Tuulada Gololey Daa’uud
oo laga furay Dugsi Cusub
Febraayo 2, 2007 ayaa
markii ugu horreysay laga furay Tuulada Gololey Daa’uud ee
Degmada Balcad Dugsi Hoose Dhexe oo ay dhiseen Jaaliyadda
Soomaaliyeed ee Dalka Britain.
Iskuulkaan ayaa noqonaya kii ugu horreeyay oo loo dhiso
dadka ku dhaqan tuulada Gololey Daa’uud oo ka tirsan Degmada
Balcad ee Gobolka Shabeellada dhexe, waxaaan iskuulkaan uu
noqonayaa iskuulkii ugu horreeyay oo ay nasiib u yeeshaan
dadka deegaankaas ku dhaqan oo aan iyagu horay u haysan goob
ay wax ku bartaan.
Xafladdii lagu furayay Iskuulkaan oo ay ka soo qaybgaleen
dadka deegaanka, Wakiilka Jaaliyadda UK ee dhistay Iskuulka,
Guddoomiyaha Degmada Balcad iyo sidoo kale marti sharaf kale
ayaa waxaa halkaas hadal ka soo jeediyay Wakiilka Jaaliyadda
UK oo iyadu dhistay iskuulka Eng. Abuukar Cali Geeddi oo ku
dheeraaday sidii ay ku billaabeen inay dhisaan iskuulkaan.
“Waxaan dadaal weyn u galnay sidii aan iskuul uga furi
lahayn Tuulada Gololey oo ka tirsan Degmada Balcad si ay u
helaan dadka Deegaanka waxbarasho, waxaana kalliftay
arrintaan markii aan indho indheyn ku sameynnay tuulada
ogaannayna inaysan jirin meel ay dadka deegaanka wax ku
bartaan, taas ayaana nagu kalliftay inaan furmo Iskuulkaan
cusub” ayuu yiri Eng. Abuukar Cali Geeddi oo intaas ku daray:
“Waxaan doonaynayn inaan ka dhigo iskuul mid galaaso badan
yeesha, balse markaana aragnay inaanay jirin meel ay wax ku
bartaan dhallaanka tuuladaan ayaa waxaa dantu nagu qasabtay
inaan furno iskuulkaan ka kooban 3-da qol, balse dhawaan
ayaan ku talo jirnaa inaan ballaarinno iskuulka”.
Sidoo kale mar uu ka hadlay cidda bixisay qarashaadka,
wuxuuna carrabka ku dhuftay inay qarashaadka bixiyeen
Jaaliyadda Soomaaliyeed ee UK, “Markii aan u bandhignay
dhibaatada waxbarasho la’aaneed ee ka taagaan tuulada
Gololey ayaa waxay go’aansadeen jaaliyadda UK inay ururiyaan
qarashaad ay ku dhisaan iskuulkaan cusub, sidaa ayaana
dhismaha iskuulkaan ku noqday mid aan hirgelinno” ayuu yiri
Eng. Abuukar.
Sidoo kale waxaa ka hadlay xafladda iskuulka lagu furayay
Xiriiriyaha Xiriirka Saaxiibtinimada Jarmalka iyo Soomaaliya
Ibraahim Cali Xasan oo isagana sheegay in wixii tabartiisa
ah uu dowladda Jarmalka uga raadinayo inay wax u qabtaan
dadka tuulada Gololey, waxaana uu carrabka ku adkeeyay in
Iskuulka loo furay tuuladaan uu yahay mid ay nasiib u heleen
inay u furaan Jaaliyadda Soomaaliyeed ah ee ku dhaqan dalka
UK, waana mid aan uga mahadcelinaynno dhammaanteen.
Goobta kulanka ayaa waxaa ka hadlay sidoo kale Odyaal
dhaqameedka tuulada Gololey oo sheegay inay si weyn ugu
faraxsan yihiin iskuulka loo furay, waxayna sheegeen inay
uga Mahadcelinayaan Jaaliyadda UK ee iyadu isku taxaluujisay
inay furaan Iskuulkaan, waxaan ay ugu duceeyeen in
Muraadkooda uu ALLE aqbalo.
Sidoo kale Guddoomiyaha KMG-ka ah ee Degmada Balcad C/llaahi
Maxamed Rooble oo isagana xafladdaas ka hadlay ayaa sheegay
inuu aad uga mahadcelinayo jaaliyadda UK oo dadaalka
dheeraad ah u gashay inay iskuulaan furaan, waxaan uu
sheegay in dadka ku dhaqan degmada Balcad iyo tuulooyinka
hoos yimaada ay abaal weyn ku qabaan iskuulkaan loo furay
ayna walaalahood u rajeynayaa guul iyo horumar.
Jaaliyadda Soomaaliyeed ee UK ayaa iyadu horay waxay uga
hirgelisay iskuul Degmada Balcad, waxaan iskuulkaas oo ka
kooban Hoose, Dhexe iyo Sare haatan wax ku barta dadka
Degmada Balcad, waxaana uu ka kooban yahay sida Eng. Abuukar
uu u sheegay saxaafadda 15-Galaas, 2-Xafiis iyo Afar
Musqulood, waxaana la hirgeliyay Iskuulkaan sannadkii hore
ee 2006-ka.
Muuse Maxamuud Jiisow
somali39@hotmail.com
balcad tuulada gololey Somaliya
025215576666
002521653623
Faafin: Feb 2, 207
|