Barnaamijkii Radio Xoriyo
06 December 2008.
Waxyeelooyin cadawgu ugaystay dad shacab ah
Laanqayrta Cas oo ka digtay xaaladda Geeska Afrika
Shir kadhacay Lexington ,Nebraska -usa
Madaxwayanaha DFK Somalia oo baydhabo kadagay
Barnaamijkeenii N/huraha dhaartay iyo dhacdooyinka joogtada
ah(N/hurto Ardo Maxamed)
======================
Waxyeelooyin cadawgu ugaystay dad shacab ah
Cidammada gumaysiga Itobiya ayaa waxyeellooyin kala duwan u
gaystay dadwayne rayd ah oo ku kala sugan meelo kala duwan oo
Ogaadeenya ka mid ah. Waxyeellooyinkaasi waxay u dhaceen
sidatan;
23/11/08 Dusmo, oo Awaare ka tirsan, waxay ciidammada gumaysigu
jidhdil ba’an ugu gaysteen 3 qof oo shacab ah oo kala ah;
1- Bisle Jaamaca bakayr
2- C/nuur Maxamed Mataan iyo
3- Raxma Axmed basey, oo ay iyada la tageen.
22/11/08 magaalada Dannood waxay ciidammada gumaysigu ku
xidhxidheen 44 qof oo shacab ah. Dadkan, oo aan magacyadoo dib
idiinka soo sheegi doono, ayaa la sheegayaa inay ciidammada
gumaysigu xukumeen.
19/11/08 Garbo waxay ciidammada gumaysigu ku xidhxidheen dadka
kala ah
1- Fahiimo Sh Cali
2- Jarane Cali-yare iyo
3- Maxamed Diini Sh Maxamed
18/11/08 Higlaale waxay ciidammada gumaysigu jidhdil ba’an ugu
gaysteen 4 qof oo shacab ah, oo kala ah;
1- Axmed Mataan, oo 80 jir ah
2- Ina Axmed Mataan oo magaciisa aanaan haynin iyo
3- Cali cabdi Aw Isaaq
17/11/08 Sasabane waxay ciidammada gumaysigu ku xidhxidheen labo
nin oo shacab ah oo lagu kala magacaab Xuseen-Dheere iyo Garas
oo magacyadooda oo buuxa aanaan haynin.
Isla 17/11/08 magaalada Wardheer waxay ciidammada gumaysigu ku
xidheen gabadh lagu magacaabo Nasro Maxamed Khaliif.
30/11/08 Aftinta, oo Awaare ka tirsan, waxay ciidammada
gumaysigu ku gubeen 3 Aqal oo ay kala lahaayeen;
1- Maxamed Muuse Axmed. Ninkan waxay sidoo kale ka dhaceen 400
oo Bir
2- Axmed Muuse Axmed iyo
3- Jinow Xasan Xuseen
Laanqayrta Cas oo ka digtay xaaladda Geeska Afrika
Ururka Caalamiga ah ee Laanqayrta Cas ayaa si wayn uga digtay in
gobolka Geeska Afrika uu qarka u saaran yahay macaluul ba’an oo
la soo darista, haddii xilli roobaadkan ayna dalagyo macquul ahi
ka soo go’in Beeraha.
War ka soo baxay Dallada Guud ee Laanqayrta iyo Bisha Cas ayaa
lagu sheegay in dhibaato ba’an ay ku soo fool-leedahay gobolka
Geeska Afrika, haddii xilli roobaadkani uu noqon waayo mid si
fiican loogu doogsado.
Warkan ayaa lagu sheegay in Qaramada Midoobay ayna raashiin ku
filan gaadhsiinin meelaha ay Abaaruhu sida daran u
waxyeelleeyeen, sidaas darted ay Laanqayrta Cas billowday inay
xoojiso hawlgalladeeda gobolka la xidhiidha, sidaas waxaa lagu
sheegay war-murtiyeedkan, oo laga soo saaray magaalada Warso ee
dalka Poland, halkaasoo uu ka socdo shir lagaga hadlayo
Is-beddalka Cimilada adduunka.
Cuntada gobolka Geeska Afrika ayaa si wayn hoos ugu dhacay, ka
dib markii uu wax soo saarku is dhimay, isla markaana sicir
bararka adduunka ka jira uu saamayn xun ku yeeshay gobolka.
Bishii Sebtember waxay Qaramada Midoobay sheegtay in qiyaastii
17 milyan oo qof oo ka mid ah dadyowga ku dhaqan gobolka Geeska
Afrika ay baahi ballaadhan u qabaan gargaar degdeg ah, balse
deeq bixiyayaasha caalamku ay ilaa iyo ku deeqeen kala badh
lacagihii ay Qaramada Midoobay ka codsatay.
Laanqayrta Cas waxay sheegtay inay u diiwaan gashan yihiin ilaa
iyo 600,000 oo qof oo intooda badani ay ku nool yihiin
Ogaadeenya, kuwaasoo ay noolashoodu si toos ah ugu xidhan tahay
gargaarka, isla markaana aan haysanin wax kaloo ay ku
noolaadaan.
Ururka Laanqayrta Cas wuxuu sidoo kale sheegay inuu qorshaynayo
inuu cunto u fidiyo, Ceelalna u qodo qiyaastii 400,000 o qof oo
ku dhaqan dalalka Jabuuti, Soomaaliya iyo Kenya .
Shir kadhacay lexington,Nebraska -usa
Maalintii ay taariikhdu ahayd 11-29-08 ayaa waxaa shir balaadhan
isugu yimid Jaaliyadda Ogadenia ee Magaalada Lexington,
Nebaraska ee dalka Marayknaka.
Shirkan oo looga wada hadlayeyy la'isagana warbixinayay xaalada
guud ee Ogadeniya iyo dhibaatooyinka ka baxsan bani'aadamnimada
ee ay Xukumada Itoobiya ku hayso Shacabka Ogadeniya, ayaa waxaa
isugu yimid guud ahaan Jaaliyadda magaalada Lexinton iyo waliba
masuuliyiin ka soo kicitimey Magaalooyinka Mataanaha ah ee
Gobolka Minnesota, mas'uuliyiintaas oo ay ka mid ahaayeen
Mohamed Ahmed Daahir, Marwo Haweeya Xirsi Mahad iyo Cumar
Maxamed Aaden
Mas'uuliyiintii ka socotey Gobolka Minnesota ayaa mahadnaq
balaadhan kadib dadweynihii halkaas isagu yimid uga warbixiyey
xaalada ay mareyso halganka shacabka Ogadeniya ugu jiro aayo
katashigiisa. Waftiga reer Minnesota waxay dadweynihii shirka
isagu yimid uga digeen in ay ka digtoonaadaan Gumeysi
kal-kaalka. Waxaa iyaguna halkaas ka hadley dadweyne badan oo
aad u qiireysnaa. Kuwaas oo aad wejiyadooda ka akhrisaneyo
cadhada ka haysa Xukumada Itoobiya.
Shirkan oo socdey qiyaastii mudo 7 saacadood ah ayaa ku
dhamaadey jawi heer sare ah
Madaxwaynaha DFK Somalia oo baydhabo kadagay
Baydhabo(AllPuntland)- Madaxweynaha Jamhuuriyada Soomaaliya Md.
C/laahi Yuusuf Axmed oo duhurnimadii maanta ka soo duulay
Magaaladan Jabuuti ayaa diyaaradii siday ay caga dhigatay
Magaalada Baydhabo ee xarunta baarlamaanka Soomaaliya.
Madaxweynaha Soomaaliya C/laahi Yuusuf Axmed waxaa siweyn ugu
soo dhaweeyey Magaalada Baydhabo mudanayaasha baarlamaanka
Soomaaliya ee ku sugan Magaaladaasi iy dadweyne fara badan.
Amaanka Madaxweyne Yuusuf ayaa aad loo adkeeyey maanta, waxaana
la xiray inta badan wadooyinka soo gala Magaalada Baydhabo,
waxaana amaanka adkeeyey ciidamada qalabka sida ee dawladda
Faderaalka ee Soomaaliya.
Yuusuf ayaa bilaabay kulamo kala gedisan oo uu la leeyahay
gudoonka sare ee baarlamaanka Soomaaliya, wuxuuna kala hadlayaa
xaaladaha qalafsan ee ka taagan gudaha dalka Soomaaliya, siiba
khilaafaadka dhinaca Sharciga ah ee ka taagan Madaxda dawladda
Faderaalka ee Soomaaliya.
Wafdiga Madaxweynaha Soomaaliya ayaa 6-dii saacadood ee lasoo
dhaafay joogay dalka Jamhuuriyada Jabuuti, waxa ayna kula
kulmeen dalkaasi Madaxweynaha Jamhuuriyada Jabuuti Ismaaciil
Cumar Geelle oo ay kala hadleen sidii wax looga qaban lahaa dibu
heshiisiinta dalka Soomaaliya.
Imaanshaha Madaxweynaha Soomaaliya ee Magaalada Baydhabo ayaa
markale ka dhigaya Magaalada Baydhabo, goob xarun ah Siyaasada
dalka Soomaaliya siiba waxaa lafilayaa in ay todobaadka soo
socda baarlamaanka Soomaaliya yeeshaan kulamo xasaasi ah oo wax
looga qabanayo xaaladaha Siyaasadeed ee Soomaaliya.
Intii ay baarlamaanka Soomaaliya kooramkiisu joogeen Magaalada
Baydhabo, wuxuu Madaxweyne Yuusuf usheegay Mudanayaasha
baarlamaanka ee waqtigaasi ku sugnaa Nayroobi in ay si deg deg
ah ugu laabtaan dalkii Soomaaliya si loo dhiso Xukuumad Qaran.
06 December 2008
Halgan Guuleed
Radioxorio@radioxoriyo.com
Raadioxoriyo@yahoo.com
Radio Xoriyo waxaad ka dhegaysan kartaa Mawjadda 41 MB ee
dhererkeedu yahay 7560 KHZ,iyo internetka
Radioxoriyo.com,Ogaden.com Maalmahaa Talaadada & Sabtida 5:00PM
– 5:30 waqtiga Afrikada Bari