Barnaamijkii
Radio Xoriyo
10 July 2007.
Madaxdii mucaaradka oo la codsaday in
toogasho lagu xukumo.
Muslimiin ku baaqay in la joojiyo dadka Kenya
lag aafduubayo.
Guddoomiyaha Baarlamaanka Soomaaliya oo
sheegay in xukunkii degdegga ahaa dhamaaday.
Wargaysyada caalamka iyo waxay ka qoreen
Ogadenya.
======================
Madaxdii mucaaradka oo la codsaday in toogasho lagu xukumo.
Xerilaaliyaha maxkamad ku sheeg ay Itoobiya
saarayso madaxda xisbiga mucaaradka ee CUD ayaa maxkamad ku sheegta
ka codsaday in toogasho lagu xukumo. Madaxdan mucaaradk ah, oo
tiradoodu gaadhyso 38 qof, ayaa dhawaan la sheegay in lagu soo
caddeeyay in ku lug-lahaayeen gadoodkii dadwayne ee ka dhashay
musuqmaasuqii ay xukumadda Zenawi ku samaysay doorashadii la qabtay
bishii May 2005.
Xeerilaaliyahan, oo lagu magacaabo Abraham
Tetemke, ayaa sheegay in madaxda mucaaradka ee maxkamad ku sheegtan
la saarayo ay iski dayeen inay dowlada inqilaabaan. Madaxdan waxaa
ka mid ah dhawr xubnood oo baarlamaanka loo doortay oo ka mid yahay
Berhanu Negga, oo ah ninkii loo doortay guddoomiyanimada magaalada
Addis Ababa.
Madaxdan mucaaradka ee 38-ka ah waxaa markii hore
lagu soo eedeeyay denbiyada ay ka midka yihiin khiyaamo qaran iyo
xasuuq, wuxuuna qaadigu ku talajiray inuu xukunka ku dhawaaqo, hase
yeeshee wuxuu sheegay inuu muddo toddobaad ahba fursad siinayay
eedaysanayaasha inay ka jawaabaan dacwada xeerilaaliyuhu ku soo
oogay.
Hase yeeshee waxay diideen inay aqoonsadaan
maxkamad ku sheegta la saarayo oo ay iska difaacaan denbiyada lagu
soo oogay. Dadkan waxaa lala xidhay dad kale oo boqol ka badan,
kuwaasoo isugu jiray madax mucaaradka ka tirsan, suxufiyin iyo dad u
dhaqdhaqaaqa arrimaha xuquuqul insaanka.
Xukuumadda Itoobiya ayaa beesha caalamku hadda
billowday inay ka hadasho xadgudubyada faraha badan ee ay u gaysato
dadwaynaha rayadka ah oo ay ugu horreeyaan kuwa soomaalida
Ogaadeenya oo wixii hadda ka horreeyay ayna jirin cid ka hadli
jirtay denbiyada waawayn ee ciidamma Itoobiya ka gaystaan dalka
Ogaadeenya.
Intii ka denbaysay soo bixiddii warbixintii
xaqiiqada ahayd ee Human Rights Wacth ay ka soo saartay xadgudubyada
ciidammada Itoobiya ka gaysanayaan Ogaadeenya, waxay qaar badan oo
warbaahinta caalamka ka mid ahi billaabeen inay hadlaan waxyaabaha
ka dhacay Ogaadeenya, iyadoo wargaysyada waawayn ee adduunka lagu
soo daabaco warbixino arrimahaas ka hadlaya, isla markaana dowlada
Maraykanka lagu canaanto xidhiidhka ay la leedahay xukuumada
Itoobiya oo ku caan-baxday ku xadgudubka xuquuqda aadanaha.
Muslimiin ku baaqay in la joojiyo dadka Kenya
lag aafduubayo.
Dad badan oo uslimiin ah ayaa ku baaqay in la
joojiyo dadka sida qarsoodiga ah looga afduubo dalka Kenya ee la
geeyo Soomaaliya iyo Itoobiya. Dad aad u tira badan ayaa si qarsoodi
ah looga qaadaa dalka Kenya, loona dhoofiyaa Soomaaliya iyo
Itoobiya, iyadoo ay arrintu u muuqato hawlgal wadajir ah oo lagu
fuliyo dad ay tuhmaado ka soo galeen dowladaha Soomaaliya, Itoobiya
iyo waliba Maraykanka.
Hooggaamiye u hadlay muslimiinta Kenya ayaa
sheegay in dad badan oo loo tarxiilay dhinaca Soomaaliya loo sii
gudbiyay Itoobiya, laakiin aan si dhab ah loo garanaynin meesha ay
Itoobiya aga xidhan yihiin.
Wuxuu kaloo sheegay in qaar badan oo dadkaas ka
mid ahi ay ehaladooda la soo xidhiidheen markii Itoobiya loo
afduubayay, isla markaana ay u sheegeen inay la xidhan yihiin dad
kale oo fara badan oo iyagana Kenya laga tarxiilay.
Dadka noocaas ah ee Kenya laga soo afduubay, ka
dibna Itoobiya loo gacan galiyay waxaa ka mid ah ganacsade reer
Ogaadeenya ah oo lagu magacaabo Bashiir Axmed Makhtal, kaasoo la
sheegay inuu hadda ku xidhan yahay xabsi ku yaalla nawaaxiga Addis
Ababa, isla markaana xadgudubyo kala duwan loo gaystay, looguna
hanjabay in la dilayo. Ninkan oo haysta dhalashada Canada ayaan ilaa
iyo hadda xaaladdiisa laga warhaynin, loona oggolaanin in cidi
aragto. Dowlada Canada ayaan iyaduna ilaa iyo hadda tallaabo macquul
ah oo la garaysan karo ka qaadin.
Guddoomiyaha Baarlamaanka Soomaaliya oo
sheegay in xukunkii degdegga ahaa dhamaaday.
Guddoomiyaha Baarlamanka Somaliya Sheikh Aadan
Madoobe ayaa markii ugu horraysay sheegay inuu dhamaaday xukunkii
degdegga ahaa ee dalka lagu soo rogay xilli hore, isla markaana uu
Baarlamanku hadda qabsanayo howlihiisa caadiga ahaa.
Hadalkaan ayuu Sheekh Aadan Madoobe sheegay
markii uu daba-yaaqadii toddobaadkii hore dib ugu soo laabtay
magaalada Baydhabo ee xarunta u ah dowladda ku meelgaadhka ah ee
Somaliya.
Sheekh Aadan Madoobe ayaa intaasi raaciyay in
Baarlamanka Soomaaliya uu maalmahan kulamo ka yeelan doono arrimaha
Somaliya, kana hadli doono arrimo muhiim ah oo khuseeya xaaladaha ka
jira dalka Soomaaliya.
Dad fara badan ayaa walaac ka muujiyay xukunka
degdegga ah oo awoodo dheeraad ah siinayay madaxwaynaha, isla
markaana ciidammada rukhsad loo siiyay inay dili karaan qofkii ay ka
shakiyaan ama baadhi karaan meel ay tuhmaan. Hadalka Sheekh Aaden
madoobe ayaa ku soo hagaagay xilli uu qalalaase lixaad lahi ka jiro
guud ahaanba dalka Soomaaliya, gaar ahaan arrimaha nabadgelyada ee
magaalada Muqdisho.
10 July 2007
Axmed Gaal-Eri
Radio Xoriyo waxaad ka dhegaysan kartaa Mawjadda
19 MB ee dhererkeedu yahay 15260 KHZ,iyo internetka
Radioxoriyo.com,Ogaden.com
Maalmahaa Talaadada & Sabtida 7:00PM – 7:30 waqtiga Afrikada Bari