Wasiirka arrimaha gudaha dowladda federalka oo Khamiistii tababar u
soo gabagabeeyay 160 gabdhood oo boolis ah
Wasiirka arrimaha gudaha dowladda federalka Soomaaliya Max’ed Max’ud
Guuleed (Gacmo dheere) ayaa maanta si rasmi ah u soo gabagabeeyay seminaar
soconayay muddo labo todobaad ah 160 xubnood oo hawee Soomaali ah, kana mid
ah ciidamada Booliska Soomaaliyeed, kuwaasoo tababarka ku qaadanayay xarunta
dugsiga sare ee Booliska magaalada Muqdisho.
Munaasabad ballaaran oo loo sameeyay gabagabada seminaarka ayna ka qeyb
galeen masuuliyiin ka kala socotay labada gole ee dowlada federalka ,
saraakiisha sar-sare ee ciidamada Booliska Soomaaliyeed iyo maamulka Gobolka
Banaadir iyo marti sharaf kale oo lagu casuumay ayaa waxaa halkaasi ugu
horreyn warbixin ka soo jeediyay taliyaha Ciidanka Booliska Soomaaliyeed
Gen. Cabdi Xasan Cawaale Qeybdiid.
Taliyaha ciidanka Booliska Soomaaliyeed Cabdi Xasan Cawaale Qeybdiid
wuxuu ka warramay xubnaha 160-ka ah ee seminaarka loo soo gabagabeeyay iyo
duruustii ay ku qaadanayeen isagoo hoosta ka xarriiqay in ay ku barteen
duruus ay ka mid ahaayeen shuruucda booliska, baarista dambiyada, hawlaha
ciqaabta, maamulka xafiisyada, dhawrista xuquuqda, wuxuuna sheegay in
xubnahani ay ka kala socdeen qeybaha kala duwan ee ciidanka Booliska, sida
hawlaha caafimaadka, isgaarsiinta, taraafikada, saldhigyada booliska,
hoggaanada booliska iyo xafiisyada taliskaas, kuwaasoo loo soo xulay inay
hawlahaas baaxadda ee hor yaalla ciidamada booliska ay ka qeyb qaataan.
Cabdi Qeybdidi wuxuu sheegay in ciidanka Booliska Soomaaliyeed ay
xilligan hayaan arrimo badan oo khatarteeda leh, sida ka hortagga waxyaabaha
qarxa, dib u soo celinta sharciga iyo kala dambeynta dalka, ilaalinta
xasiloonida iyo la dagaallanka kooxaha argagaxisada, wuxuu sheegay Cabdi
Qeybdiid in ciidanka Booliska Soomaaliyeed uusan maanta gaarsiisaneyn
heerkii loogu talo galay, wuxuuna hoosta ka xarriiqay in ciidanka Booliska
Soomaaliyeed ay wax badan u soo dhabar adaygeen, kuwaasoo qaarkood naftoodii
ku waayay, qaarna ay ku dhaawacmeen, munaasabaddanna ay tahay munaasabad si
weyn booliska Soomaaliyeed kaalin mug leh uga jirta.
Cabdi Qeybdiid wuxuu sheegay in Booliska Soomaaliyeed ay meel eber ah ka
soo bilaabeen hawlaha kala duwan oo ay dalka u hayaan haddii ay jirto ciidan
boolis, haddii ay jirto aqoon, haddii ay jirto sharaftii iyo karaamadii
luntay iyo midnimadii dalka Soomaaliyaba, waxaa muuqata in dadka dhibaatada
intaas la eg soo martay in loo soo celiyo sharcigii iyo kala dambeyntii iyo
weliba dib u dhiskii ciidanka Booliska Soomaaliyeed oo ah ilaaliyaha
sharafta qaranka.
“Arrin sahlan ma ahan, waxaana muuqata in ciidanka Booliska Soomaaliyeed
uu ku joogo dhabbo billow ah oo dib loogu soo celinayo nabaddii, ilaalinta
sharciga iyo kala dambeynta, dadka soomaaliyeedna uu u noqon lahaa
badbaadiyaha iyo ilaaliyaha naftooda iyo maalkooda, inuu gaarsiiyo weeye
jidka la rabo maanta oo hadda lagu socdaa” ayuu yiri Cabdi Qeybdiid.
Cabdi Qeybdiid wuxuu kaloo sheegay in ciidanka Booliska Soomaaliyeed u
taagan yihiin in dalkan Soomaaliya laga saaro dhibka uu ku jiro oo ah
fawdada iyo kala dambeyn la’aanta, is dilidda sharci darrada ah, dhaca,
boobka iwm.
Ugu dambeyntii waxaa halkaasi ka hadlay wasiirka arrimaha gudaha dowlada
Federalka Soomaaliya Maxamed Maxamuud Guuleed (Gacmodheere) oo ugu horreyn u
mahad celiyay ciidanka Booliska Soomaaliyeed meel kastoo ay joogaan gaar
ahaan magaalada Muqdisho sidii ay u sugi lahaayeen nabadda iyo amniga.
“Dal kasta dhaqaalihiisa waxaa keena booliska, haddii aanay boolis
jirin, dhaqaale iyo amni midna ma jiraayo” ayuu yiri Md. Gacmodheere oo
dhinaca kale sheegay in uu tacsi guud u tirayo dhammaan xubnihii ka tirsanaa
ciidanka Booliska Soomaaliya oo ku geeriyooday ama ku dhaawacmay qaraxyadii
ka dhacayay magaalada Muqdisho muddadii ay hawl galka ku jireen.
Gacmo dheere wuxuu kaloo intaasi ku daray in dowladda federalka ay
qorsheysay 12 kun oo ciidan boolis ah, qorshahaasna haatan uu hirgalay, labo
kun oo ka mid ahna ay tahay inay mushaar siiyaan hay’adaha Qaramada
Midoobay.
Wasiirka arrimaha gudaha dowladda federalka waxa kale oo uu ka hadlay
abaaraha, fatahaadaha, duufaanada iyo dhibaatooyinka dadka Soomaaliyeed ku
dhacay sida barakaca, macluusha baahday ee ka jirta dalka, kuwaasoo shacbiga
Soomaaliyeed ay yihiin kuwo nugul, wuxuuna ugu baaqay beesha caalamka iyo
dowladaha Muslimiinta in bisha barakaysan ee Ramadan darteed ay u soo
gurmadaan, wuxuuna dhinaca kale kula dardaarmay xubnaha tababarka u xirmay
inay u gudbiyaan dadka aan fursadda u helin waxyaabihii ay kororsadeen
muddadii ay tababarka ku jireen.
Dowladda federalka oo si rasmi ah maanta u shaacisay in la qaaday
bandowgii saarnaa magaalada Muqdisho
Wasiirka arrimaha gudaha dowladda federalka Soomaaliya Md. Max’ed Max’ud
guuleed (Gacmodheere) ayaa maanta si rasmi ah u shaaciyay in dowladdu ay
gebi ahaanba qaaday bandowgii saarnaa magaalada Muqdisho muddada dhowrka
bilood ahayd.
Md. Gacmodheere wuxuu sheegay in dhammaanba la fasaxay dhaq-dhaqaaqyadii
dadka iyo gaadiidka iyo isu socodka magaalada Muqdisho laga bilaabo oo ay
taariikhdu tahay 13/09/2007da.
Gacma dheere iyo Qaybdiid
Wasiirka arrimaha gudaha dowladda federalka wuxuu sheegay in arrinitani
ay ka dambeysay kadib markii dowladda federalka Soomaaliya ay garwaaqsatay
bisha baraakeysan ee Ramadan darteed in shacbiga Soomaaliyeed ay u baahan
yihiin xilliyada salaadda taraawiixda in la siiyo fursado ay ku cibaadeysan
karaan maadaama lagu jiro bishii barakada iyo kheyrka laheyd ee Ramadan,
wuxuuna sidoo kale hoosta ka xarriiqay in ciidamada qaranka ay dowladu ku
wargelineyso inaysan hawlahooda dayacin inkastoo la qaaday bandowgii saarnaa
caasimadda, haddana ay waajib ku tahay in mar kasta feejignaadaan.
Max’ed Dheere iyo wafdi uu hoggaaminayo oo dalka dib ugu soo laabtay
Guddoomiyaha gobolka Banaadir ahna duqa magaalada Muqdisho Max’ed Cumar
Xabeeb (Max’ed Dheere) ayaa maanta dib ugu soo laabtay magaalada Muqdisho.
Guddoomiyaha ayaa safar ku tagay toddobaadkii hore dalka Yemen xaruntiisa
Sanca, wuxuuna halkaasi kula kulmay masuuliyiin ka tirsan xukuumadda Yemen,
isagoo kala hadlay arrimo dhowr ah oo ku aaddan arrimaha Soomaaliya.
“Waxaan dowladda Yemen kala hadlay sidii ay wax uga qaban laheyd arrimaha
nadaafadda ee dalka iyo dhinaca is gaarsiinta” ayuu yiri Max’ed Dheere.
Sidoo kale Max’ed Dheere intii uu ku sugnaa magaalada Sanca ee dalka
Yemen waxa uu ka codsaday hay’adaha isgaarsiinta ee dalka Yemen iyo
ganacsatadaba inay maal gelin ku sameystaan Soomaaliya, iyadoo sidoo kalena
hay’aduhu ay ballan qaadeen wixii hadda ka dambeeya inay diyaar la yihiin
maal gelinta iyo dib u dhiska dalka Soomaaliya inay ka qeyb qaataan.
Sept 14, 2007
Daabaco
Boggan | Print
