadda Jimcaha, maadaama isaga qudhiisa markaa uun la furay 11 bilood kadib.

Masjidka waxaa soo camiray dad fara badan kuwaas oo intooda badan laga dareemay in ay doonayeen in ay soo indha-indheeyaan xaaladda halkaasi ka jirta, waxaan aniga iyo dhallinyaradii ila socotay horey u qaadnay salaaddii kadib wadada aada dhanka Isgoyska Al-Baraka, markaan ku sii dhawaanay dhanka Al-Baraka waxaa naga hor yimid labo carruur ah oo nagu wargeliyey in aanan wadada bartankeeda qaadin oo aan dhinac ka marno, waxaana weydiinay waxa dhacay, waxay noo sheegeen in Ciidamada Itoobiya oo ku sugan Agagaarka Shiirkole soo shiishayaan dadka, waxaana nagashay cabsi iyo walwal, anaga oo dhuudhuumaneyna, meelahana fiirfiirinaya ayaan tagnay Isogyska Al-Baraka, markiiba waxaana dareennay cidlo, waxaana u xiiso qabay inaan soo eego xaruntii Wargeyska Ayaamaha, intaanan gaarin Xarunta Wargeyska ayaa waxay ishaydu qabatay gurigii uu deganaa Tifaftiraha Wargeyska Ayaamaha C/llaahi Max'ed Xasan (Black) oo ay madaafiic burburisay, horey ayaan u sii dhaqaaqay waxaan markiiba soo gaaray xaruntii Wargeyska Ayaamaha oo ay ka muuqatay Burbur, waxaana xarunta iigu dambeysay mudo 11 bilood ah ka hore.

Jidka Sodonka oo ay ku tiilay Xarunta Wargeyska ayaan labada dhinac ka fiiriiyey, waxaadna u maleyneynaa meel qarniyaal ka hor la isaga cararay oo aan mudooyinkaanba nolol ka jirin, waxaan in yar ku nasanay Daarta NBC, halkaas oo aan sawiro dhawr ah ka qaaday, kadibna waxaan u jiheystay dhinacaa iyo Black Sea oo horey u ahaan jirtay goob aad u camirnaan jirtay, balse hadda ay ka muuqato indh-xumo daran, waxayna ahayd meel cidlo ah, kadibna waxaan u dhaqaaqnay dhinacaa iyo Shiirkole waxaana noo muuqday oo keliya geedo aad uga baxay halkaasi, waxaan gaarnay Hoygii aan ka deganaa deegaankaas, waxayna indhaheygu qabteen guryihii halkaasi ku yiilay oo ay ka hareero baxeen geedo kuwaas oo Soomaalidu u taqaano Geed Yahuud oo ah geed si deg deg ah u baxa, jilaal iyo aaranna waa cagaaran yahay, markaa aan guriga ag istaagey ayay dhallinyaradii ila socotay waxay igu yiraahdeen (Amiinow meesha maad naga wadid), waayo markaas ayaa naloo soo sheegay wiil dhallinyaro ah oo ay toogteen Ciidamada Itoobiya maydkiisana la soo qaadi waayey, markiiba cagaha ayaa wax ka soo daynay, waddadii aan horey u soo qaadnay dib uguma laaban, balse waxaan ku leexanay waddo kale si aan u saan tirano, waayo mararka qaar ciidamada ayaa soo gala wadooyinka.

Safarkaas mudada saacadaha ah qaatay balse ay cabsidu ku dheehneed, kadib waxaan soo gaarnay isla Masjidka Sheekh Cali Suufi oo aan ku tukanay Saaladda Casir, waxaana dib ugu soo laabanay xaafaddii aan ka wada tagnay ee Taleex oo markaas ay ka socotay Tacshiirad ay isweydaarsanayeen Dowladda iyo Kooxaha ka soo horjeeda.

Isku soo wada duuboo Magaalada Muqdisho maanta meel fayow ma jirto, waayo shacabku waxay ku wada nool yihiin dareen cabsi leh, waayo goobaha aad isleedahay way nabdoon yihiin waxaa ka dhaca maalin walba dhac iyo dil ay gaysanayaan qaar ka mid ah ciidamada Dowladda Federaalka, waxayna dadkii ka barakacay Magaalada Muqdisho haatan aysan u muuqan kuwo dib ugu soo laabanaya guryahoodii waayo waxaa guryahoodii ku sugan ciidamo Itoobiyaan ah iyo kuwa Dowladda Federaalka, inkastoo guddiga ku meel gaarka ah ee Gobolka ka dhawaajiyeen in ay ka shaqeynayaan sidii ay dib ugu soo celin lahaayeen dadkii barakacay guryahooda, balse dadka barakacay ayaa sheegaya in aysan macquul ahayn in waqtigaan dib ugu laabtaan guryahoodii inta ay Ciidamada Itoobiya iyo kuwa Dowladda ku sugan yihiin goobahaas.

Amiin Yuusuf Khasaaro

amiinkhasaaro@hotmail.com

Faafin: SomaliTalk.com | Sept 16, 2008

BAARID | SEARCH

Puntland oo Ganafka ku Dhufatay Heshiiska DFKMG La Gashay Shirkadaha Batroolka
Wasiirka Tamarta DGPL ayaa waxba kama jiraan ka dhigay heshiiskii Eng. Kaanje la soo galay shirkadaha KEC iyo Medco Akhri Aug 22

DFKMG oo Heshiis u Saxiixday Shirkadaha Batroolka ee Kuwait Energy iyo Medco Energi...
Maadaama shirkadahaasi jaal la ahaayeen Geeddi ma lagu macnayn karaa in la soo celinayo Geeddi Akhri

Sheikh Shariif “ciidamada bixitaankooda wuxuu bilaabanayaa markii la sixiixey heshiiska, laakiin…” Shir jaraa’id
Warbixin arintaas ku saabsan Akhri Aug 22