IBTILO

Cumar C/nuur Nuux – Nabaddoon

omarabdinur@hotmail.com

---

Tixdaan magaceeda la yiraahdo “Ibtilo” waxaa curiyey Inj. Cumar C/nuur Nuux – Nabaddoon taariikhdu markay ahayd 01/04/07. Tixdu waxay tilmaan kooban ka bixinaysaa xaaladda dalkeennii ku suganyahay.

1. Indhow-garad baa na helay
2. Asluubtaa laga arraday
3. Inkaar baa nagu dhacdoo
4. Ilaah baa nagu salladay
5. Dadaan arxan noo galayn 
    
6. Amxaar baan wada rabnaa
7. Annagu ways diidannahay
8. Ikhyaar iyo oday ma jiro
9. Indheer-garad waa la cunay
10. Dhammaan iilkaa la dhigay
11. Ibtilo baa nagu dhacdaye
12. Alloow talo noo ekaa!! 
     
13. Anaa adi kaa tol weyn
14. Itaal baan kugu marsiin
15. Waxaan anigaba iqaban
16. Ayaa lagu doodayaa
17. Ummad lagu laynayaa
18. Qaran lagu aasayaa
19. Inkaar baa nagu dhacdoo
20. Ibliis baa noo tashaye
21. Alloow talo noo ekaa!! 
     
22. Koluu Afrikaan ku yahay
23. Adduun waa naga hormaray
24. Annagu waan qaybsannahay
25. Bal eegoo eegga daya
26. Halkaan aayaha ku furay
27. Qofkiinnii aragti lihi
28. Ilmadu saw kaama quban
29. Inkaar baa nagu dhacdoo
30. Ibliis baa noo tashaye
31. Alloow talo noo ekaa!! 
     
32. Agoontii baa ka badan
33. Kuwii aabbaha lahaa
34. Iskuul cidi uma dhigtoo
35. Aqoon li’i bay koraan
36. Xeryaa lagu oodayaa
37. Waxaa lagu oranayaa
38. Askari baad noo tihiin
39. Iyana weeyey ku odhan 
     
40. Illeyn waa duul Ibliis
41. Dhammaantood ababiyoo
42. Asxaan aan loo galine
43. Aa-kee bay wada sitaan
44. Dadkay ku afuufayaan
45. Iyana ways laynayaan
46. Ibtilo baa nagu dhacdaye
47. Alloow talo noo ekaa!! 
     
48. Ayey baa layska nacay
49. Aroor xero looga tagay
50. Awoowana waa la dilay
51. Ummulahaa orad ku dhala
52. Waxaas arxan goys la dhigay
53. Ilaah waa nala ogyahay
54. Abaal marin baa ka iman
55. Inkaar baa nagu dhacdoo
56. Ibliis baa noo tashaye
57. Alloow talo noo ekaa!! 
     
58. Islaamkaan cadow u nahay
59. Ilxaadkaan wada rabnaa
60. Annagu ways diiddannahay
61. Illaa ceelkii Berbera
62. Dhammaan eed baan qabnaa
63. Uurkaan ka colleysannahay
64. Amxaar urayoo baqtiyey
65. Ayaa loo abasaxyahay
66. Inkaar baa nagu dhacdoo
67. Ibliis baa noo tashaye
68. Alloow talo noo ekaa!! 
     
69. Haddii Xamar aan gubnoo
70. Abbaajaha Mililik iyo
71. Amriikaan lagu fasaxo
72. Halkii laga ooyi laa
73. Badhkiin alalaasayaan
74. Ogaadoo maahan tani
75. Angoola iyo Barasafiil
76. Inkaar baa nagu dhacdoo
77. Ibliis baa noo tashaye
78. Alloow talo noo ekaa!! 
     
79. Intaan nalakaba adkaan
80. Intaan nala aayo tidhin
81. Alloow talo noo ekaa
82. Inaan is-uruursannoo
83. Adkeyno wadajirkoo
84. Idleyno Ilaaqtankiyo
85. Anaaniyadaan xuntaa!! 

Cumar C/nuur Nuux – Nabaddoon
omarabdinur@hotmail.com