- Xukuumadda Cusub ee Col. Nuur Cadde oo La Ansixiyey
- Iska hor imaad ka dhacay Boosaaso
- Ciidamada Ethiopia Ee Ku Sugnaa Deegaanka Gubta Oo Saaka Faaruqiyey
Goobtaasi.
- Wadooyinka Soo Gala Xamar -weyne Iyo Xamar Ja-jab Oo Xaniban
Maalintii Labaad.
- Weriye Cawaale oo Xabsiga Dib loogu Celiyey
Xukuumadda Cusub ee Col. Nuur Cadde oo La Ansixiyey
Baydhabo: Kulan ay maanta [Khamiis Jan 10, 2008] baarlamaanka DFKMG
ku yeesheen magaalada Baydhabo ayey ku ansixiyeen xukuumadda cusub ee
col. Nuur Cadde oo ka kooban 18-wasaaradood.
Kulankii maanta oo ay ka soo qayb galeen 230 xildhibaan ayaa
aqlabiyad ku ansixiyey cod loo qaaday xukuumadda.
Iska hor imaad ka dhacay Boosaaso
Boosaaso: Waxaa maanta [Jan 10, 2008] is ka hor imaad magaalada
Boosaaso ku dhex maray ciidamada Booliska Puntland iyo koox hubaysan oo
ay ciidamada boolisku ku hareereeyeen guri ku yaal xaafadda Biyokulule
ee magaalada Boosaaso.
Waxaa wararka sheegen in ilaa lix qof ay ku dhaawacmeen
oo labada dhinac ah.
Wararka ugu horeeya ee ka soo baxaya iska hor imaadkaas ayaa tibaaxay
in ciidamada Booliska Boosaaso ay hareereeyeen guri sida la sheegay
ay ku tuhmayeen kooxdii afduubka ka geystey Boosaaso toddobaadyadii la soo
dhaafay, laakiin halkaas ay kala kulmeen iska caabin xoog leh.
Faahfaahin Dheeraad ah: Dagaal ka dhacay Bosaaso oo geestay dhimasho
iyo dhaawac.
Ciidamada amaanka iyo kooxda guriga ku jirtay ayaa waxa ay iswaydaarsadeen
rasaas iyadoo magaalada dhamaanteed si xoogan looga maqlay rasaasta labada
dhinac isku ridayaan, balse goordame ayaa rasaastu sii xoogaysatay kadib
markii la sheegey inay gurmad heleen raggii guriga ku jiray.
Ciidamada booliiska ayaa iyaguna heley gurmad xooggan waxana jira dhimasho
dhaawac aan la cayimin, waxayse goobjoogayal sheegeen inay arkeen dad ay
xabado ku dheceen.
Dhinaca kalena isbataalada magaalada ayaa la geeyey dad ku wax yeeloobay
tacshiiradda ka dhacday xaafada Biyo kule ee magaalada Boosaaso.
Arrintaasi oo ay hadda kulan kaleeyihiin madaxda, odayaasha, waxgaradka, iyo
culumaa’udiinka gobolka.
Tacshiiradan rasaaseed ee saaka ka dhacdey bartamaha magaalada Boosaaso ayaa
waxay saameyn yeelatey iso socodka gaadiidka iyo dadweynaha ee goobaha iska
horimaadku ka dhacay, iyadoo sidoo kale suuqa weyn ee magaalada Boosaaso
gabaabsi uu ku yimid isu socodka ganacsiga iyadoo goobta tacshiiradu ka
dhacdey ay ku taal duleedka Suuqa weyn ee Magaalada Boosaaso .
warar somalitalk.com ay ka helayso dad xog ogaal ah oo goobtaasi ku sugan
ayaa waxay sheegayaan in ciidamada amaanka ay adeegsadeen gaadiidka
dagaalka, oo ku doonayeen inay ku jabiyaan iska cabin ay kala kulmeen kooxda
hubaysan ee ku sugneyd guriga.
Tacshiiradii ay isdhaafsaneyeen kooxaha hubaysan iyo ciidamada amaanka ayaa
wararku sheegayaan inay sababtey khasaare kooban oo soo gaarey guryo ku yaal
goobta tacshiiradu ka dhacdey.
bashiir cumar cali/bosaaso
bashiir137@hotmail.com
Ciidamada Ethiopia Ee Ku Sugnaa Deegaanka Gubta Oo Saaka Faaruqiyey
Goobtaasi.
Muqdihso: Ciidamada xukuumada Ethiopia oo maalinmadii shalay
baaritaano xoogan ka wadey xaafada gubta ee deegaanka dayniile oo
halkaas ka samaystay Fadhiisano mudo labo maalmood ah ayaa saaka
faaruqiyey goobtaasi Kadib markii la sheegay in dad badan oo shacab ah
oo ku xanibnaa guryahooda ay halkaasi ka taxaabteen islamarkaan aan la
ogayn halka iyo goobta ay geeyeen.
Ciidamadda xukuumada Ethiopia ayaa iyagu yimid deegaankan gubta kadib
markii maalintii isniintii ay dagaalo iskaga hor yimaadeen iyaga iyo
xoogaga kasoo horjeeda islamrkaana halkaasi ay ka dheceen dagaalo
Qasaarooyin Geystay waloow ay dad deegaanka ku dhaqani saxaafada u
sheegeen in halkaasi dagaalka kadib ay ciidamada ethiopia xasuuq ba,an u
gaysteen dadka rayidka ah .
Sidoo kale ciidamadan ethiopianka ah ee saaka faaruqiyey deegaankaasi
gubta ayaan la ogayn sababaha keenay inay saaka goor hore iskaga guuraan
deegaankaasi.
Dhinaca kale dadka tirada yar ee ku sugan xaafadaasi ayaa soo
dhoweeyey ka guuritaanka ciidamada ethiopia oo sheegay inay inta ay
deganaayeen ku sugnaayeen wel wel iyo walaac cabsiyi ku dheehen tahay
taasoo ay sheegeen inay ka uruursadeen dhalinyarada da, yarta ah ee ku
sugnayd goobtaasi islamrkaana aysan ogayn halka iyo goobta ay ku sugan
yihiin waqti xaadirkan iyo xaaldaooda nololeed .
Wadooyinka Soo Gala Xamar -weyne Iyo Xamar Ja-jab Oo Xaniban
Maalintii Labaad.
Waxaa maalintii labaad xiran wadooyinka soo gala degmada xamar weyne
iyo xamar ja-jab ee gobolka banaadir kadib markii halkaasi ay gooyeen
Ciidamada dawladda FKMG ah oo baaritaano hubeed kawada halkaasi .
Ciidamada Booliska FKMG oo shalay halkaasi ka bilaabay howlgallo ay
ku baadi goobayaan hub iyo walxaha qarxa sida ay sheegeen ayaa la
sheegayaa in maantana sidoo kale howl gal kale ka bilaabeen islamarkaana
ay xaniban yihiin gaadiidka isaga kala gooshi jiray deegandaasi iyo
weliba howlaha ganacsi ee degmooyinkaasi .
wadooyinka waaweyn ee soo gala degmooyinkaasi ayaa waxaa buux dhaafiyey
ciidamo aad u fara badan oo kuwa dowlada KMG ah iyadoo ay ku yar yihiin
dhaqdhaqaaqa dadka rayidka ah oo si teel teel ah loogu arkayo wadooynka
qaarkood .
Dhaqdhaqaaqan ciidan ee ka socda wadooyinka soo gala degmooyinka
xamar-weyne iyo xamar jajab ayaa kusoo beegmaya xili ay ka jiraan
caasimada dagaalo kafool kafool ah iyo weliba qaraxyo ka dhacay
habeenadii lasoo dhaafay oo u dhexeeya ciidamada dowlada iyo kuwa
ethiopia oo dhinac ah iyo kooxaha kasoo horjeeda .
yaasiin maxamed cali (faytin)
yaasiinfaytin@hotmail.com
Weriye Cawaale oo Xabsiga Dib loogu Celiyey
Shalay [Jan 9, 2008] ayaa maxkamad la keenay weriey
Cawaale Jaamac Salaad oo muddoo kuxiran
magaalada Boosaaso, laakiin Guddoomiyaha maxkamada Maxamed Cabdi Awaare ayaa
sheegay in dacwadda dib loo dhigay ilaa Axada isagoo aan sharraxaad kabixin
sababta, sidaasna markale xabsiga loogu ciliyey weriyaha.
SomaliTalk bosaso
Faafin: SomaliTalk.com | Jan 10, 2008