SOMALITALK.COM dahabshiil
w w w . S o m a l i T a l k . c o m
SOMALITALK - WARAR

Ciyaaro xiisa badan oo dhaxmarey London kooxaha Cardiff v Switzerland, Canada v Europe.
  • Mustaqbalkii Kubadda kolayga Soomaaliya xidigaha Minassota MPLS oo cashar siiyay kooxda London. MINASSOTA V LONDON
  • XUSEEN CABDI “ 15 SANO JIR KU DHASHAY DALKA CANADA KANA TIRSAN KOOXDA KUBADDA KOLEYGA SOOMAALIDA CANADA ISLA MARKAANA MUSTAQBAL KU LEH CIYAARTA KUBADDA KOLEYGA”.

Sawirada Ciyaaraha Halkan Ka Daawo...

Tartankii Somali Week Tournament London kana socday garoonka London City Accademy ee ku yaal xaafada Herlesdan, ayaa soo gaarey heer gabagabo ah, iyadoo ay ka soo qayb galayaan dadwayne Soomaaliyeed oo aad u tiro badan oo xiisa u qaba inay daawadaan tartanka kubadda koleyga ee dhaxmaraya kooxo kala duwan oo Soomaali ah kana kala yimid North America & Europe.

Cardiff v Switzerland

Ciyaartaan ayaa bilabatey saacadu markay ahayd 3 galabnimo, iyadoo aad moodo in labada kooxoodba ay doonayaan inay soo bandhigaan ciyaar wanaag isla markaana raba in guulaystaan galabta.

Kooxda Cardiff ayaa si dar dar leh iskula qabsatey jaanta ciyaarta, taas oo u saamaxday inay ka hormaraan kooxda Switzerland .

Dadwaynaha garoonka soo buux dhaafiyay ayaa sacab iyo xamaasad la daba taagnaa labada kooxood, dhalinyaradana waxay muujinayeen ciyaar wanaag iyo asluub.

Kooxda Switzerland ayaa ka daba timid ciyaarta, kadib markii in cabaar ah looga fiicnaa xaga gool dhalinta, inkastoo ciyaaryahankii kooxda Switzerland ugu fiicnaa intii ciyaaraha ay socdeen uusan galabta ka muuqan garoonka, dhaawac ka soo gaarey ciyaarihii hore hadana garoonka ma uusan ka maqnayn ee waxa uu macalin u ahaa kooxdiisa, isla markaana dhiirigalina la daba taagnaa inta ay socotey ciyaarta.

Ciyaaryahankaasna waxaa la yiraahdaa Liibaan, waxana uu kooxdiisa u sitey Numberka 7 aad, ciyaaryahankaan ayaa noqon kara mid ka matala dalka Soomaaliya garoomada caalamka mustaqbalka.

Kooxda Cardiff waa koox diyaarsan, markaa u fiirsato sida ay iskugu xiran yihiin dhamaantood, ciyaartiina waxay ku dhamaatey in kooxda Cardiff ay kaga badiso 70 Dhibcood halka kooxda Switzerland ay ku hakadeen 61 dhibcood.

Canada v Europe.

Labadan kooxood ayaa ahaa kuwa markii ay soo galeen dadkoo dhan ay si gooni ah u xiisaynayeen, madaama raga garoonka soo galay ay ahaayeen ciyaartooydii xulkii qaranka Soomaaliya ee kubadda koleyga iyo macalinkoodii, kuwaas ka fariistey cayaaraha balse weli ciyaara taasna ay u sii dheer tahay inay layliyaan caruur aad u yar yar oo ku nool magaalada Toronto Canada.

Tusaale ahaan kooxda Canada waxaa u safnaa ciyaaryahano caan ah sida CabdulQadir Dhame, Ahmed Tuke , Mohamed Sheikh iyo Macalinkii kooxda Jeenyo / Qaranka Soomaaliya macalin Abdi Dhere, Daa’uud Ahmed, Ahmadeey B, Mustafe Aden.

Kooxda Europe ayaa iyana la shir tagtey rag laga soo xulay magaalooyin kala gadisan balse aan dadaalkooda ciyaareed aad ka liidan xidigihaan cuslaatey.

Dadka Soomaaliyeed ee u soo daawasho tagay ciyaarahan ayaa aad ugu maqsuuday isla markaana sacab iyo dhiirigalin la garab galay labada kooxood, ciyaaryahanada ayaa iyana muujinaayay dadaal iyo xirfad, inkastoo aysan ahayn bari sidii ay ahaan jireen hadana garoonka gees ilaa gees way isku baacsanayeen yaan lagaa tagin.

Ahmed Tuke oo ka mid ahaa ciyaaryahanadii Soomaaliya kubadda koleyga, hadana u safnaa kooxda Canada ayaa dhaliyay gool aad u qurxoon qaybtii hore ciyaarta taas oo ay dadkii garoonka ku jirey u tumeen sacab ( Wonderful Goal).

Ciyaaryahanka Dhame oo ka mid xidigii kooxda Muqdisho iyo xulka Qaranka ayaa isna qaybtii hore ciyaarta waxaa shaatiga la gashtey ciyaaryahanka number 14 u sitey kooxda Europe, taas oo dhawr goor dacwad ka bixiyay sida loo raacayo, balse garsooraha ayaan dhag jalaq u siin cabashada laacibkaan, markii ay socotey cabaar ciyaarta ayaa kubadd u ka helay geeska garoonka dhame fursad uu ku tuuri karo 3 dhbcood ( 3 point) ayaa waxaa si xowli ku difaac is yiri ama Block ciyaaryahanka 14 u sitey Europe, taas oo uu si xirfadaysan hawada ugu direy Dhame ciyaaryahankii kooxda kale, kadibna inta u hareer marey goosha shabaqa ku nasiyay goolka kooxda Europe, waxaana markaas taagnaa garoonka afkiisa waxaana ka qaaday sawir taariikhi ah oo ku lifaaqan warbixintaan.

Dhame ayaa i sheegay qaybtii labaad ciyaarta inuu ka nastey ciyaaryahankii raacayay kadib markii u tusay xogaa waayo aragnimo ah.

Macalin Abdi Dheere ayaa isna muujinayay inuu kooxdiisa Canada wax u tilmaamaya laakinse Goalal badan ka dhaliyay kooxda Europe.

Mohamed Sheikh oo watey number 8 kooxda Canada hadana macalin ka ah dalka Qatar ayaa isna goalal badan ka dhaliyay ciyaarta.

Kooxda Europe ayaa moodaa inaysanba u soo diyaar garoobin inay iska celiyaan kooxda Canada.

Ciyaartiina waxay ku dhamaatey in guusha ay ku raacdo kooxda Canada 58 dhibcood halka Europe ay la timid 46 dhibcood.

Biindhe oo ka mid ahaa ciyaartooyda kooxda Europe, isla markaana ka mid ahaa ciyaartooydii kooxda Jeenyo haatana ku nool dalka Denmark ayaanba soo xadirin garoonka galabta, mar aan la sheekaystey ciyaartii hore ayuu ii sheegay in waa hore ay ugu dambaysay inuu dheelo wax isboorti hadana uu dib u bilaabi doono madaama uu arkay ragiisii oo weli garoonka ku jira, maanta markii ay ii soo baasan saaxiibaday kubadda waaba naxayaa iska daa wax dhali ayuu hadalkiisa ku soo koobay isagoo kaftamaya farxadina ka muuqato.

Ciyaarahaan waxaa garsoorayey garsoorayaashii dalkeena ilaa heer caalami garsoore Ilyaas, Garsoore Mohamed Haji, iyadoo ay goob joogayaal ahaayeen garsoorayaasha kala ah Garsoore Osman Xalane Xarash iyo Garsoore Mohamed Farah.

Gudiga farsamadana waxaa ahaa : Mohamed Abdulahi iyo Abukar Abanur oo ahaa xoghayaha Xiriirka cayaaraha fudud ee Soomaaliya haatana ku nool dalka Holand.

Waxaa ciyaarahaan soo qaban qaabiyay oo isku soo dabariday ururka SSIFO oo ka dhisan magaalada London, mudanayaasha kala ah

  • 1. Hassan Farah ‘’John’’
  • 2. Shiine Guhad
  • 3. Mohamed Sheikh
  • 4. Mohamed Weeroow

Waxaa soo diyaariyay:

Yusuf Yusuf
Secretary General of SSPA & Sports Editor
mrsomalia@hotmail.com
London
England


Mustaqbalkii Kubadda kolayga Soomaaliya xidigaha Minassota MPLS oo cashar siiyay kooxda London.

Xidigaha kooxda kubadda koleyga Soomaalida Minassota MPLS ( USA) ayaa ciyaar aad u xiisa badnayd kala hor yimid kooxda kubadda koleyga London shalayto garoonka London City Acadamy oo ku yaal galbeedka magaalada London xaafada Herlesden, koobka Somali Basketball Tournament Week London 2008.

Ciyaartaan oo ahayd mid ay sugayaan dadka intiisa badan, ayaa hadana garoonka meel laga fariisto ma lahayn intii aysanba bilaabanin ciyaarta, taas oo aad ka garan karto in xiisa gaar ah ay u lahayd daawashadeeda dadwaynaha Soomaaliyeed ee u soo daawasho tagi jirey tartamadaan ka socda Galbeedka magaalada London.

Kooxda kubadda koleyga Minassota ayaa ah koox diyaar garoow adag u soo gashay tartankaan ka socda magaalada London, markaa eegto sida ay ugu diyaarsan yihiin xag walbo, hadii ay ahaan lahayd ciyaartooydooda, maamulkooda iyo isku xirnaanta ku muuqato iyo aqlaaqdaba.

Kooxdatan ayaa soo jiidatey taageerayaal badan oo markii hore is lahaa toloow kooxdee taageeri doontaa?, kadib markii ay soo bandhigeen 3-dii ciyaar ee hore ciyaar aad farsamadeeda u sareyso dadwaynaha ay u boogeen.

Kooxda London ayaa iyana ku biloowday koobkan dardar iyo guulo is daba joog ah, taas oo dad badani ay saadalinayeen in ciyaarta kooxaha London iyo Minassota ay dhaxmari doonto ciyaar aad u wanaagsan.

Dadwaynaha Soomaaliyeed ayaa moodaa inay ku soo balameen ciyaartaan, qaar badan ayaa fasax u soo qaatey inay daawadan galabta ciyaarta si aysan uga baaqanin.

Soomaalidu hadal waa soo koobtey oo waxayna yiraahdeen ‘’fardo lays ku haayo maxaa layskuga/ layskaga faanin’’

MINASSOTA V LONDON

Ciyaartiina waxay bilaabatey saacadu markii ahayd 19:30 fiidnimo saacada London,ciyaartana markaan waxaa dhax dhaxaadinayey garsoorayaal ajanabi ah oo aqoon iyo feejignaan u leh qabashada tartankaan oo kale, si aysanba u dhicin marmarsiinyo ama garsooraha la jirey koox heblaayo.

Kooxda Minassota ayaa ku biloowday dardar iyo weerar degdeg ah, kadib markii ciyaaryahanka qaranka Soomaaliya u soo dheelay ciyaarihii Morroco dhamaadkii June 08, sitana Numberka 18 Ahmed uu shabaqa kooxda London ku hubsaday si xirfadaysan ilaa 4(3 point), taas oo garoonka dhan ruxday qaylo iyo sawaxan, kooxda London ayaa waxaa ku dhacay inay is waayan koox ahaan, hasayeeshe kabtanka kooxda London ciyaaryahanka sita numberka 12-aad ayaa isla markiiba dalbaday Time out ( Ciyaarta in loo hakiyo) si uu kooxdiisa u dajiyo talooyina u soo qaatan madaama dharbaaxooyin lagu boobsiiyay.

Kooxda kubadda koleyga Minassota Mpls ( USA), waxaa macalimiin u ah isla markaana gacanta ku haya macalimiin qibrad isboorti iyo waayo aragnimo u leh sida loo diyaariyo kooxaha kubadda koleyga da’yarta, kuwaas oo iyagaba laftooda soo ahaa xidigihii xulka Qaranka Soomaaliya ka hor burburkii dalkeena Soomaaliya 1991:

Macalin Ahmed Dahir, Macalin AbdulQadir Haji Dahir’’Shiikha’’, Macalin AbdulKadir Madaxeey, Macalin Idiris Sulayman, waxaana kale oo la socday kooxdan oo garab taagnaa Xidigii kooxda Jeenyo iyo Qaranka Soomaaliya Abdi Xalwo, Macalin Giftin, Saleban Salay, Liiban Dahir, Sicid Dhere iyo Bashir Doob.

Ciyaartii ayaa dib u bilaabatey dadwaynihiina kuligood waxay si xamaasad leh ugu kala qaybsameen ciyaarta madaama ciyaarta ay isku badashay mid kulul, qaar badan oo markii hore u sacabatumaayey kooxda Minassota oo lahaa USA, USA, USA markii ay goalasha ka dhalinayeen dhigooda Kooxda London ayaa waxaa i ag taagnaa macalin John intuu qoslay ayuu i yiri Soomaalidan hada USA USA ku haya hadhoow USA ha dhacdo ayay oranayaan hadii ay banaanka garoonka uga baxaan, taas oo ula jeeday qalbi xaarnaanta Soomaalida, ana waxaan ugu jawaabay hadii Amerikaanka madaxdooda arki lahaayeen dhalinyaradan Soomaaliyeed ee magacooda sare u qaaday way ku soo dhawayn lahaayeen magaalada Minassota hadii ay ku laabtan iyagoo koobka sita cajalada maanta la tuso, waayo waa fariin wanaagsan oo muujinaysa in cayaaraha dadka isku soo dhaweynayaan kala fikirka ah.

Ciyaartii ayaa is badashay kadib markii kooxda London ay dib isku soo abaabuleen, dadkii garoonka joogayna way kala qaybsameen madaama lagu ciyaarayey magaaladooda London qaar baa dhiiga ku korey bilaabayna inay durbaano u tumaan kooxda London si ay niyada ugu dhisaan, halka taageerayaashi jeclaystey ciyaar wanaaga iyo aqlaaqada kooxda Minassota ayaa sii laba laabeen taageeradii ay taageerayeen kooxda Mustaqbalka, inkastoo maamulka garoonka uu adkeeyay nabadgalyada kadib markii sawaxankii iyo qayladii garoonka ay badatey, balse asluub wanaag ayay muujiyeen dadkii tirada badnaa ee ka soo qayb galay ciyaarta ee lahaa rag iyo haween, caruur iyo ciroole.

Qaybtii labaad ciyaarta ayaa si wanaagsan looga tagey kooxda London oo aad moodo inysan lahayn wax maamul hogaamiya ama saxa, madaama kabtanka kooxda Abdull Mohamud Afrax uu qayb ka ahaa ciyaartooyda garoonka ku jirtey ee baratamaysay, halka macalimiinta tayada leh kooxda Minassota ay ka muuqatey deganaan iyo isku kalsoonaan aad u sareysa, taas oo u saamaxday inay kooxda kubadda koleyga Minassota MPLS(USA) guusha ku raacdo 100 dhibcood halka kooxda London ay dhaliyeen 61 dhibcood oo qura, iyagoo xaafadooda jooga taas oo aad ka garan karto farqiga u dhaxeeyay labada kooxood, hadii ay ahaan lahayd xaga maamulka iyo isku xirnaanta ciyaartooydaba.

Macalinka kooxda Ahmed Dahir xidigii Qaranka Soomaaliya iyo kooxda Horseed ama ENC ayaan waxaan su’aalay waxa uu caawa dareemayo madaama aysan jirin cid koobka ka xigta kooxdooda , waxana u yiri run ahaantii anaga halakan waxaan u nimid inaa koobka qaadno dadwaynaha tusno ciyaar wanaagsan, kooxdatan tababar dheer ayaan soo galinay aniga iyo saaxiibadayda kale ee caawa garoonka jooga, sharaf bayna noo tahay inaan aragno dhalinyaradan oo qaarkood jiraan 14 sano inay ku guulaystaan koobkan .

Mohamed Buuwe marti sooraha kowaad bahda Isboortiga Soomaaliyeed ee magaalada London ahna taageera isboorti iyo Alfanaan Abti ayaa heeso Soomaali ah ugu luuqeenayay dadkii ka soo qayb galay daawashada ciyaaraha iyo ciyaartooydii kooxda Minassota, iyadoo garoonka uu hal mar isku badalay meel ay si weyn ugu caweeynayaan saqiir ilaa kabiir, iyadoo oo qof walba oo joogay habeenkaas garoonka uu dib u jaleecsaday garoonkii Luujino ee ku yaalay xaafada Abdi Azix ee magaalada Muqadisho iyo barisamaadkii dalkeena oo nabad ahaa.

Gabagagabadiina waxaa garoonka dhaxdiisa la isaga qaaday sawiro xasuusa ah dhamaan dadkii ka soo qayb galay daawashada ciyaarta iyagoo wajiyadooda ka muuqato farxad iyo is jacayl ayay u kala dareeren xaafadaha ay ka kala yimaadeen London iyo nawaaxigeeda.

Hadaba warbixinta dheer ee aan ka soo qorey ciyaartan oo run ahaantii ah mid dhab ah, waxaan umadda Soomaaliyeed ugu bishaareynayaa in mustaqbalkii kubadda koleyga Soomaaliya ama ka matali lahaa dalkeena garoomada caalamiga in ay ku guulaysteen koobkii Somali Basketbal Tournament Week London 2008.

Kooxda kubadda koleyga Minassota MPLS(USA)

  • 5. SHARMAKE KHALIF 9. AHMED NUR
  • 6. YASIN JAMA 10. KHALID HUSSEIN
  • 8. ABDULAHI DALMAR 11. DA’UD MOHAMED
  • 15. ABDULKARIM DALMAR
  • 17. GULED ABDIRAHMAN(AMAAN)
  • 18. AHMED ELMI

W/D: Yusuf Yusuf

Secretary General of SSPA & Sports Editor

mrsomalia@hotmail.com

London


XUSEEN CABDI “ 15 SANO JIR KU DHASHAY DALKA CANADA KANA TIRSAN KOOXDA KUBADDA KOLEYGA SOOMAALIDA CANADA ISLA MARKAANA MUSTAQBAL KU LEH CIYAARTA KUBADDA KOLEYGA”.

Xuseen Cabdi waa wiil Soomaaliyeed kuna dhashay dalka Canada 15 sanadood ka hor, isla markaana aad u edeb badan ahna laacib mustaqbal ku leh ciyaarta kubadda koleyga.

Xusen Cabdi ayaa ka mid ahaa dhalinyarada sanadkaan nasiibka u yeelatey inay ka qayb galaan tartanka Somali Basketball Tournament Week London 2008, waxana uu ka tirsan yahay kooxda Canada
.

Intii ay socdeen ciyaaraha ama ka soo qayb qaadatey tartankaan ayaan waxaa ku tilmaami karaa inuu ka mid ahaa labadii ciyaaryahan ee uga da’da yareyd midkood Xuseen Cabdi.

Ciyaartii kowaad ee dhaxmartey kooxda Canada iyo kooxda Cardiff, run ahaantii waxaan dhihi karaa inuu ahaa laacibka suurtagaliyay in kooxdiisa inay ka badiyaan kooxda Cardiff oo aan dhamaanteen is lahayn way ku durdurin doonaan Xuseen iyo Saaxiibadiis kooxda Canada, hasa yeshee ma dhicin sidaasi ee waxaa guusha raacday kooxda Canada iyo Xuseen yare.

Mar aan la kulmay macalin BASHIR FOX & macalin Bashir Abdi Dahir oo ahaa u qaybsanayaasha eegida ciyaaryahanada kartida iyo xirfada leh ayay ii sheegeen inay mar horeba caalamadaysteen ciyaaryahankan Xuseen Cabdi.

Markii ciyaarta dhamaateyna ayna kooxdiisa guusha ku keneen caqli ayaan u yeernay su’aalnay magaciisa, da’diisa iyo meesha uu ku dhashay, si dagan oo asluubi ku dheehan tahay ayuuna nooga wada jawaabay Xuseen yare isagoo qoslaya kuna faraxsan guusha kooxdiisa Canada.

Ciyaartii labaad ay kooxdiisa kaga badisay dalka Switzerland ayuu hadana ka qaatey kaalin weyn isaga la qaybsanaya saaxiibadiis kubadda, dad badan oo Soomaali ah oo u soo daawasha taga garoonka maalin kasta daawashada cayaaraha ayaana ka wada helay qaab ciyaareedka Xuseen Cabdi, isla markaana la garab istaagay sacab iyo dhiirigalin, markii ciyaarta dhamaateyna waxa uu Xuseen Noqday wiilka la iskula sawiri badan yahay ama aan dhaho qof ay isku wada sawir waydiisasho badan hadii ay ahaan lahayd xidigihii hore Soomaaliya iyo dadka caadiga ah.

Shiine Guhaad oo horey u ahaan jirey ciyaartooy Qaran isla markaana soo noqday macalinkii Gabdhaha xulka Qaranka Soomaaliya ayaa isna ka mid ahaa dadkii la dhacay qaab ciyaareedkiisa isla markaana la galay sawir u ku dhiirigalinaayo Xuseen kana codsaday inuu dadaalkiisa halkaas ka sii wado.

Inkastoo hal mar laga badiyay kooxda Canada hadana laacibintii hore Soomaaliya ayaa qaba in Xuseen Cabdi iyo kooxda Canada ay iska cabin karaan kooxda Minassota ee la calin kari waayay, iyagoo raba inay arkaan waa ciyaartooydii horee in Xuseen kubadda la qaybsan karo kooxda ka timid dalka Mareykanka, madaama kooxdaas ay tahay tan kaliya aan ku tilmaami karo Mustaqbalkii Soomaaliya ee kubadda koleyga.

Xusen Cabdi oo dadka inta badan ay u bixiyeen Xuseen Future (Mustaqbal) waxaan u rajaynaynaa inuu noqdo mid kii ka guul gaara ciyaarta kubadda koleyga, noqdana kii ka daafaca garoomada caalamka dalka Soomaaliya insha Allah . Aamin

W/D: Yusuf Yusuf
Secretary General of SSPA & Sports Editor
mrsomalia@hotmail.com
London
 

Faafin: SomaliTalk.com |  August 20, 2008

BAARID | SEARCH


Hayadda batroolka SoomaaliyaDFKMG oo Heshiis u Saxiixday Shirkadaha Batroolka ee Kuwait Energy iyo Medco Energi...
Maadaama shirkadahaasi jaal la ahaayeen Geeddi ma lagu macnayn karaa in la soo celinayo Geeddi Akhri


Kulaabo bogga  www.SomaliTalk.com  © www.SomaliTalk.com

La soo xiriir:

IIDHEH
XAYAYSIIS