Switzerland : Alle bari loo sameeyay Marxuum Sh. Ibraahim Cabdalla
Jaaliyada Soomaalida Ogaadeenya ee Switzerland ayaa maanta u sameeysay Allaha
u naxariistee Sh Ibraahim Cabdalla, hogaamiyahii hore ee JWXO isu imaatin Alle
bari ah. Isu imaatinkan oo lagu qabtay Hoteelka NH ee magaalada Fribourg ayaa
ujeedadiisu ahayd xusida baalka dahabka ah oo uu Shiikhu ku leeyahay halganka
xaqa ah ee Ogaadeenya iyo qadiyada Soomaaliyeedba, waxqabadkiisii iyo in Eebe
marxuumka janadii ka waraabiyo.
Kulankan ayaa ka sokoow xubnaha jaaliyada Soomaalida Ogaadeenya ee
Switzerland, waxaa kaloo ka soo qeyb galay qeybaha kala duwan ee bulshada
Soomaaliyeed ee wadankan Switzerland iyagoo dhamaantood ka marqaati kacay
Islaanimo-jaceeylka, Soomaalinimada iyo xaq u dirirnimada Alla u naxariistee Sh.
Ibraahim Cabdalla.
Goobta ayaa lagu soo bandhigay qaar ka mid ah buugaagta dhaxalgalka ah oo uu
mujaahidku qoray. Sidoo kale inta uu kulankan socday ayaa la xusay dhamaan
halyeeyedii Soomaaliyeed ee dhiigooda u huray qadiyada Ogaadeenya iyo mida
Soomaaliweeynba oo aay ka mid ahaayeen Imaam Axmed Gurey, Sayid Maxamed Cabdille
Xasan, Garaad Makhtal Daahir iyo Maxamed Siyaad Barre oo suurto galiyay in
Ogaadeenya xor ahaato mudo sideed bilood ah ka hor in ta aanay reer galbeedku u
qaban Ogaadeenya amxaarada.
Kulankan ayaa mashaa’ikhdii goobta joogtay ku soo gabagabeeyeen duco Alle
lagaga baryayo in uu u janadiisa ka waraabiyo dhamaan shuhadada u nafweeysay is
ka caabinta dulmiga gumeeysiga itoobiya guud ahaan gaar ahaana Sheekh Ibraahim
Cabdalla oo isagu ah aabaha cusub ee halganka gumeeysi-diidka ah ee qarnigan.
Wadadii uu falay Mujaahidku ayaa taala oo aan raaci doonaa ilaa aan ka
dhabeeyno hadafkii Sheekh Ibraahim ayeey xubnaha jaaliyada is ku balansadeen.
AM.
Fribourg, Switzerland.
waxaa soo tebiyey
MOHAMED ISMAIL
Faafin: SomaliTalk.com | July 1, 2008
Daabaco
Boggan | Print
Kalfadhigii 20aad ee Golaha Wakiillada Puntland oo Ka
Furmay Garoowe...
