Kulan ay albaabada u xiran yihiin oo dhex maray Ra’iisul
Wasaare Nuur Cadde iyo Commissioner Louis Michel …
Ra’iisul Wasaaraha DFKMG ah Mudane Nuur Xassan Xusseen ( Nuur
Cadde) oo beryahaan socdaal ku marayay magaalada xarunta u ah
Midoowga Yurub ee Brussels ayaa shalay kulan ay albaabada u
xiran yihiin la yeeshay Madaxa Horumarinta iyo Gargaarka Aadmiga
u qaabilsan Guddiga Midoowga Yurub Mr. Louis Michel. Kulan oo ay
ku yeesheen xarunta Midoowga Yurub ayaa waxaa ay labada mas’uul
ka wada hadleen arrimo iskugu jira xaaladda guud ee dalka
Soomaaliya iyo kaalinta uu Guddiga Midoowga Yurub ka qaadan
karo.
Ugu horeyntii waxaa furey Mr. Michel oo soo dhoweyn iyo
hanbalyo gaarsiiyay Mudane Cadde iyo wafdiga uu hor kacayay
wuxuuna ugu hanbalyeeyay ra’iisul Wasaaraha cusub sida uu ugu
guntaday is badal cusub oo xagga nabadda ah wuxuuna ku dhiiri
galiyay inuu sii wado aragtidiisa ku aadan sida wada hadal wax
loogu xallin lahaa.
Commissioner Michel ayaa sheegay in uu Guddiga Midoowga Yurub
ugu talo galay muddo shan sano ah oo ka bilaabanaysa 2008 da
lacag dhan 254 million oo ah Euro halka uu sheegay in ay ugu
talo galeen 15 million howl gallada Ciidamada nabad ilaalinta
Soomaaliye ee ka imaanaya dalalka Africa (AMISOM).
Wuxuu kaloo Michel uu sheegay in ay jiraan dad gaaraya 2
milyan oo ka bara kacay amni xumo in ay u baahan yihiin gargaar
biniaadannimo.
Dhinaca kale Ra’iisul Wasaare Cadde ayaa shalay kulan kula
yeeshay baarlamaanka Midoowga Yurub Madaxa Guddiga Arrimaha
Dibadda Baarlamaanka Yurub Mr. Wolskiafe iyo Madaxa Horumarinta
Guddiga Baarlamaanka Yurub Mr. Borrel iyo dhow xubin oo ka
tirsan Baarlamaanka Yurub oo ay ka mid yihiin Ms.Ane Gomes iyo
Ms. Kinnock halkaasoo ay labada dhinac isku waydaarsadeen arrimo
kala duwan oo isugu jira kaalinta Baarlamaanka Yurub ee arrimaha
horumarinta Soomaaliya.
Dhanka kale Ra’iisul Wasaare Nuur cadde ayaa u kicitimay
Magaalada Paris ee dalka Faransiiska isagoo halkaasi kulan kula
lahaa madaxda dalka Faransiiska.
Dada ad ugu dhow Mudane Cadde oo aan waydiiyay sababta uu u
aaday Paris ayaa ii sheegay inuu ka helay casuumaad madaxda
dalkaasi Faransiiska.
Saida Sheikh Ahmed (VIP)
Brussels Belgium
FG Xuquuqda sawirrada waxay u dhowran tahay Saida VIP
Kulanka Cadde iyo Commissioner Michel oo English ah
hala aqriso links kaan http://europa.eu/