- Wasiirka Arrimaha Dibadda ee DFKMG Soomaaliya "Itoobiya
Waxay bur-burisay khatar xoog leh oo halis galisay"
- Siyum Musfin Oo Dhex- dhexaadinaya C/laahi Yuusuf iyo
Nuur Cadde iyo isagoo Qaadacay Wada Hadalka Ururka Dib U
Xoraynta iyo DFKMG....
- Degmada Buraan ee G/Sanaag oo laga hir galiyay adeeg
Isgaarsiineed
Ciidamada DFKMG oo diley Nin ay Walaalo ahaayeen Wasiirka Warfaafinta
DFKMG: Waxaa magaalada Muqdisho [Feb 27, 2008[ toogasho lagu diley Abuukar
Cabdisalaam oo ay walaalo ahaayeen Wasiirka dhowaanta loo magacaabay Waraafinta
DFKMG, Axmed Cabdisalaam. Wararku waxay tibaaxeen in arrintani ay dhacday kaddib
Ciidmada DFKMG ay arkeen ninkan oo gurigiisa hortaagan oo ku hadlayey Telefoonka
gacanta, markaasna ay ka shakiyeen oo cayrsadeen, oo toogasho ku dileen. [Tixraac]
Wasiirka Arrimaha Dibadda ee DFKMG Soomaaliya "Itoobiya Waxay bur-burisay
khatar xoog leh oo halis galisay"
Jingali: "Dadadka wax heysta oo Somalida ah ayaan ogoleyn in la helo
maamul dowladeed oo shaqeeya..."
Wasiirka Arrimaha Dibada iyo Iskaashiga Caalamiga ah ee DFKMG wadanka
Somaliya Cali Axmed Jaamac Jingali ayaa xalay [Feb 27, 2008] kulan gaaban la
qaatay Jaaliyadda Soomaaliyeed ee Wadanka Uganda, waxaana kulankaas oo uu
soo qaban qaabiyay Sii-hayaha Safaaradda Soomaalida ee Uganda Cadulqaadir
Faarax uu wasiirku uga sheekeeyayay qodobo dhowr ah oo la xiriira siyaasadda
Dowladda FKMG, Nabadda, joogista Ciidamada Itoobiya, doorashada 2009, iyo
Furitaanka Safaaradda Somaaliya ee Uganda.
Kaddib warbixin guud oo guddoomiyaha Jaaliyadda uu Wasiirka siiyaya ayaa
Wasiirku wuxuu hadalkiisa ku billaabay "Dowladda Uganda aad iyo aad ayay noo
gacan qabtay, wax la isku aamino tii ugu fiicneyd ayay Somaliya ku aaminten,
taas oo ah wiishashooda, waayo waxay u dhabar adeygeen in ay wadan
dhibaateysa ciidankooda geeyaan, si ay uga qeyb qaataan Nabad ku soo
dabaalista Somalia, waxay saaxiib aad u dhow yihiin dadka Soomaaliyeed meel
kasta oo ah joogaan, mar kasta oo aan la sheekeysano, waxay noo sheegaan in
Dadka Soomaaliyeed ee Ugadan degan ay yihiin dad Nabad iyo wanaag ku jooga,
runtiina waa abaal ay noo galeen" ayuu yiri Wasiirka oo intaas sii daba
dhigay "Safaaradda Somaliya ee Uganda goor dhow waa howl galeysa, waxaa
magacaaban Safiirka Somaliya ee Uganda Sayid Axmed Sheekh Daahir, waloow ay
jirto dhaqaale la'aan aad u xoogan, hadana dano xoog leh ayaa naga dhexeeya
Uganda waana howl galeysaa Safaaraddu goor dhow"
Mar wax laga weydiiyay dib u heshiisiinta iyo Ururka dib u xoreynta Somalia
ee jooga Asmara wuxuu yiri "Dowladda cusub ee tirada yar leh waxay jidka u
xaaqeysa nabadda iyo Dib u heshiisinta, waana in qof kastaahi dhexda marada
ku xirtaa si loo helo qaran taagan, kooxda Asmara waxay ku dhegan yihiin hal
qodo oo ah Waa in IToobiya dalka ka baxdaa, laakiin maahan in ay is
toxbiyaan oo meel ay qabsadaan, inaga waxaan dooneynaa in ay dowladnimada ay
nala qeyb sadaan, diyaar ayaana u nahay in ay maamulka wax ka qeybsadaan,
runtiina qof kastaahi waa inuu ogaadaa in dowladdu ay tahay mid loo dhamaado
waayo Dano kulmay oo la isku af garto ayaa fuliya ujeedo la la isku raacsan
yahay, xilli kasta waan la xiriirneynaa waana soo dhaweyneynaa is fahan na
dhex mara, shacbka kale qudhoodu ha ogaadeen in ay wax ku leeyihiin dib u
heshiisiinta, waana in dad badan oo aamusan ay hadalaan oo wax la wada
toosiyo, danta Soomaaliyeedna laga fikiraa"
"In la heshiiyaahi waa muhiim, isku dhag-dha, ka carar iyo kala qeybsanaan
siyaasadeed waxba ma tareyso, dad badan oo is gumaaday oo ba' iska
raacsiiiyay ayaa heshiisay, bal eeg Rwanda waxa ka dhacay, ma is leedahay
marka in ay dad saaxiibo ah oo is dhexgala, wada ganacsada, isla kaftama ay
heshiin waayaan?, waa in laga heshiiyaa, la isna aaminaa oo meesha laga
saara is fahamdarrida yar ee jirta" ayuu sii daba dhigay Wasiirku.
"Waxaa nasiib darro ah in 5-tii sano ee Dowladda KMG loogu talo galay ay ku
dhammaan rabto khilaaf iyo kala fogaasho, in kasta oo shirkii dib u
heshiisiinta ee dhawaan la qabtay uu xoogaa is bedel ah sameeyay, taas oo ay
ka mid tahay Xukuumad yar oo tayo leh oo tan maanta shaqeyneysa ah"
kulankii Jaaliyadda Somalida ee Uganda iyo Jangali
Su'aal Somalida Uganda ay weydiisay Wasiirka oo aheyd YAA KA DAMBEEYA DHIBKA
SOMALIYA KA JIRA? wuxuu Wasiirku uga jawaabay "Laba arrimood ayaa ka
dambeeya dhibka Somalia ka jira, 1, Dadadka wax heysta oo Somalida ah ayaan
ogoleyn in la helo maamul dowladeed oo shaqeeya, waana arrin la yaab leh in
fidno ay hor kacaan dad hantiile yaal ah, adduunka waxaa jirta in dadka
xoolaha heystaahi ay iyagu Nabadda raadinaay si ganacsigooda iyo
dhaqaalahooda ay u nabad galaan, iyo 2, aaminaad darro siyaasadeed oo ka
timid ku xadgudubkii ama abuse loo geystay dowlad shaqeyneysay oo meesha
laga saaray, waxaana idiin sheegayaa in aan lagu mar-marsiyoon American iyo
Itoobiyaan ayaa diidan Nabadda Soomaaliya ee inaga ayaa isku diidan"
Bixid: Jangali
Mar uu ka hadlay Mr. Jingali sida ay ciidamada Itoobiya dalka ku soo galeen
wuxuu yiri "Itoobiyaanku ma dooneyn, mana doonayaan wax la yiraahdo Jihaad
lala galo, waxayna u aragtay khatar xoog leh oo soo foodsaartay kooxihii
watay Jihaadka, mana jirto Dowladda fiirsaneysa khatar ku soo wajahan
jiritaankeeda, maantana waxay diyaar u tahay in ay Soomaaliya ka baxdo, in
kasta oo dadka qaarkiis ay aaminsan yihiin in Itoobiya ay wadanka qabsatay,
hadana waa wax kama jiraan oo ma dhici karto dal dal kale qabsadaahi maanta
oo qarnigii 21-aad lagu jiro"
Wasiirka oo Saadaal ka bixinaya doorasho kaddib dowladan hadda jirta ayaa
yiri "Waxaa hubaal ah haddii ay sidan ku sii socoto in aysan dhaceynin
doorashada 2009, in ay nooga darto ayaa suurto gal ah Doorasho, waayo
dowladda dhisanaa ayay qal-qal galisay, qaarkoodna waa bur-burisay, laakiin
haddii Xukuumadda aan hadda ka tirsanahay ay u hirgasho qorshaha doorasahda
iyo diyaarinta Tastuur xoogan, waxaa dhici karta in wadanku uu jawi nabadeed
uu galo, la iskuna fahmo dano kulma oo horumar horseeda"
W/D: Faarax Maxamed Cali (Faarax Blue)
Kampala, Uganda
Email:
farahblue_545@hotmail.com
Ogaysiis Muhiim ah oo ka Yimi Shirkada Golis
Bosaaso:- Waxa la ogaysiinayaa Macaamiisha Sharafta leh in Shirkada Golis
Telecom ay wax ka bedeshay Furayaashii dibada looga soo waci jiray waxana
laga dhigay sidan soo Socota, Moobilka waxa dibadda looga soo wacayaa
00252-90-, Fixed Line-ka Waxa dibada looga soo wacayaa
00252-5.
Fadlan la soco hadii Mobilka dibada looga soo waco Furaha ah:- 00252-5 Masoo
galayo Khadku, Sidaasi darteed waxaan Macaamiisha Shirkada Golis ka
codsanaynaa inay Eheladooda Asxaabtooda iyo Qaraabadooda ka soo wacaya
Dibadda ay Sidaas ula socodsiiyaan.
Xafiiska Suuq Gaynta ee Shirkada Golis
Siyum Musfin Oo Dhex- dhexaadinaya C/laahi Yuusuf iyo Nuur Cadde iyo isagoo
Qaadacay Wada Hadalka Ururka Dib U Xoraynta iyo DFKMG....
Masuuliyiinta ugu sarsaraysa dowladda FKMG ah ayaa maalintii shalay [Feb 27,
2008] ahayd u ambabaxay magaalada baydhabo kadib markii uu isugu yeeray Wasiirka
arimaha Dibada Siyum Musfin oo la sheegay inuu kala dhex galayo c/laahi yuusuf
iyo Col Nur cadde oo khilaaf soo kala dhex galay.
Khilaafkan ka dhex taagan masuuliyiinta dowlada FKMG ah oo dhowaanahanba ahaa
mid sii xumaanayey ayaa la sheegayaa inuu madaxa la galay meeshii ugu darayd
islamarkaana uu salka ku hayo dadaalka Nuur cadde uu ku doonayo inuu Mucaaridka
dowlada KMG ah sidii uu wada hadal ula yeelan lahaa iyo madaxweynaha DFKMG
yuusuf oo arintaasi kasoo horjeestay.
Sidoo kale kulankan lagu dhex dhexaadinayey madaxweynaha DFKMG yuusuf iyo
Nuur cadde oo ahaa mid ay albaabadu u xirnaayeen ayaa warar hoosaadyo laga
helayo sheegayaan in wasiirka arimaha Dibada Ethiopia uu khasab kaga dhigay Nuur
cadde inuu joojiyo wada hadalka uu ku doonayo inuu la yeesho Masuuliyiinta ugu
sarsarysa ururka dib u xoraynta soomaaliya oo fadhigoodu yahay Xarunta wadanka
Ereteriya ee Asmara .
Siyum Musfin oo ah wasiirka arimaha Dibada Ethiopia ayaa sidoo kale la
sheegay inuu Ururka dib u xoraynta soomaaliya oo dhowaanahanba Raysal wasaaraha
DFKMG nuur cadde uu dhinaca isgarsiinta wada hadalo kula lahaa sidii uu isugu
soo dhoweyn lahaa iyaga iyo dowlada FKMG ayuu ku sheegay wasiirku inay
argagixiso yihiin islamarkaana uu Gaashaanka ku dhuftay inuusan Nuur cadde wax
wada hadal ah la yeelan Karin.
Dhinaca kale khilaaf gacan ka hadal keenay oo dhex maray madaxweynaah DFKMG
c/laahi yuusuf iyo gen.gabra ayaa la sheegay inuu wasiirku kala hadlay arintaasi
madaxweynaha DFKMG islamrkaana aan la ogayn waxa kasoo baxay waloow ay warar
hoosaadyo laga helayo madaxtooyada baydhabo sheegayaan inuu madaxweynaha DFKMG
yuusuf iyo Musfin ay isla meel dhigeen in loo madax baneeyo Gen,Gabra inuu meel
kasta oo lagu sheego waxa loogu yeero argagixisada iyo ONLF ay tegi karaan
ciidamada Ethiopia ee wadanka soomaaliya jooga .
Wada hadalkan sadexda masuul ayaa kusoo beegmaya xili uu khilaaf ba'ani soo
kala dhex galay dowlada FKMG ah dhexdeeda oo ay weheliyaan khilaaf kale oo u
dhexeeya sarkaalka ugu sareeya ciidamada xukuumada Ethiopia ee wadanka
soomaaliya ku sugan iyo madaxweynaha DFKMG yuusuf taasoo aan la ogayn halka uu
ku damabyn doono waloow ay dowlada Ethiopia dadaalo ugu jirto sidii ay u dhamayn
lahayd khilafkaasi sidii ay danaheeda uga fushato wadanka soomaaliya .
yaasiin maxamed faytin
yaasiinfaytin@hotmail.com
Degmada Buraan ee G/Sanaag oo laga hir galiyay adeeg Isgaarsiineed
Buraan:- Degmada Buraan ee ku taala Gobolka Sanaag ayaa
maanta [Feb 28, 2008] si rasmi ah looga hir galiyay adeega Isgaarsiineed taasi oo ay Fulisay
Shirkada Golis oo ah Hormuudka Isgaarsiinta ee Casriga haatan la joogo, dadka
Deegaanka ayaa sheegay inay aad u sood dhaweeyeen adeegaasi ay Keentay Shirkada
Golis, Buraan ayaan horay ulahaan jirin wax Isgaarsiin ah.
Sida ay noo sheegeen wax garadka deegaanka Buraan waxa maanta si toosa daaha
looga qaaday galinta Talefoonada oo laga hirgaliyay Degmada Buraan, waxa ay
sheegeen in ilaa 250- Guri haatan si toosa loo galiyay Adeegaasi ay Fududaysay
Shirkada Golis.
Maxamuud Cismaan oo ka mid ah dadka Deegaanka ayaa shaaca ka qaaday inay
hawshaasi ay wadaan Shirkada Golis ay aad u soo dhawaynayaan isaga oo intaasi
raaciyay inay dhib wayn ku qabeen Adeega Isgaarsiinta oo aan horay Deegaankaasi
uga jirin.
"Waxaan leenahay hadaanu nahay Shacabka Deegaanka Buraan Golis ku soo dhawoow
Gacmo furan waanuna la shaqaynaynaa dhamaan halwadeenada Shirkada Golis, Buraan
waa magaalo wayn horayna uma lahaan jiray wax Isgaarsiin ah balse maanta waa
Ilaahay Mahadiisa Shirkada Golis ayaa adeegaasi Fulisay, Saas waxa yiri mid ka
mid ah dadka Deegaanka Buraan.
Degmada Buraan ee hoos timaada Gobolka Sanaag ayaa waxa lagaliyay adeega loo
yaqaan Line-linka oo ka mid ah adeegyada ay Bixiso Shirkada Golis, waxa jira dad
badan oo xusul duub ugu jiray inay iyana shagtaan Guryahooda Adeegaasi.
Shirkada Golis oo adeegan iyadu fulisay ayaa ah mid aad ay u amaanaan Dhamaan
Shacabka Somaliyeed iyada oo tan iyo intii ay dhacday Dawladiid dhexe ee Dalka
Somaliya lays oran karo waa Shirkada kaliya oo Bulshada Somaliyeed baahideeda
Dabooshay.
Gobolka Sanaag ayaa waxa uu ka mid yahay Gobolada sida aadka ah looga Isticmaalo
Adeegyada Shirkada Golis iyada oo dhawaan farta laga jaray Magaalooyinka
Xingalool, Ceelbuh, Hadaaftimo, Dhahar, iyo Badhan.
[Taariikhda degmada Buraan hoos ka akhri.....]
Wasiirka Xanaanda Xoolaha iyo Beeraha ee Maamulka Puntland ayaa
gaadhay Magaalada Dhahar ee G/ Sanaag
Dhahar: Wasiirka Xanaanada iyo Xoolaha Beeraha iyo
Deegaanka ee Maamulka Goboleedka Puntland Cali Jaamac Faarax (Cali Buureed)
ayaa mudo laba cisho ah ku sugnaa Magaalada Dhahar ee Xarunta Gobolka Booxaaro
halkaasi oo la sheegay inuu wada hadal joogta ah kula leeyahay wax garadka
Deegaanka Dhahar, waxa la sheegay inay Buureed iyo dadka Deegaankaasi ka wada
hadleen adkaynta Nabad gelyada.
Wasiirka Xaanada Xoolaha ee Puntland Cali Jaamac Faarax Buureed ayaa waxa la
sheegay inuu aad dadka Deegaanka ugu baraarujiyay inay ka hor tagaan wax alaale
wixii Amaanka Deegaanka Maja xaabinaya, Cali Buureed ayaa shaaciyay inay Jiraan
kuwa doonaya inay Amaanka Mandaqada Sanaag wax yeeleeyaan balse loo baahan yahay
inay dadka Deegaanku arinkaasi garwsanaadaan.
Cali Buureed ayaa sidoo kale sheegay in xaalada Gobolka oo idil ay haatan tahay
mid Degan oo aanay jirin wax dhiila Colaadeed ah oo haatan taagan marka laga
reebo tii dhawaan ka dhacaday Magaalada Badhan ee xarunta Gobolka Booxaaro,
isaga oo taasina ku til maamay mid laga soo Abaabulay Magaalada Hargaysa oo la
doonayay in dadka Deegaankaasi Amaankooda wax la yeelo balse ay ka guulaysteen
dadka Deegaanku oo ay iska caabiyeen kuwii falkaasi maleegayay.
Cali Buureed ayaa horay ugu sugnaa Magaalada Boosaaso ee xarunta Gobolka Bari
isaga oo markiiba Safar deg deg ah ugu booqlay Magaalada Dhahar oo uu deegaan
ahaan ka soo jeedo, taasi ayaa timi ka dib markii la sheegay inay Amaanka
Gobolka ay Qas ku wadaan Kooxo laga soo maleegay Magaalada Hargaysa.
Guud ahaan xaalada Gobolka Sanaag ayaa ah mid Degan oo aan saasi looga soo
qalinayn, iyada oo ay dhawaan qorshihii ay ka wateen Badhan ku guul daraysteen
Kooxo Laaluush ka soo qaatay Maamulka Hargaysa kuwaasi oo doonayay inay Barakac
iyo dagaal hore ka dhaliyaan Gobolka Sanaag oo inta badan lagu tiriyo inuu
safka hore kaga jiro Gobolka Degan marka la eego xaalada Dalka Somaliya uu
maanta maryo.
Jaamac Ayaanle Feyte
Somalitalk.com
Feyte37@hotmail.com
Taariikhda degmada Buraan
Degmada Buaraan waxay ka mid tahay magaalooyinka ugu faca weyn soomaaliya ,
sida ay sheegaana odayaal taariikhda aad u yaqaan waxaa magaaladaa la aasaasay
waqti hadda laga joogo dhowr qarni.
Magaalada buraan waxyaalaha lagu xasuusto ee taariikhiga ah waxaa ka mid :
In ay xarun u ahayd taliskii daraawiishta ee uu hogaaminaayey sayid Maxamad
Cabdulle Xasan.
Waxaa ku yaal iskool aad u fac weyn oo la dhisay 1958 xilligii ingiriiska.
Waxaa ku yaalla ceel durdur ah oo aanay biyihiisu guran g,u iyo
jiilaalba,waxaana mar walba joogto looga helaa caano iyo hilib maadaama ay
xooluhu ku dhowyihiin iyo reeguurugaba ceelka awgiis iyo daaqa oo aad u fiican
mandiqadda guud ahaan gaar ahaan Buraan iyo nawaaxigeeda.
Waxaa ku yaal iskool loogu talagay ilbixinta reer miyiga iyo dadka waaweyn
laguna barto farsamooyin kala duwan .
Waxaa ku yaala beero aad u facweyn oo ay ka baxaan timir iyo noocyo badan oo
khudaar iyo furut ah.
Waxaa sandkii 1974 laga hirgeliyey Buraan xarun qaxooti oo la isugu keenay reer
miyigii xooluhu ka raaceen abaartii Daba dheer, waxaana xilligaa booqasho ku
yimi madaxweynihii jamhuuriyadda ee xilligaas Maxamad Siyaad Barre alle ha u
naxariistee.
Waxay Buraan ahayd rug ganacsi oo qadiimi ah oo ay ka furnaayeen dukaamo aad u
fara badan oo gaarayey ilaa 30 dukaan oo aad u camiran waa 1976 iyo waxii ka
horeeyey.
Magaalada Buraan waxaa wax ku soo baraty aqoonyahnno soomaaliyeed oo aad u faro
badan , ilaa iyo maantana waxaa wax ku barta dhalinyaro aad u badan, waxaana
hadda socda oo ay wadaan dhalinyaro reer Buraan ah barnaamij horumarineed oo
xagga wax barashada ah.
Waxaan ku soo gunaanadayaa warbixintaas ku saabsan Buraan in ilaahay soomaaliya
oo dhan ka dhigo gaarsiiyo nabad iyo horumar iyo inay soomaaliya noqoto mid u
soo jeensata xagga horumarka iyo nabadda.
Waxaana halkan mahadnaq gaar ah u soo jeedinayaa shirkadda Golis oo hirgelisay
taleefanka Buraaan iyo maagaalooyin badan oo soomaaliya ah.
Maxamd Bashiir jaamac
gumburi1885@yahoo.com
Faafin: SomaliTalk.com | Feb 28, 2008
|